Read Khiamniungan Naga 1 Thesalonika 3 Bible Online

1 Thesalonika 3 - Khiamniungan Naga bible

1 Thesalonika 3

¹Athon nai, loto samüh ajeiloshiau tsüshio. Nungtiphe sam Athen noknio nai noianaulu yanglu

²lüko samüh deisinio Timothi, sauüh Khrista thaiutha Ngem Amei chimtsün nai samko aikü Goa yathsüo, asam amonglam nai oulokongkü hachuau samüh apa hong.

³Nungtiphe nung awontsao shioko asam saulünou amonglam ainou phoklekü lakhuwan. Nungtin awontsao Goa mongchio haoson tsak ta asamüh asam chija meikü ngen.

⁴Sam asamko noitaoko, samüh awontsao eppe ta asam tü aya aita ngiom, nungti nung thawao, nung asamüh ngeji.

⁵Tititenai sam chhi apem alesan tsünoikü tsü-iula au thaiutha, alilutsün nou asam lilu-e ta ngo yangelat! Asam amonglam Khrista nai titi khuji nung thaiutha ti tsülukü noiau tsüshio nou shioko ngü asam dongai Timothi hong.

⁶Lo Timothi, asam ainou laokü shinai, asam amonglam naiuso atsüojin, naiuso asamüh sam asaita meikü yangsantsün thaiutha, samüh asam eppau aiutsünli, asamüh sam eppau yangtsün, ngio ngem amei sam dongai kankü shin,

⁷nungtiphe deisinioso, asam amonglam tsangkü sam angja omhe apemai asam thaiutha sam mong aalo-in.

⁸Tititenai asam APAOU nai mongkü tsanai, sam aa noin.

⁹Lo samüh asam thaiutha sam Goa hau nianlom kiuau shioji. Asam shioko samüh amongling taim, nungshioko samüh apa nian lomji.

¹⁰Samüh asam amonglam thaiutha ti poukü noin nung shanshiau naiuso asamko aikü noiau sam mong apemüh asoh anyi Goa tü sam mongüh misao saoji.

¹¹Sam Po Goa naiuso APAOU Yisu Khristaüh sam asam dongai shiau yam akhemkiu!

¹²APAOU nou asam tsaksitsak tsüojinekü noiau naiuso khaiunia chikü apaüh sam tü asongting tsüojintsünli tekkü shingkü khuau atsüojin lünoi.

¹³Nungli apaüh asam oulokonge, naiuso sam Po Goa naiuso APAOU Yisu apa ün hong nouso hakü shinai asam apa khako pemkü naiuso siokü iula-e.