Read Khiamniungan Naga Yihusua 14 Bible Online

Yihusua 14 - Khiamniungan Naga bible

Yihusua 14

¹Nungthanko Israel hai mongko ajenap nai noitsün Kanan goumchi titi paithatlo nung ngiolat eppe. Meson Eleazar, Nun thso Yihusua, naiuso Israel hai kau mongko tsammong ahei nousoüh ngüso haove mongko paithatkiu.

²APAOU nou Mosa tü thoilutkü taiutsünli, Yordan ajenap nai noitsün goumchi nung kau lükao naiuso Manase kau apaitso nouso hau phongde tsangkü paithatkiu.

³Mosaüh ajepek nai noitsün goumchi to amao kau nime naiuso apaitso nouso hau paithat kiuwankü noiküla.(Yosep thsaosithsoso kau nime hau thekü noiküla, nung kau nouso: Manase naiuso Efraim). Nungti lüko jangtso naiuso onnemok hoi nyimheau khengtaiu, naiuso noknio nouso mongko akih au kiuhatsün tü simkü Mosaüh Levi hai hau goumchi tengkam haoson tsükiuha.

⁵APAOU nou Mosa tü thoiluttsünli, Israel haiüh goumchi nou paithatlo.

⁶Ajekhaiu tsakko Yihuda kau ainou khaiunia ajantso Gilgal nai Yihusua dongai shin. Ngüso ongko khaiunia tsak Kaleb, sau Keniz hai nou Jefune thso noiküla apaüh Yihusua tü ngiom, “Kades Barnea nai noi taoko athaiutha naiuso jü thaiutha APAOU nou apa yathsüotsün Mosa tü ti ngiokü noiküla nung ni ngeji.

⁷Tilai APAOU yathsüotsün Mosaüh Kades Barnea ainou nung goumchi tü kautha ao ngo hong, nung taoko ngo achetpon aopüle noiküla. Ngo apa dongai ngiotsüo ngiongem kankü laokü shin.

⁸Ngü ko hakü khutsün khaiunia nou bao sam khaiunia hatat-in. Lüko ngo APAOU jü Goa da mongkiukü ang nou shioko,

⁹Mosaüh nung ngo yankü shitsün goumchi nai jüthsosoüh atsüoting tengkam eppe ta ngü tü thalokü taim.

¹⁰Lüko lo athaplu, Israel hai liutsa nai tsakei taoko, APAOU nou Mosa tü nung ngiotsün atao ainou, apaüh chitetsünli, APAOU nou nungso pon aopülekü pungo ngo aa taiukiu, naiuso athaplu, lonyi ngo pon ao- petjeikü pungo shekü noin.

¹¹Naiuso tilai Mosaüh ngü hong nung taoko lilu lonyi saokü ngo kongsimongkü noin. Ngo loüh ehliao naiuso amao ti thaiutha lünou kongsimongkü lu noin.

¹²Tilai jü khaiunia naiuso ngo ngiongem kiutsün ajekhaiu ko APAOU nou thalotsünli king goumchi nou ngü hau akiu. Tiautenai nungko Anakim hai naiuso noknio asong nouso titi dioai nou pejeikü noiküla, nung ajekhaiu ko ni lula-iu; APAOU nou chitetsünli, ngüko ha-e, naiuso ngo ngüso komanao shio-e.”

¹³Yihusuaüh Jefune thso Kaleb ouk kiu, küta Hebron noknio apa tengkam theao kiu.

¹⁴Lonyi saokü Hebron noknio nung Keniz hai nou Jefune thso Kaleb thsaosithsoso tengkam noin, tiautenai apaüh APAOU Israel hai Goa da mongkiukü naiuso angio angkü noiküla.

¹⁵Nung khako Hebron nung Arba hai noknio noiküla (Arba nung Anakim hai asongting noiküla.) Lo nung goumchi nou nokmei nai noin.