Read Khiamniungan Naga Yihusua 13 Bible Online

Yihusua 13 - Khiamniungan Naga bible

Yihusua 13

¹Lo Yihusua thatü sonankü noi taoko, APAOU nou apa tü ngiom, “Ni thatü sonaniu, lüko loüh goumchi nou songkü loshi ao noishin:

²Filistia hai si Geshur hai goumchi apem,

³Loüh ajepekki tü thalutkü Avim goumchi apem. ‘Shihor haiuthso Ijip hai elung ainou ajenapki elung Ekron saokü nung Kanan hai ün goumchi ta wesankü noiküla. Filistia hai nokpao pungo nouso kihtsün noknio nouso: Gaza, Asdod, Askelon, Gad, naiuso Ekron.’

⁴Loüh Kanan hai goumchi apem naiuso Meara (sübao Sidon hai ün noiküla), nung Amor hai elung ai Aphek saokü;

⁵ajepek Lebanon goumchi apem, Baalgad ainou Hermon king ajepekki ainou Hamat Aoyan saokü nung Geba hai goumchi noiküla.

⁶Nungüh Lebanon King nouso naiuso Misrefod Maim jetko Sihon hai king goumchi apem mongthiokü noiküla. Israel hai tsalo nai ngo nung khaiuniahoi apem komane, ngo ni tü achhiao thoilutkü taiutsünlilu, ni Israel hai ongko nung goumchi janpek au noin.

⁷Nungaito, lo nung apoi nouso amao kau lükao nouso mongko naiuso Manase kau apaitso nouso ongko ngüso thaiutha tengkamao lüjanpek.”

⁸Reuben, Gad, naiuso Manase kau apaitso nousoüh APAOU yathsüotsün Mosaüh ngüso hau sonkiutsün goumchi haoson nou ep, nung Yordan Haiu e ajepek nai noiküla.

⁹Ngüso goumchi (Arnon Tsamei thun nai) Aroer saokü noiküla, nungko hakü nung tsamei wemko noknio nou naiuso Medeba ainou Dibon saokü kengsuo nouso apem mongthiokü noiküla.

¹⁰Nung Ammon elung saokü Hesbon nai Amor hai nokpao Sihon tsangkü nokshingtsün noknio nouso apem mongthiokü noiküla.

¹¹Nungko Gilead, Geshur, naiuso Maaka khiamkhan nouso, Hermon King apem, naiuso Saleka saokü Bashan goumchi apem, mongthiokü noiküla.

¹²Nungüh Og sau Refaim hai nou aphiting nokpao sauüh Asdarod si Edrei ne ko nokshingkü noiküla, nung mongthiokü noiküla. Mosaüh nungso khaiunia nouso shiolo, naiuso nung goumchi ainou ngüso koman.

¹³Nungti lüko Israel haiüh Geshur naiuso Maaka hai tsükoman, lonyi saokü Geshur hai si Maaka hai Israel ongko noin.

¹⁴Mosaüh Levi kau hau goumchi haoson tsükiu.APAOU nou Mosa tü ngiotsünli, Israel Goa, APAOU amthang nai jahtsün chaithio ainou ngüso haoson epao noin.

¹⁵Mosaüh Reuben kau tsam- mongso hau ngüso tengkam theau goumchi haoson tsak kium.

¹⁶Ngüso goumchi (nung Arnon Tsamei thun) Aroer tü thalutkü naiuso nung tsamei nouko noitsün noknio hakü naiuso Medeba lemkü noitsün kingsuo apem mongthiokü noiküla.

¹⁷Nungko Hesbon naiuso kingsuo nai noitsün noknio Dibon, Bamod Baal, Bed Baalmeon,

¹⁸Jahaz, Kedemod, Mefad,

¹⁹Kiriathaim, Sibma, Zeredshahar tsamei mongko choithso nouso nai noitsünso,

²⁰Bedpeor, Pisga kinghok nouso naiuso Bed Jeshimod nungso noiküla.

²¹Nung mongko Hesbon nai Amor hai nokpao Sihon nokshing athum naiuso kingsuo nai noitsün noknio nouso apem mongthiokü noiküla. Mosaüh apa naiuso Midian hai nokpaohoi; Evi, Rekem, Zur, Hur, naiuso Reba nungso lüko shiolokü noiküla. Nungso apemüh Sihon nokpao thaiutha ko nokshing shing.

²²Nungso ongko Israel haiüh loattsün aküo chitetsün Beor thso nou Balam noiküla.

²³Yordan Haiu nung Reuben kau thaiutha ajenapki elung noiküla. Nung noknio naiuso noksong nouso Reuben kau tsammong nouso hau ngüso tengkamao kiutsün noiküla.

²⁴Mosaüh loüh Gad kau tsammongso hau ngüso tengkam theao goumchi haoson tsak kium.

²⁵Ngüso goumchi nou Jazer naiuso Gilead nai noknio nouso apem, naiuso Ammon hai goumchi apaitso, Rabba ajepek nai noitsün Aroer saokü,

²⁶ngüso goumchi Hesbon ainou Ramat Mizpe, naiuso Betonim saokü, Mahanaim ainou Lodebar elung saokü noiküla.

²⁷Yordan Tsamei nai Bet Haran, Betnimra, Sukkot naiuso Zafon mongthiokü noiküla. Amao nouso to Hesbon hai nokpao Sihon nokshing nouso noiküla. Ngüso goumchi ajenap elung nou Yordan Haiu naiuso ajenapki nai Galil she saokü noiküla.

²⁸Nung noknio naiuso noksong nouso Gad kau tsammong nouso hau ngüso tengkamao kiutsün noiküla.

²⁹Ajepek nai Manase kau tsammongso apaitso hau ngüso tengkam theao goumchi haoson tsak kium.

³⁰Ngüso goumchi Mahanaim saokü naiuso Bashan goumchi apem mongthiokü- Bashan nokpao Og nokshing athum naiuso Bashan nai Jair hai nok aoluok nouso apem hakü noiküla.

³¹Nungko Gilead goumchi apaitso, Bashan nai Og nokshing atengting noknio nouso Astarod naiuso Edrei lüko mongthiokü noiküla. Nung apem Manase thso Makir thsaosithsoso apaitso nouso hau kiukü noiküla.

³²Nungli tilai Mosa, Moab hai tsamei ai noiküla, apaüh Yordan naiuso Yeriko hai goumchi ajepek nai noitsün goumchi paithatkiu.

³³Lüko Mosaüh Levi hai hau goumchi haoson titso tsükiuha. Apaüh ngüso tü ngiom, asam tengkam haoson to Israel hai Goa APAOU hau chaithio kiutsün ainou theao noin.