Read Khiamniungan Naga Yihusua 1 Bible Online

Yihusua 1 - Khiamniungan Naga bible

Yihusua 1

¹APAOU yathsüotsün Mosa ean kütün phiai, APAOU nou Nun thso Yihusua tü chitekü noiküla.

²Apaüh ngiom, “Ngü yathsüotsün Mosa eaniu. Ni naiuso Israel khaiuniaso apem lo lükhemlo, küta ngo ngüso hau kiutsün goumchi Yordan Haiu yankü nai lünap.

³Ngo Mosa tü chitetsünli, ngo ni naiuso jü khaiuniaso hau ahok nou ngamkü yankü khuau noitsün goumchi athum kiuwaniu.

⁴Asam elung nouso ajepekki singtso goh ainou ajenapki Lebanon king tü thalutkü, ajepek nai haiumong asong Eufrates ainou, Hit hai goumchi yankü ajenap nai Mediteranian khiamnok saokü noi-e.

⁵Yihusua, ni aakihtsün lektso khaiunia sauüh ni tsüshio-e. Ngo Mosa ko hakü shitsünli, ngo niko ha-e. Ngo niko asaita hakü noi-e, Ngo ni tilaitso tsüleane.

⁶Mong songkü naiuso monglamkü lüthe, tititenai nung khaiunia nousoüh nungh goumchi thaloau sübao ngo ngüso paosiposo tü thalokü taim nungso khako ni ahei theau noin.

⁷Monglu lüsong, naiuso monglamkülu lüthe, naiuso ngü yathsüotsün Mosaüh ni hau kiutsün Ngiokhem nouso apem angkü theao tsüokü lüthe. Nung ngiokhem tsaktso mong tsükiukü lawan, naiuso ni tilüsongai khu-e ashio nou eppe.

⁸Asam amkham nai Ngiokhem thsam nou asaita veao labean. Nung ah-nge, ah-nya pungkü vekü lüyanglu, naiuso nungko satkü taiutsün ni alum angkü theao tsüokü lüthe. Nungaito ni shiolokü khu-e, naiuso tsüomeikü noi-e.

⁹Ngo ni tü monglamkü naiuso mong songkü theao thoiluttsün lüyangsan! Hatkü tsüdekünai monghenkü lanoi, tititenai ngo APAOU, asam Goa, ni tilüsongai khu-e niko asaita hakü noi-e.”

¹⁰Nungai Yihusuaüh aheihoi nou- so tü

¹¹ngüso saothang nai khukü nung ngio kiuao hongkü ngiom, “Eheshiu ajantso khemlokü ataiu, tiautenai samnyi mongko asamüh goumchi sübao APAOU asam Goaüh asam hau kiutsün thaloau Yordan Haiu yankü khu-e.”

¹²Yihusuaüh Reuben si Gad kau naiuso Manase kau apaitso nou tü ngiom,

¹³“APAOU yathsüotsün Mosaüh APAOU asam Goaüh asam hau Yordan tü ajepek nai noitsün goumchi asam kihthangau kiu-e ta ngiokü noitsün nung lüyangsan.

¹⁴Asam tsammongnyiuso, thsoso, naiuso thainian nouso nungko noi-e, lüko asam süpaiso, ehli ao shitholoküta, Israel hai meshen hoi nouso tü hachuau meshen hoiso Yordan yankü kha ai khu-e

¹⁵ngüso APAOU asam Goaüh Yordan tü ajenap nai noitsün goumchi asam hau kiuao thalotaiutsün thalokü mokihlokün lektso ngüso khu-e. Apaüh Israel kau nouso apem hau aalo kiukütün phiai asam Yordan tü ajepek nai süpao APAOU yathsüotsün Mosaüh asam hau kiukü ngiom, nung asam ün goumchi nai akihlo.”

¹⁶Ngüsoüh Yihusua tü thalakü ngiom, “Ni chitetsün alum samüh chhi-e, naiuso ni sam tilüsongai honge nungai sam khu-e.

¹⁷Samüh Mosa ngio asaita angkü shitsünli, samüh ni ngiotsün ange, naiuso APAOU a Goa, Mosa ko hakü noi- tsünli, niko hakü lünoi!

¹⁸Sauhaiüh angiokhem ta khengshi-e, tsüdekü- nai ni kiutsün ngio tsü ange, nungto loatkü wane. Mongsongkü naiuso mong lamkü lüthe!”