Read Khiamniungan Naga Kolosi 3 Bible Online

Kolosi 3 - Khiamniungan Naga bible

Kolosi 3

¹Asam Khrista ko ahkü shinaito, Goa uai moknoitsün Khrista naiuso akhengai noitsün jengtsaiu nouso lüyam.

²Goumchiko noitsün jengtsaiu nai tsüde, akhengai noitsün jengtsaiu nai asam mong lütaiu.

³Tititenai asam ean naiuso asam aa Goa ko Khrista nai tsangtaiukü noin.

⁴Khrista sau sam aa noin, apa tilai atsangshei sunge, nungai asam lüko apa ko ajinka nai tsangsheikü sunge!

⁵Nungtiphe goumchiko noitsün asam uojei, nung tsütsamtsütsüo, tsüyanthsüokün, tsümeikün, achinek, naiuso sotsom amtsün, nungso apem asamüh lüloat,

⁶nungso thaiutha angem tsülukün thsoso dongai Goa mongmat sungtsün shiji.

⁷Kümi tilai asam nungsoko aa noiküla, asam lüko nungso ko tsakei.

⁸Lüko lo asamüh nungso apem nung amongmattsün, mongthe, chinyantsün, alotsao naiuso sonsili ainou amiam chitetsün lüwan.

⁹Tsaküh tsak ko atsüotsüdekü lachide, tititenai asamüh khaiunia akeng apa chhi naiuso saisile nouko wanan-iu,

¹⁰naiuso khaiunia ayan saisile tholo-iu. Asam apa tongtü ngetsün nai niajikanau nou shioko nung saisile ayan sübao Goa, nungso shantsün nou asaichi apa pem khektsün nai ayan shikü noiji.

¹¹Nungai Grik hai naiuso Yihuda hai atippantsün naiuso tsütippankün, ngiokhem tsütaiukünso, Sidia hai, sua, khaiuniatsüo, nungso tsü aasan, lüko Khrista apem naiuso apemai noin.

¹²Nungtiphe Goa ün ashingsanli asio, naiuso atsüojintsün, mongkiakü yangkiutsün mong, atsüojinyang, henkü iulatsün, amongmei, laiukü jeilutsün nungso lütholu.

¹³Khaiunia ajantsoüh ajantso thako aphio kiuau noi nai, asamüh haisihai ne laiukü jeilu-ekü aphio nou awan kiu-ela. APAOU nou titi asam hau aphio wankiu; nungti asamüh lüko lüchhi.

¹⁴Naiuso nungso apem chiai atsüojin, sübao athapungtsün, akeshitsün noin nung lütholu.

¹⁵Sübao Khrista aalo nai asam lüko pem tsak ko jon, nung asam mongai nok lüshing-i, naiuso asamüh nianlom kiukü lünoi.

¹⁶Jengtsaiuli Khrista ngio nou asam da lünoi-i. Mongyang apemai haisihai ne nianlom jih naiuso asio jih naiuso Onthso jih nou hangkü lülotsüo, naiuso asam mongai atsüojin nou Goa tü lühang.

¹⁷Ngio nai lüko, chhi nai lüko, asamüh tilüsong chhi-e, APAOU Yisu nianko apem lüchhi; naiuso apa tsangkü Po nou Goa tü nianlom lükiu.

¹⁸Tsammongnyiu nouso, APAOU nai titi tinkü noin, nungti meshen tsammongpo khemai lünoi.

¹⁹Tsammongpo nouso, meshen tsammongnyiuso tü lütsüojin, naiuso ngüso thako akhuo lanoi.

²⁰Methsoso, asamüh alumko meshen posinyiu tü angio lü-ang, tititenai APAOU nai nung mongtsamtsün noin.

²¹Po nouso, asamüh meshen thsoso angio tsü-angkü tsü-iulakü hau ngüso tü lanamnam.

²²Sua nouso, asamüh meshen APAOU nouso tü angio lü-ang, khaiunia mongling-iau niovei nou eptsünko lu chhi tsüde, lüko APAOU lun hatkü mong saitha nou lüchhi.

²³Asamüh tilüsong chhi-e, mong apem nou khaiunia thaiutha tsüdekü, APAOU thaiutha chhitsünli lu lüchhi.

²⁴APAOU nou apa khaiuniaso hau ti paopei kiuau taim nung asam hau kiu-e ta lüyangsan. Tititenai asamüh yathsüotsün APAOU Yisu Khrista atsüoting noin.

²⁵Tititenai sauhaiüh aphio kankei-e, apa meshen chhi aphio thaiutha laokü eppe, naiuso nungko phaphi phamong tsünoi.