Read Khiamniungan Naga Kolosi 2 Bible Online

Kolosi 2 - Khiamniungan Naga bible

Kolosi 2

¹Asam Laodicea nai noitsün khaiuniahoi naiuso amao sauhaiüh ngü tengkhaiukü tsünge, nungso apem thaiutha chhi titi kongkü chhin nung ngo asam hau chiteko.

²Ngüso amongsongtsün nou miankü noiau, naiuso atsüojin nai aikü kamshikü noiau athapung ngesankü apemai memei iulakü hau thaiutha ngü nung chhin. Nungli ngüsoüh sübao Goa akaungio Khrista apa pem noin, nung nge-e.

³Apa Goa mongyang naiuso angetsün apem tsangpokkü taiutsün kuo soptsün japi tsak noin.

⁴Ngio anyaothing nou asam sau tsüsapthio-iau thaiutha ngü nung ngioji.

⁵Tititenai ngo nyih nai asam ko tsüha lüko onthso nai asam ko noin, naiuso asam ayam thakü monglingkü noitsün naiuso asam amonglam Khrista da tsülemlemkü noitsün epji.

⁶Nungtiphe asamüh APAOU Yisu Khrista titi lo, nungti apa da eiu saokü naiuso thonlutkü,

⁷asam tü chimtsün amonglam nai mong-ikü, apa hau nianlom thatü kiukü lünoi.

⁸Tisübao Khrista ainou tsüdekü khaiunia nou chimtsün tsüdekünai nung anyakhem goumchi nokshing onthso nouso ainou tsangkü saulünou khaiunia mongyang atsüotsüdekün asapthiotsün tsangkü sau sua tsü-iula-iau lütsüolo.

⁹Tititenai asio sansimong thumkü mongtsamkü noitsün naiuso apa pem Khrista nai noiji,

¹⁰naiuso sau atengting naiuso oukong apem khaiuko akhaiu, apa da asam thapungkü iulaji.

¹¹Pha tsühakü tippantsün nou, Khrista atippantsün nai nyih pem nou wantsün apa da asam tippan.

¹²Naiuso alimtsün nai asam apako khan, naiuso loüh alimtsün nai ee ainou apa ahkü shi-itsün Goa nou chhitsün oukong nai amonglam tsangkü asam apako ahkü shi-in.

¹³Asam ataojam onthso ee noiküla, tiautenai asam chaithe shioko naiuso Melemaohai Ngiokhem tsühakü asam noiküla. Lüko Goa nou lo asam Khristako aa nai niakü shin. Goa nou sam chaithe apem wankiu-iu;

¹⁴apaüh sam atsüojin tsünoikün chailaiu asattaiu ngiokhem nou keshikü noitsün nung thumkü Paiphu nai laluttsün tsangkü wankiuwaniu.

¹⁵Naiuso nung Paiphu chiai Khristaüh Onthso nokshing nouso naiuso oukong nouso ainou apa chija khaiuniatsüo iula; apaüh nyung khako ngüso akhuothiotsünso niasantsün tsangkü ashiotsün iulakü han-iu.

¹⁶Nungtiphe hetsün naiuso shiutsün lüko, sümai ajekhaiu lüko, alei yan lüko, Yihuda Anuonyi lüko, sauhaulünou asam Ngiokhem lashan-i.

¹⁷Nung apem ashiau noitsün asutsomlu, lüko pem nou Khrista.

¹⁸Tiautenai khaiunia ajantsoüh niothap mothikü asong taiutsün tsangkü asam chija sauhaulünou tsülusankü hau atao lakiu, naiuso sauhaiüh chija atsüotsüdekünai lusong iulakü naiuso aün honghoi ta amkhamji. Tititenai nungtin khaiunia tsak yaang nyih sansimong nou bülomkü iulatsün tiaitso maikü tsünoi,

¹⁹naiuso Khrista sau pem nai khaiu noin apa ta helutkü noitsün laoji. Uojei nouso naiuso atsa nouso, naiuso nung songtsün Goa mongchiotsünli songau pem apem Khrista khemai aikü kamshikü noin.

²⁰Asam Khrista ko hakü ee naiuso nung goumchi nokshing onthso nouso ainou khaiuniatsüo iula. Naito tiau asam nung goumchi ün li kihji? Asamüh nungtin ngiokhem nouso tiau angji?

²¹“Nung tü lathalo,” “Nung lahe,” “Nungso tü lathantan.”

²²Nungso apem jengtsaiu sübao samüh jam kankeiküta atheau tsünoikü iulatsün ta ngioji; nungso khaiunia nou shantsün ngiokhem naiuso achimtsünlu noin.

²³Nungtin ngiokhem nouso ngüsoüh kojakü aün honghoi ta amtsün mongyang chiai noilutkü sung-e, naiuso yaang nai nian lusong, naiuso pem angja lushitsün lüko ngüsoüh meshen shesinyih chinektsünso thatsamau atsüoting titso tsünoi.