Read Khiamniungan Naga Yihusua 17 Bible Online

Yihusua 17 - Khiamniungan Naga bible

Yihusua 17

¹Yosep thso yamchong Manase thsaosithsoso naiuso tsam- mongso ajantso hau Yordan Haiu tü ajenap nai noitsün goumchi haoson tsak sonkiu. Manase thso yamchong Makir nung Gilead po noiküla, naiuso apa süpaiso lenghoi noiküla, nungtiphe Yordan tü ajepek nai noi- tsün Gilead naiuso Bashan goumchi nung apa hau sunkiu.

²Yordan tü ajenap nai noitsün goumchi nung Manase tsammong apoi nouso hau sunkiu: Ngüso nian- Abiezer, Helek, Asriel, Shekem, Hefer, naiuso Shemida noiküla. Nung Manase thsaosithso melo nouso noin, naiuso ngüso tsammong nouko aheihoi noin.

³Manase thso Makir ün thso Gilead thsao Zelofehad nung sau Hefer thso noiküla, apa tü melothso tsüchetlut, lüko menyiuthso jije lu chetlutkü noiküla. Ngüso nian- Mahlah, Noah, Hoglah, Milka, naiuso Tirzah noi- küla.

⁴Ngüso meson Eleazar si Nun thso Yihusua naiuso aheihoi nouso dongai khuküta ngiom, “APAOU nou Mosa tü sam hau naiuso sam po thansithong hau lüko goumchi tengkam haoson tsak kiuao thoilutkü noiküla.” Nungtiphe APAOU nou thoiluttsünli, ngüso hau ngüso po thansithongso hau kiutsün ko hakü goumchi tengkam kiuha.

⁵Nung shioko Manaseüh Yordan ajepek etsai noitsün Gilead naiuso Bashan goumchi ko hakü haoson che ep,

⁶tiautenai apaüh melo si menyiu thsaosithsoso apem hau goumchi haoson sunkiu. Gilead goumchi nung Manase thso apoi nouso hau sunkiu.

⁷Manase goumchi Shekem tü ajepek nai noitsün Asher ainou Mikmetha saokü noin. Nung ainou elung nung ajepekki nai Antappua khaiuniahoi monglokü sao.

⁸Tappua lemkü noitsün goumchi Manase ün noin, lüko elung nai noitsün Tappua noksong to Efraim thsaosithsoso ün noin.

⁹Loüh nung ainou elung Kana haiuthso dongai saokü noin. Haiuthso nou tü ajepekki nai noitsün noknio nouso nung Manase goumchi elung mongko noin lüko nung Efraim hai ün noin. Manase goumchi elung haiuthso nou tü ajepekki nai sung- küta nung Mediteranian Khiamnok ko lao.

¹⁰Mediteranian Khiamnok nung ngüso ajenap elung au thekü, Efraim ajepekki nai, naiuso Manase ajenapki nai ta, ngüso goumchi haoson noin. Asherüh ajenapki si ajenap nai haoson loum, naiuso Isakarüh ajenapki si ajepek nai haoson loum.

¹¹Isakar naiuso Asher goumchi haoson mongko, Manaseüh lemkü noitsün noksong nouso, haiusai nai noitsün Dor noksong, Endor, Taanak, Megiddo naiuso nung lemkü noitsün noksong nouso Beshan naiuso Ibleam ko hakü thalokü noiküla.

¹²Manase khaiuniahoi nousoüh nungso noknio nouso ko kihtsün khaiuniahoi komanao tsüshiophe, nung Kanan khaiuniahoi nouso nungtilu kihkü noin.

¹³Israel haithso shingkü iulatsün taoko lüko, ngüsoüh Kanan hai apem tsükoman, lüko Israel haiüh Kanan hai tü ngüso thaiutha chhisiya kongkü chhiao thoikü noiküla.

¹⁴Yosep thsaosithsosoüh Yihusua tü ngiom, “Ni tiauta sam hau sam tengkhaiu tengkam au goumchi haoson apaitsaklu kium? Nungko sam thatü piakü noin, tiautenai APAOU nou sam ouk kiukü noin.”

¹⁵Yihusuaüh thalakü ngiom, “Asam thatü piakü noin tünaito, naiuso Efraim king goumchi nou asam thaiutha thatü henkü naito, asamüh Periz hai si Refaim hai goumchi liutsa nai napküta asam chija asam thaiutha liutsa nou lüphonganlo.”

¹⁶Ngüsoüh thalakü ngiom, “King goumchi nou sam thaiutha thatü henkü noin, lüko tsamei nai kihtsün Kanan haiüh mokthso nou kankeitsün ehli tsamkei nouso son nou langkü nung Betshan lemkü noitsün noksong nouso naiuso Jezrel Tsamei nai kankeitsün apemüh ehli tsamkei nou kankeiji.”

¹⁷Yihusuaüh Efraim naiuso aje- nap nai noitsün Manase kau nouso tü ngiom, “Atsüoting asam piakü noin, naiuso asam thatü oukonghoi noin, nungtiphe asamüh goh haoson tsak khengai epau noin.

¹⁸King goumchi nou asam haoson noin. Nung liutsa lang noi lüko, asamüh nung phongan küta athon tsak ainou athon tsak saokü asam tengkamao noi-e. Kanan haiüh mokthso nou kankeitsün ehli tsamkei nouso son nou langkü noilüko, naiuso oukong khaiuniahoi noilüko, asamüh ngüso komane.”