Read Khiamniungan Naga Philipi 2 Bible Online

Philipi 2 - Khiamniungan Naga bible

Philipi 2

¹Asam aakih Khrista nai noinai asam ou lokongkiuji, naiuso apa atsüojin nou asam a-lou-iji. Asam onthso nai ajeiai-e noin, naiuso haisi haine atsüojinyang naiuso atsüojin-e noin.

²Nungtiphe asam mongyang tsakhau thetsün nai atsüojin janelutsün nai naiuso onthso naiuso mongyang tsakhau jeiaitsün nai ngo thumkü mongling-iau ngü asam ta kojaji.

³Tengkhaiu thaiuthalu tsüdekünai, abülom mongyang asiuteng nou titso lashan, lüko tsaküh tsak khako tsamlokü lüthe, meshen tübao amaohai meijeng ta asaichi lüyang.

⁴Asam khaiunia pungkü nou meshen thaiutha tsüyangkü lüko me thaiutha lüyang.

⁵Khrista Yisu da sübao mong noiküla, nung asam da lüko lünoi:

⁶Apa Goa khekkü noi lüko, Goa ko wekü noitsün lolaokü taiu-au ayam ta tsükowe.

⁷Apa mongchiotsün apaüh taiu nou apem wan, nungthangko to ayathsüotsün pem tsak iula. Apa khaiuniali iula naiuso khaiunia khekkü shin.

⁸Apa shitsamkü, paiphu nai etsün yam thathonkü etsün dongai angio angkü tsakei.

⁹Nungshioko Goa nou apa thatü losongkiu naiuso nian apem ongko asongting apa hau kiu.

¹⁰Nungshioko Yisu nianko aün nai noinso, goumchiko noinso naiuso gohkhei-ai noinso apemüh singkau nou kaukü,

¹¹Po nou Goa hau ajinka kiukü, Yisu Khrista APAOU noin ta, lei apem nou thaloukü we-e.

¹²Nungtiphe atsüojintsünso, ngo asamko noinai asamüh titi angio ang, lo ngo tsünoikünai lüko tekkü angio lü-ang. Asamüh ngaongaokü hatkü meshen aasan lüchhisanlu,

¹³tiautenai Goa nou asaichi asam ko apa ayangtaiu angio angau shiokü hau chhi nou chhiji.

¹⁴Chhi apem anamnamtsün tsüdekünai akhengshitsün tsühakü lüchhi,

¹⁵nungti naito asam alotheantsün naiuso angei goumchiko kihlüko athapungtsün Goa ün asio naiuso ayanthsüo thsoso noi-e. Asam ngüso ongko maou nai kianthsüo aawon kiutsünli,

¹⁶asam aa ngem ngüso hau kiutsün lüthe. Asamüh nungti chhi naito, ngo Khrista ajekhaiu nai bülomau shio-e, tiautenai nung tsangkü ngo oukongkü chhisantsün chhisiya apem yaang nai tsüwan ta hanne.

¹⁷Tsüngean jü she asam amonglam Goa hau aa chaithio kiutsünli jatsanau shiom. Nung atsüo naito ngo monglingtsün asam apem nouko haoson theau amongling noin.

¹⁸Nungti asam lüko lümongling, naiuso ngüko amonglinge.

¹⁹APAOU mongchio naito, asam dongai Timothi shakta hongkü asam ngiongem lukü ngo monglinge ta yangji.

²⁰Jü mongyang ngesantsün naiuso asam thaiutha paotsangtsün nung Timothi lu noin.

²¹Amaohai apemüh Yisu Khrista ün tsüyamkü meshen alesanlu yamji.

²²Naiuso asamüh asam chija apa titi tinkü noin, je titi thsosipoli Ngem Amei thaiutha aikü chhin, nung ngeji.

²³Nungtiphe jü thaiutha alum titi phokleanji, ngü nung ngekü asam dongai apa ashiotsün lektso shakta honge.

²⁴Jüpem lüko shakta shi-e ta ngo APAOU nai monglamji.

²⁵Jü deisinioso, achhitsün jühai, sau ngoko aikü ehlihekü shin nung jü thaiutha apoutsün nai asam yathsüo, nung hongthon Epafrodita, asam dongai hongau poukü noin ta ngü yang.

²⁶Apa asam apemko eppeau thatü mongpikü yang, tiautenai apa akia noiküla ta asamüh lula-iu.

²⁷Atsüoting apa eauli kiakü noiküla, lüko Goa nou apa hau atsüojinyang han, nung apa da lu tsüde, lüko ngo amongmat khaiuko amongmat tsüepau thaiutha, ngo tü lüko atsüojinyang han.

²⁸Nungtiphe asamüh apa müjam epkü monglingau, naiuso jü amongmat lothsaoau thaiutha, ngü apa thatü mongchiokü hong-iu.

²⁹Nungtiphe APAOU nai apa monglingkü lülo, naiuso nungtin khaiunia hau asuhat lükiu,

³⁰tititenai jü thaiutha asam ahachu ti in nou mothapung, nung kiuau meshen aa angja nai taiukü Khrista chhi thaiutha apa eau shimkü iula.