Read Khiamniungan Naga Philipi 4 Bible Online

Philipi 4 - Khiamniungan Naga bible

Philipi 4

¹Jü deisinioso, asamüh ngo tü titi atsüojin noin, naiuso ngo asam tü mongpiji. Asamüh ngo titi mongling-in, naiuso ngo asam shioko titi koi-in! Atsüojin deisinioso, asam aa APAOU nai nungli thatü mongkü tsa au noin.

²Ngü Ewodia si Sintike ne APAOU nai mong tsak hau lü-iula ta lotsüoji.

³Naiuso ni, ngü monglamtsün jühai. Ngo ni hau nung nyiuhai nouso tü hachu-iau aiuji; tititenai ngüsoüh Ngem Amei lopengau ngüko hakü chhikü shin. Klement ko hakü, amaohai ngüsoko aikü chhitsünso nian Goa aa thsam nai satkü noin.

⁴Asaita APAOU nai lümongling; müjam lüko ngü ngioko, lümongling!

⁵Asamüh jeilotsün khaiunia apem hau lünge-i, APAOU shiao shimkü noin.

⁶Tiaitso mong lahen, lüko apemai misao naiuso akoja naiuso nianlom nou asamüh kojatsün Goa hau lünge-i.

⁷Naiuso Goa aalu sübao nou angelotsün apem thathsatji nungüh Yisu Khrista nai asam mong naiuso ayangtsün jimkü noi-e.

⁸Athonting nai deisinioso, tilüsong ngiotsüo noin, tilüsong asuhatau noin, tilüsong ayam noin, tilüsong ayanthsüo noin, tilüsong atsüojinau noin, tilüsong thaiutha Ngem Amei noin, tso tsak amei noi nai, naiuso tso tsak nianlom noi nai, nungso thaiutha lüyanglu.

⁹Asamüh jüngio ainou naiuso jü chhi ainou ti ngelu, nungso lüchhi, naiuso aalu Goa nou asamko noi-e.

¹⁰Lüko lo athon nai, asamüh jü thaiutha yangtsün ngiokü shi-iu ta ngü APAOU nai thatü monglingji; nungti lüko atsüoting asamüh lüko asaichi ngo yangkü noikülalüko asamüh ngo hachuau atao amei tsüepküla.

¹¹Tsütaiukün thaiutha ngü tsüchiteji, tititenai ti aküo ko ngo noi-e, nungko mongtsamkü noiau ngü ngelo-iu.

¹²Titi henlüshikü noi-e nung ngü ngen. Alum ai naiuso chhi apem nai, miankü noiau lüko, naiuso naiukü noiau lüko, piakü taiukü noiau lüko, nung akaungio nouso ngü ngelo-iu.

¹³Ngo hau Khristaüh oukong kiutsün nou akuo thaluao ngo oukongkü noin.

¹⁴Nungti lüko asamüh ngo angja omhe nai hachuphe asamüh meikü chhin.

¹⁵Ngü sappattsün naiuso alesan eptsün nai haoson lokiutsün asam noin, ngo tü hachutsün asam donthe lu noin; aya ajekhaiu ngü tilai Makedonia wankü Ngem Amei chimkü khukü noiküla, nung asam Philipi haiüh thatü meikü ngen.

¹⁶Tititenai ngo Thesalonika nai noi nai lüko jamlu tsüdekü ngü poukü noitsünko asamüh thsale kanlu.

¹⁷Ngü paopei thaiutha tsüyamji, lüko asam nianko singtsün eiu thaiutha yamji.

¹⁸Lüko ngü saiukü naiuso piakü taim. Ngü asam ainou angannyam nyakü nyamtsün, Goa mongtsamtsün, asam ainou shitsün aluau maikü noitsün chaithio, Efafrodita ainou lüko, ngo miankü noin.

¹⁹Naiuso jü Goaüh Yisu Khrista nai apa aniamsim taiutsün ainou jengtsaiu asamüh poutsün apem kiu-e.

²⁰Lo sam Po Goa tü athontsüyangkün ajinka lüthe. Amen.

²¹Yisu Khrista nai asiohoi pungkü hau salam lükiu. Ngoko noitsün deisinio nousoüh asam hau salam kiuji.

²²Asiohoi apem nou naiuso tekkü Caesar tsamkhaiu nai noinsoüh asam hau salam kiuji.

²³APAOU Yisu Khrista atsüojin asam onthso nouko lünoi.