Read Khiamniungan Naga 1 Thesalonika 5 Bible Online

1 Thesalonika 5 - Khiamniungan Naga bible

1 Thesalonika 5

¹Deisinioso, ajekhaiu naiuso ataothat nungso tilai thawao-e nung thaiutha asam dongai satau ti poukü tsünoi.

²Tititenai anyakhem nai kao shitsünli APAOU ajekhaiu shiji ta asamüh asam chija meikü ngen.

³Tilai ngüsoüh alum “Tsamlokü naiuso Kipsankü noin” ta ngio-e, nungai nyiuhai tsak methso chet taoko angjatsünli, alekta ngüso dongai alotheantsün shiji, naiuso ngüso tsüthakhu-e!

⁴Lüko deisinioso, asam anyakhem nai tsüde, naiuso nung Ajekhaiu nou asam kao tsakli alekta thalouau tsüde.

⁵Tiautenai asam apem awon thso, naiuso anyi thso. Sam asoh tsüdekünai anyakhem ün thso tsüde.

⁶Nungtiphe sam amaohaili lasaila, lüko thsüokü thsümonkü noiko.

⁷Tititenai ngüso asoh sailaji, naiuso ngüso theng nou anyakhem nai asoh tukji.

⁸Lüko sam to anyi ün phe, samüh atsüojin naiuso amonglam nekhut kongnai khutkü, aasan yangtsün son kandio tsak thaiutha thsümonkü noiko.

⁹Goa nou sam apa amongmat nai angja-iao tsü-aiu, lüko sam APAOU Yisu Khrista tsangkü aasanau chhin.

¹⁰Tilai apa shi-e sam aa noilüko, naiuso ee noilüko, sam apa ko aikü noiau thaiutha apa sam thaiutha ean.

¹¹Nungtiphe lo asamüh chhitsünli, tsaküh tsak oulülokonge naiuso tsaküh tsak lühachu-e.

¹²Deisinioso, asam ongko sauhaiüh amei yam naiuso donthe yam hankü chimji, asamüh nungso hau ayam nai asuhat lükiu ta kojaji.

¹³Ngüso tü ngüso chhi thaiutha atsüojin nai thatü asuhat au, samüh asam tü kojaji. Asam ongko jeiaikü lünoi.

¹⁴Deisinioso, tsütsüokü tsakeitsünso lülotsüokiu, monghenkünso mong lülosongkiu, outsükongkünso lühachu, apem khako laiukü lüjeilu ta samüh asam tü lotsüoji.

¹⁵Sauüh tsümeikün liko tsümeikü tsükiushiau tsüokü lüthe, lüko hai naiuso apem khako ti amei nung lüyam.

¹⁶Asaita lümongling.

¹⁷Tsülaokü misao lüsao.

¹⁸Alumko nianlom lükiu. Tiautenai Yisu Khrista nai nung asam thaiutha Goa nou mongchiotsün noin.

¹⁹Onthso nou lalonyat.

²⁰Achimtsün tsüvesankü lathe;

²¹apem liluküta, amei lüshinglu;

²²tsümeikün alum ko pungekü lünoi.

²³Goa sauüh sam hau aalu kiuji apaüh yam apem nai asam siokü ashan naiuso asam onthso naiuso aa nou sam APAOU Yisu Khrista shinai pem aphio tsülepkü apem kipsankü ataiukiu.

²⁴Sauüh asam jon apa monglamkü hau noin, naiuso apaüh nung chhi-e.

²⁵Deisinioso, sam thaiutha misao asaokiu.

²⁶Asio sonchep nou deisinio chikü hau salam lükiu.

²⁷Nung thsamsat deisinio apem khako lüvede ta, APAOU nai asam amonglamhoi apem tü ngü kojaji.

²⁸Sam APAOU Yisu Khrista atsüojin asong asamko lünoi.