Read Khiamniungan Naga 1 Thesalonika 4 Bible Online

1 Thesalonika 4 - Khiamniungan Naga bible

1 Thesalonika 4

¹Athonting nai deisinioso, asamüh titi tsakeikü Goa mong leng-iau noin, nung sam ainou ngelu. Naiuso ngeluküta tsakeitsünli, nungtü tekkü meikü theshiau, samüh APAOU Yisu nianko kojakü asam tü lotsüoji.

²Tititenai APAOU Yisu tsangkü samüh asam hau ti ayamhan kiu nung asamüh ngen.

³Goa nou asam tsütsamtsütsüokün ainou pungeküta siokü noi-iao mongchioji.

⁴Asam khaiunia pungkü nou meshen tsammongnyiu ko titi asio nai naiuso asuhatkiutsün ayam nai kih-e nung ngeau noin,

⁵achinek naiuso abülom nai tsüde, tsüdekünai Melemaohaili tsüde.

⁶Nung thaiutha nai khaiunia sauüh meshen amonglam deisinio tsüsapthio-i-ela, naiuso tekkü tsükankei-ela; tititenai samüh kümei asam lotsüo-iu, naiuso mitha kiutsünli, nung apemai phaosantsün APAOU noin.

⁷Goa nou sam tsütsamtsütsüokü hao thaiutha tsüde, lüko asio thaiutha jon.

⁸Nungtiphe sauhaiüh nung atsandetsün tsüluji nung khaiunia tsülutsün tsüde, lüko Goa sauüh asam hau Asio Onthso kiuji apa tsüluji.

⁹Nungko deisinio amonglamhoi tsaküh tsak atsüojineao thaiutha asam dongai sattau ti poukü tsünoi. Asam asam chija tsaküh tsak titi tsüojineau noin nung Goa tsangkü chimiu.

¹⁰Naiuso atsüoting asamüh deisinio apem ta Makedonia apem nai nung saisileli lükankei. Deisinioso, loüh nungtü tekkü meikü kankei shiau samüh asam tü kojaji.

¹¹Samüh aya nai ngiotsünli, asam meshen haoson chhi nai ashio lüep, naiuso momo aa thaiutha saitha lüchhi, tsamloukü kih au asam watthat lüthe.

¹²Nungti tsümonglamkünso ainou asamüh chhi nai asuhat eppe, naiuso asamüh poutsün thaiutha asam sau da niolutkü tsünoi-e.

¹³Sam deisinioso, ayangtaiu tsünoikünsoli, asam tsülekkatau, samüh asam hau sailakü khutsünso thaiutha tsüngela-ikü taiuau tsü-aiu.

¹⁴Yisu eküta ahkü shishin ta samüh monglamji, naiuso Yisu ko sailakü khutsünso Goa nou apako niakü khu-e.

¹⁵Sam sauhai lo aa noin, tilai APAOU shi-e, sauhai ekü noin nungso khako tsükhu-e; ta nung atsüoting APAOU apa pemüh tsandetsün noin.

¹⁶Tititenai aün honghoi ekhung sangh asong nou, naiuso jangongmat ngem nouko APAOU pem aün ainou sao-e, nai Khristako monglamkü etsünso chong ahkü shi-e.

¹⁷Nungai sam aa poikü noinso, koi-ai APAOU ko pheteau ngüsoko aikü thengmia nai shipkü sunge. Nungti sam asaita APAOU ko noi-e.

¹⁸Nungtiphe nungso ngio nou asam haisihaine alutsüo-e lünoi.