Read Khiamniungan Naga Kolosi 4 Bible Online

Kolosi 4 - Khiamniungan Naga bible

Kolosi 4

¹APAOU nouso, aün nai asam lüko APAOU tsak noin ta ngekü, asam tsamki so tü tsüokü naiuso wekü lükankei.

²Misao nai tsülaokü mongkü lünoi, naiuso nungko nianlom kiutsün nai thsümonkü lünoi.

³Loüh Goa nou Khrista akaungio thaiutha apa ngiongem chimau atao amei kiuau sam thaiutha misao asaokiu. Tiautenai ngü lo nung thaiuthako akhuothiotsün nai noin.

⁴Ayam thakü ngü titi chiteau noin, nung tsangsheikü chiteau shiokü hau misao lüsao.

⁵Sauhai tsümonglamkünso noin, ngüso dongko asam saisile ayam naili mongthat mongsai noitsün lüthe, asam atao amei apem atheau nai atuhlowan.

⁶Khaiunia pungkü tü asamüh titi thalaau ayam noin, nung asamüh ngeau thaiutha, asam ngio asaita atsüojin nouko naiuso anyaothing lünoi.

⁷APAOU nai atsüojintsün deisinio naiuso monglamtsün ayathsüotsün, naiuso hai Taikikasüh asam tü jü thaiutha apem ngio-e.

⁸Nung thaiuthalu asamüh sam aküo ngeau, naiuso apaüh asam mong tsameiau, ngü apa asam dongai honge.

⁹Mong lamtsün naiuso atsüojin deisinio Onesima, sau asam ongko tsak noin, apa Tukika ko aikü honge. Ngüsoüh asam hau nungai chhitsün apem nge-i-e.

¹⁰Akhuothiotsün nai noi nou jühai Aristarka, naiuso Barnaba le nou Mark (sau thaiutha asamüh ngiokhem nai ngiotsün ep, apa asam dongai shinai lülo;)

¹¹naiuso Yihusua sau tü Yusta ta jonji, apaüh lüko salam hongji. Goa nokshing thaiutha chhitsün jühai naiuso jümong tsamtsün khaiunia nungsolu noin.

¹²Yisu Khrista yathsüotsün asam ongko tsak Epafrasüh asam hau salam kiuji. Goa nou mongchiotsün apemai asam thapungkü naiuso atsüoting iulakü tsa au shioau thaiutha apaüh apa misao nai asaita asam thaiutha hongji.

¹³Asam, Laodicea naiuso Hierapoli nai noinso thaiutha apaüh chhi thatü kowekü chhin ta ngü apa mitha kiuji.

¹⁴Moushe ngepo atsüojintsün Luk naiuso Demasüh asam hau salam kiuji.

¹⁵Laodicea nai noitsün sam deisinioso naiuso Nimfa hau loüh apa tsamai kamshitsün donthehoi hau salam lükiu.

¹⁶Nung thsamsat asam ongko veküta Laodicea hai donthe ai lüko lüve-i, naiuso Laodicea ainou shitsün thsamsat asam ongko lüve.

¹⁷Naiuso Arkipa tü, “APAOU nai ni ti chhi yathsüokü shin lo nung thapung-iau lükong” ta lüngio.

¹⁸Ngo Paulüh jü salam ngio meshen pha nou satji. Ngo kekü noitsün labe-an! Asamko Goa atsüojin lünoi.