Read Khiamniungan Naga Philipi 3 Bible Online

Philipi 3 - Khiamniungan Naga bible

Philipi 3

¹Athon nai jü deisinioso, APAOU nai lümongling. Ngü nung ngiolu asam dongai satau atsüoting tsümongthonji, lüko nung asam thaiutha alotsüo-etsün noin.

²Nung angei chhitsün khaiunia, ji hoi sauhaiüh meshen pem da lukialokü chhiji, ngüso thako lütsüolo.

³Nung atsüoting atippantsün to ngüsoüh tsüde, lüko samüh loum tiautenai samüh Goa apa Onthso tsangkü amkhamji naiuso Khrista Yisu nai jeiaitsün nai monglingeji.

⁴Nungti lüko ngoto nyih nai yangkotünai, yangau shio-e. Amao ajantsoüh nyih nai yangau shioji ta yangnai, ngü tekkü yangau shio-e.

⁵Ngo Israel mele Benjamin kau ainou, Ibri ongko Ibri, petjeinyi nouko tippan, ngiokhem nai ngo Farisi,

⁶naiuso donthe jei-atkiutsün nai ngo thatü mongchiokü noiküla. Tilektso khaiunia tsak ngiokhem angtsün tsangkü nai asio iula au shio-auli noiküla, nung yamko ngo aphio tsülepkü aküo nai noiküla.

⁷Nungti lüko sübao jü thaiutha alesan ta yangküla, nungso Khrista thaiutha yaang ta ngü wethiu.

⁸Nunglu tsüde: ngü jü APAOU Yisu Khrista angelatsün sübao chikü khaiuko chaiouting nung thaiutha athum aloat ta ngü weji; ngo Khrista nai thumkü jeiaitsün thaiutha

⁹nungso chikü beisikinlu ta ngü weji. Ngiokhem angtsün tsangkü asio eptsün ngü jü tengkhaiu asio tsütaiushi. Asio sübao Goa ainou amonglam chiai thekü shin, nunglu ngü lo asio nou Khrista nai amonglam tsangkü taim.

¹⁰Ngü aiutsün to apem Khrista naiuso apa oukong nai ahkü shitsün ngeau, apa angja haoson nai, naiuso apa etsün khekkü eau,

¹¹ngü jü chija ee ainou ahkü shi-e ta yangji.

¹²Ngü lo nung thashiolu-iu ta tsüde, tsüdekünai ngü thapungkü iula ta tsüde. Lüko sübao thaiutha ngo Yisu Khristaüh thalokü noiküla, nung ngü thalue-sao ta komkeiji.

¹³Deisinioso, ngü jü chija nung loto thalo-iu ta tsüvehaji; lüko ngü chhitsün to nung chhiji, nungti akhuwan thaiutha beyankü kha-ai nou thaluau koweji.

¹⁴Yisu Khrista nai akhengtengai jontsün alesan athattaiutsün ngoiau ngo jingkü khuji.

¹⁵Sam, sauhai onthso nai ashe noin nungso apemüh nung ayam taiu-ela. Lüko asam ajantso ayang amomo noi naito, Goa nou asam hau nung tsangsheikü han-e.

¹⁶Nungti lüko samüh to losaokü ti ta thalukü shin nung ngiokhem wekü lingkülu kha-ai khuko.

¹⁷Jü deisinioso, jüsakshi ngelotsün nai tsülaokü lünoi. Sauhaiüh asam thaiutha athatlu ayam thakü hanji nungso tü mongkiukü lühoilut.

¹⁸Ngü nung thaiuko asam hau piaküjam chite-iu, naiuso ngü loüh shapshapkü nung laoshikü ngioji: Khaiunia aa piakü Khrista Paiphu nai etsün ko eh iula-iu.

¹⁹Ngüso inheeng nai thonlüshian-e tiautenai ngüsoüh pem nou mongchiotsün meshen Goa hau iulakü noin. Ngüso amiamau nai bülomji naiuso goumchi ün jengtsaiu tülu yangji.

²⁰Lüko samto aün paopunghoi noin, naiuso sam APAOU Yisu Khrista aün ainou saoau nou ta samüh mongpikü taiuji.

²¹Apa oukong sübao nou jengtsaiu apem apa nokshing khemai taiuau shio, nung tsangkü apaüh sam outsükongkün amowantsün pem nouso apa ajinkali li-eshikü shankiu-e.