Read Khiamniungan Naga Yihusua 11 Bible Online

Yihusua 11 - Khiamniungan Naga bible

Yihusua 11

¹Tilai Israel haiüh shiolokü shitsün ngiongem nou Hazor nokpao Jabin shingoi, apaüh Madon nokpao Jobab, Shimron naiuso Aksaf nokpao nouso,

²ajepekki king goumchi nai noitsün nokpao nouso, ajepekki Yordan Tsamei Galil khiamnok dongai kihtsün nokpao nouso, kinghok nai kihtsünso, naiuso Dor shimkü khiamsai nai kihtsün nokpao nouso dongai ngio hongpeng:

³Apaüh loüh Yordan Haiu e nemthso nai kihtsün Kanan hai dongai, Amor hai dongai, Hit hai dongai, Periz hai dongai, king goumchi nai kihtsün Jebus hai dongai, naiuso Mizpa hai goumchi Hermon kinghok nai kihtsünso Hiv hai dongai lüko ngio hong.

⁴Ngüso ehli süpaihoi haiusai nai singtsoli piakü kamlokü ehli ao shin. Ngüsoüh mokthso naiuso ehli tsamkei piakü kankü noiküla.

⁵Nung nokpao süpaihoi nouso apem aikü kamloküta Israel haiko ehli ao Merom Haiungan nai asaothang shan.

⁶APAOU nou Yihusua tü ngiom, “Ngüso lun hatkü lanoi. Lühom nung taoko Israel thaiutha ngo ngüso apem loatkü wane. Asamüh ngüso mokthsoso hok longek kiu-e naiuso ngüso ehli tsamkei nouso in nai jawanao noin.”

⁷Nungtiphe Yihusua naiuso apa khaiunia apem nou ngüso Merom Haiungan nai alekta kome.

⁸APAOU nou Israel hai hau ngüso khako ashiolotsün kium, Israel haiüh ngüso koman küta ajenapki nai Misrepot Maim naiuso Sidon saokü, naiuso ajepek nai Mizpa tsamei saokü ngüso komkü khu. Ehoi nouso mothamokün lektso ehli nou tsülaokü likü noiküla.

⁹Yihusuaüh ngüso tü APAOU nou ti thoilut nung chhin, apaüh ngüso mokthsoso hok longek kiu, naiuso ngüso ehli tsamkei nouso in nai jawankiu.

¹⁰Yihusua nungai nou laplokü shikü Hazor noknio thalo naiuso nung nokpao loatkü wan. (Nung taoko nokshing apem chiai Hazor nokshing oukongting noiküla).

¹¹Ngüsoüh nung noknio nouko kihtsün khaiunia tsaktso aa tsüpoikü apem loatkü wan, küta noknio nou in nou jekthiowan.

¹²APAOU yathsüotsün Mosaüh thoiluttsünli, Yihusuaüh nungso noknio nouso apem naiuso nungko ngüso nokpao nouso hakü thalowan; küta ngüso apem loatkü wan.

¹³Yihusuaüh Hazor noknio jekkan kiutsün tü simkü Israel haiüh choi nai noitsün noknio nouso to tsüjek- thiowankü taiu.

¹⁴Israel khaiuniahoi nousoüh nung noknio nouso ainou chaiou, naiuso tsam thainian apem lowan küta nungso jengtsaiu ngüso thaiutha taiuwan. Lüko ngüsoüh khaiunia mepem tsaktso aa tsüpoishikü loatkü wan.

¹⁵APAOU nou apa athoilut apa yathsüotsün Mosa hau kium, küta Mosaüh nungso Yihusua hau kiushin, küta Yihusuaüh nungso apem angio angkü kankei. APAOU nou thoiluttsün apem apaüh chhin.

¹⁶Yihusuaüh king naiuso kinghok goumchi apem thalo: ajepekki naiuso ajenapki nemthso, Goshen khiam- khan apem naiuso nungtü lalutkü noitsün ajenapki goumchi loüh Yordan Tsamei lüko thalokü noiküla.

¹⁷Apaüh thalotsün goh Edom Halak shimkü king ajepekki ainou ajenapki Baalgad saokü, ajepekki Hermon King Lebanon Tsamei nai saokü thalo. Yihusua nung goumchi nokpao nouso ko atao laiukü ehli kü noiküla, lüko apaüh nungso apem thaloküta loatkü wan.

¹⁹Hiv hai ajantso kihtsün Gibeon noknio lu Israel haiko nokmei shankü noiküla. Amao noknio nouso apem ehli nai shiolowan.

²⁰Ngüso tsütsüojinkü naiuso moisemkü lomowaniao thaiu- tha APAOU nou ngüso mongsongkü iula-i küta Israel haiko ehli-i, nung APAOU nou Mosa tü thoiluttsün noiküla.

²¹Nung taoko Yihusua khukü Hebron nai, Debir nai, Anab nai, naiuso Yihuda king goumchi apem naiuso Israel nai Anakim ta jontsün akonghoi mele sauhai king goumchi nai kihkü noiküla nungso lomowan. Yihusuaüh ngüso naiuso ngüso noknio nouso moisemkü lomokü wan.

²²Israel hai goumchi ko Anakim hai sautso tsüpoi, Gaza nai, Gad nai, naiuso Asdod nailu thsaokü poikü noiküla.

²³Mosa tü APAOU nou thoi- luttsünli, Yihusuaüh goumchi athum thalowan. Yihusuaüh nung goumchi kau pungkü thaiutha haoson janthat küta Israel hai hau ngüsoüh tengkam theao thaiutha sunkü kiu. Nungti khaiuniahoi nou ehli nai nou aalo ep.