Read Khiamniungan Naga Kolosi 1 Bible Online

Kolosi 1 - Khiamniungan Naga bible

Kolosi 1

¹Paul, Goa nou mongchiotsün tsangkü Yisu Khrista hongthon, naiuso sam deisinio Timothi ainou

²Kolosi nai noitsün Khrista nai asiohoi naiuso amonglamtsün deisinioso dongai: Sam Po Goa ainou asam dongai atsüojin naiuso aalu lünoi.

³Samüh asam thaiutha asaita misao saokü, sam APAOU Yisu Khrista Po nou Goa hau nianlom kiuji.

⁴Tititenai samüh Yisu Khrista nai asam amonglam naiuso asiohoi thaiutha asamüh tsüojintsün lula-iu.

⁵Tilai nung ngiotsüo ngio, ngem amei, ayating asam dongai shi, asamüh ayangtaiu chaithio kiutsün thaiutha lula-iu. Nungtiphe asam amonglam naiuso atsüojin asamüh yangtsün nung thaiutha aün nai khemkü taim.

⁶Naiuso titi ngem amei nou goumchi ai eiu eiuji naiuso singji, nungti sübao ajekhaiu nai asmüh atsüoting Goa atsüojin thaiutha lula naiuso ngen, nung ajekhaiu ainou asam ongko lüko ngem amei eiu eiuji.

⁷Tititenai sam ayathsüotsün hai Epafrodita, sau sam thaiutha Khrista nai amonglam ayathsüotsün noin, apa ainou asamüh Goa atsüojin ngelu,

⁸naiuso apaüh loüh onthso nai asam atsüojin sam hau nge-in.

⁹Nungshioko samüh asam thaiutha losaokü asaichi misao saoji. Sübao Onthso nou angelatsün naiuso mongyang apem hakü apa mongchiotsün nai angetsün nou asam mian-iau samüh Goa tü sang.

¹⁰Naiuso Goa ngetsün nai singkü, chhi apemai eiu eiukü, naiuso apemai APAOU mongtsamikü maikü tsakeiau thaiutha samüh misao saoji.

¹¹Naiuso amongling nou laiukü jeiloutsün naiuso akiploutsün apem thaiutha apa ajinka oukongli oukong apem nou oukong-iau thaiutha,

¹²naiuso Po sauüh awon nokshing nai asiohoi tengkam janelutsün iula au sam maikü iula-i, asamüh apa nian lomau thaiutha ngü misao saoji.

¹³Tititenai apaüh anyakhem oukong ainou sam kipsan naiuso atsüojin Thso nokshing nai sam lokü taiu.

¹⁴Apa da sam tuhsantsün taim, nung sam chaithe wankiutsün.

¹⁵Epau tsüshiokün Goa nung epau shiokü noitsün Khrista khekkü noin. Ashantsün jengtsaiu apem chiai apa ayating chettsün Thso.

¹⁶Tititenai aün nai naiuso goumchiko jengtsaiu apem eptsün nung tsüepkün tilüsong noin, nokpao noikham lüko, nokshing nouso lüko, atengting nouso lüko, oukong nouso lüko, apem apa da shan, apem apa tsangkü naiuso apa thaiutha shaniu.

¹⁷Apa apem chiko ayating ainou noin, naiuso apa da apem noiji.

¹⁸Apa pem nai apa khaiu noin, apa pem aa nyimsantsün nung Khrista noin, nung donthe. Apa ayating chettsün Thso noin, sau ee ainou ahkü shin, jengtsaiu apem khaiu ai apa ayating anoithang taiuau.

¹⁹Tititenai nung Goa mongthat Thso nou apa da Goa tongtü khekkü noiküla.

²⁰Thso nou tsangkü Goa nou apa chija goumchi apem apa dongai kanjikanau ayang noiküla. Goa nou apa Thso Paiphu nai etsün tsangkü nokmei shan naiuso goumchi naiuso aün nemtso ai noitsün jengtsaiu apem apa dongai kanjikan.

²¹Kümi atao jam asam Goa ainou laiukü pungekü noiküla, tiautenai asam tsümeikü chhi naiuso yangtsün shioko eh iulakü noiküla.

²²Nungti lüko loto asam thsülupia tsüpokü asio, naiuso aphio tsülepkünai apako ha-iau, apaüh nyih pem nai eantsün tsangkü asam jeiai-in.

²³Goumchi ai noitsün ashantsün apem khako chimtsün sübao ngem amei asamüh lula, nung ngem amei ayangtsün ainou asam amonglam nai mongkü tsa nai asam apako ha-i-e.

²⁴Lo ngo asam thaiutha omhetsün nai monglingji, tiautenai ngo jüpemai omhetsün nou ngü löuh Khrista apa pem donthe nou thako omhetsün thapungkiuji.

²⁵Naiuso ngo Goa tsangkü donthe nai ayathsüotsün tsak iula, Goa nou nung chhi asam meiau thaiutha ngü hau kiu. Nung chhi nou apa ngem amei thumkü lopengau noin.

²⁶Nung ngio shinapau asam thaiutha Goa nou ngü hau kiutsün ayathsüotsün chhili, ngo nung donthe yathsüotsün iula.

²⁷Goa mongthat nou apa khaiuniaso hau apa akaungio nge-iau noin, nung ajinka akaungio nai memei apa khaiuniaso thaiutha noin. Nung akaungio nou Khrista asam da noin, nungko asamüh Goa ajinka haoson eppe.

²⁸Sam khaiunia pungkü Khrista nai thapungkü ha-iau thaiutha mongyang apem nou khaiunia pungkü chimkü naiuso lotsüokü samüh Khrista thipengkiuji.

²⁹Nung chhi chhianau ngo tankü naiuso li-ekü, ngü da chhitsün Khrista oukong asong ngü hau kiutsün tsangkü noin.