Read Khiamniungan Naga Yihusua 18 Bible Online

Yihusua 18 - Khiamniungan Naga bible

Yihusua 18

¹Ngüsoüh goumchi nou shio- lokütün phiai, Israel hai hoithum Shiloh nai kamshi küta nungko APAOU noitsün Nejenkhio nou lashan.

²Loüh goumchi haoson mosonkiu hakü nou Israel khaiunia kau chinyat noiküla.

³Nungtiphe Yihusuaüh Israel khaiuniahoi nou tü ngiom, “APAOU asam paosiposo Goa nou asam hau kiutaiutsün goumchi nai asam napkü tsükihlokü asamüh atao tilektso taiu-e?

⁴Asam kau pungkü ainou khaiunia sümeme ashingsan. Ngo ngüso goumchi apem ai hongpeng küta ngüso tengkam haoson au ngüsoüh aiutsün gohthang nou thatsani-e, küta ngüso jüdongai laokü shiao noin.

⁵Ngüso ongko goumchi nou haoson chinyat ao thekü janthate: Yihuda- ajepekki goumchi nai apa haoson noi-e, naiuso Yosep ajenapki goumchi nai apa haoson noi-e.

⁶Nung ajanthat chinyat nouso thaiutha satküta jüdongai kankü ashi. Nungai ngo APAOU sam Goa tü asam thaiutha chiteküta phong nou de-e.

⁷Nungko Levi haiüh to asam amao nousoühli goumchi haoson tsüep ha-e, tiautenai ngüso haoson to APAOU ün ayathsüo mesonhoi haoson noin. Gad, Reuben, naiuso Manase kau apaitso nou to APAOU yathsüo- tsün Mosa tsangkü ngüso goumchi haoson Yordan ajepek etsai epiu.”

⁸Yihusuaüh nung ayamhan nouso ngüso hau kiuküta khaiuniahoi nouso ngüso goumchi haoson theao athatluao pengkü khu. “Apaüh ngüso tü ngiom, goh thapekkü khuküta nung lüthatsan, küta jüdongai laokü ashi. Küta ngo nung Shiloh nai asam thaiutha APAOU tü phongdekü sanglu-e.”

⁹Nungtiphe khaiuniahoi nouso goh thapekkü khuküta ngüsoüh goh nou haoson chinyat hau thekü janpek naiuso nung noksong nouso lingkü sat au tsalo küta ngüso asaothang Shiloh nai Yihusua dongai laokü khu.

¹⁰Yihusuaüh ngüso thaiutha APAOU tü sangluao phong nou de, küta Israel kau apoi nouso pungkü hau gohthang tsak tsak sonkiu.

¹¹Bejamin kau tsammongso hau goumchi haoson chongting nai sonkiu. Ngüso goumchi nung Yihuda kau si Yosep kau goumchi jetko noin.

¹²Ajenapki nai ngüso elung Yordan Haiu tü tsaloküta loüh Yeriko tü ajenapki kinghok nai sungh, naiuso ajenap nai Bethaven liutsa lang saokü king goumchi yankü noin.

¹³Nung ainou elung loüh Luz (sübao tü Bethel ta jonji) nung ajepekki nai shimkü kinghok nai khu, loüh nung ainou Asaothun Bet Horon tü ajepekki nai noitsün king Atarod Addar ai sao.

¹⁴Elung nou loüh ayam tsakai ajepekki Baal(Kiriat Jearim), sübao Yihuda kau ün noin nungai shi. Nung ajenap ainou elung noin.

¹⁵Ajepekki elung nou Kiriat Jearim athun ai yalo nou Neftoa haiuthso ai sao.

¹⁶Küta nung ainou Hinnom Tsamei tü thapthiokü kinghok nai sao, nung ajenapki Refaim Tsamei thun nai noin. Nung ainou loüh Hinnom Tsamei yankü ajepekki nai sao, nung Jebus hai dongai shinkü Eurogel saokü shin.

¹⁷Nung ainou ajenapki Enshemesh nai khuküta loüh Gelilot nai Adumim Aoyan tü lashikü nai shin. Loüh nung ainou elung Bohan Lung dongai sao(Bohan nung Reuben thso melothso tsak noiküla).

¹⁸Küta ajenapki nai Yordan Tsamei tü thapthiokü yankü khu. Nung ainou tsamei nai saokü shin,

¹⁹küta ajenapki Bet Hoglah yankü khuküta Ee Khiamnok nai tsangthiotsün Yordan Haiu shi- naptsün ko lao. Nung ajepekki elung nou noiküla.

²⁰Yordan nung ajepek elung noin. Benjamin kau tsammong nousoüh haoson eptsün goumchi elung nouso nungso noin.

²¹Benjamin kau tsammong nouso ün noknio nouso nungso noin: Yeriko, Bet Hoglah, Emek Keriz,

²²Bet Arabah, Zemaraim, Bethel,

²³Avim, Parah, Ofrah,

²⁴Kefaramoni, Ofni, naiuso Geba, nungso lemkü noitsün noksong nouso ko hakü noknio chekü nime.

²⁵Loüh nung ainou Gibeon, Ramah, Beerot,

²⁶Mizpah, Kefirah, Mozah,

²⁷Rekem, Irpeel, Taralah,

²⁸Zelah, Haelef, Jebus (nung Yiru- salem), Gibeah, naiuso Kiriat Jea- rim, nungso lemkü noitsün noksong nousoko hakü noknio chekü püle; nung Benjamin kau tsammongso tengkam eptsün goumchi haoson noin.