Read Khiamniungan Naga Yihusua 2 Bible Online

Yihusua 2 - Khiamniungan Naga bible

Yihusua 2

¹Nungai Yihusuaüh akacia asaothang ainou Kanan goumchi nai noitsün Yeriko noknio tü nyankü kautha ao khaiunia nime hong. Tilai nung khaiunia nime nou ne noknio nai shin, ngüne nungsoh nai Rahab ta niankü ajisiwop chhitsün menyiu tsak tsamai aaloau khu.

²Yeriko nokpao nou Israelhai ajantso apa shingkhannio ta kautha ao shikü noin ta lula,

³nungtiphe apaüh Rahab dongai ngio hongkü ngiom, “Atsamai noitsün khaiuniahoi nou sam shingkhannio athum kautha ao shikü noin! Nungtiphe ngüso nialokü ashi!”

⁴Rahabüh thalakü ngiom, “Khaiunia ajantso jü tsamai shikü noiküla, lüko ngo ngüso ti ainou shin tsünge. Ngüso noknio bekhan mokiapkün khako ajenap taoko khuwaniu. Ngüso tiai khuwan ngo tsünge, lüko asam ngüso phiai liukü komkü khu naito, asamüh ngüso tha au shio-e.” (Nungai Rahabüh akautha khaiunia nime nou tsamkhaiu ai nialokü sungkü apaüh nungai tsokap nou loijeikü tsangkü wan.)

⁷Noknio nai noitsün nokpao ün khaiunia nousoüh komkü khu, nung phiai bekhan nou kiapan. Ngüso Israel akauthahoi nouso tü yamkü yam sübao Yordan yankü khuji nung athang saokü khu.

⁸Akauthahoi mosaiankün khako Rahab tsamkhaiu ai sungh,

⁹küta ngüso tü ngiom, “Nung goumchi APAOU nou asam hau kiuwaniu ta ngo ngeji. Nung goumchi nouko noitsün khaiunia nouso apem asam lun hatkü noin.

¹⁰Asamüh Ijip goumchi leankü khutsün taoko asam khako Aseng Khiamnok nou APAOU nou titi janpek küta gohwai iula-in nung samüh lukü noin. Asamüh Yordan tü ajepek nai noitsün Amor hai nokpao nime Sihon naiuso Og ne titi loat nung samüh lukü noiküla.

¹¹Samüh nung ngio lunai sam hatkü noiküla; asam shioko sam monghenkü noin. APAOU asam Goa aün nai naiuso goumchi nai lüko Goa noin.

¹²Nungtiphe lo, ngo asam tü tsüojinkü kankeikü shitsünli, asamüh jü tsammongso ta atsüojin hanau naiuso ngü hau ngiotsüo ii tsak kiuao APAOU nianko ngü tü ngiomong shinge ashan ta ngo asam tü kojaji.

¹³Naiuso jüpo, jünyiu, jü deisinioso, jü nuosinioso, naiuso ngüso tsammongso apem asamüh kipsane ta ngü tü athalo! Sam laloatani!”

¹⁴Khaiunia nime nou Rahab tü ngiom, “Samüh ngiotsünli samüh tsüchhikü naito, Goa nou sam aa nou lülowan! Samüh ti chhikü noiküla, nung thaiutha ni sauhau tsüchitekünaito, samüh nung ni tü thaloji, APAOU nou tilai sam hau nung goumchi nou kiu-e, samüh ni meikü kankei-e.”

¹⁵Rahab tsam nung noknio lungbe tü lalutkü noiküla, nungtiphe apaüh nung khaiunia nime nou koukhan- thso nou tsangkü aochan tsak tü shetkü sao-i.

¹⁶Apaüh ngiom, “King goumchi nai lükhuwan” “tsüdekünai- to, nokpao khaiunia nousoüh asam epla-e. Nungai ngüso molaoshikün lektso ajekhaiu samnyi lünoi. Nung phiai asam meshen yamai khuau shio-e.”

¹⁷Khaiunia nime neüh nung menyiu tü ngiom, “Ni sam hau thalou-itsün athalou-e nou samüh taiu-e.

¹⁸Tilai samüh nung noknio kome, nung aochan aseng sam saokhu-itsün koukhanthso nai phankü ataiu. Apo si anyiu, adeisinioso, naiuso apo tsammongso apem, atsamai akamshi-i. Ni nung titilünou chhiau noin.

¹⁹Khaiunia ajantso tsam ainou khuwan nai, apa eantsün thaiutha apalu aphio noi-e, lüko niko tsamai noitsünso ongko ajantso tawai naito, nungto sam thsale noi-e.

²⁰Lüko sam chhisiya thaiutha ni sonngap tsütsamkünaito, nungai ni sam ta ngiomong shingekü thaloutsün thaiutha sam aphio tsünoi-e.”

²¹Nung menyiu nou mong- chiokü thalouküta ngüne hongan. Ngüne khuwan phiai menyiu nou apa koukhanthso nou ta aochan aseng nou phanlutkü taiu.

²²Akautha khaiunia nime ne king nai khukü paman. Nokpao khaiunia nousoüh ngüne tü chenpa nok thapekkü samnyi yam, lüko ngüsoüh nung akautha khaiunia nime ne tsüepsan, nungtiphe ngüso Yeriko ai laokü shin.

²³Nungai akautha khaiunia nime ne king ainou saoküta Yordan Haiu yankü khuküta Yihusua dongai laokü shin. Ngüneüh Yihusua hau athawaotsün alum chite,

²⁴kü ngiom, “APAOU nou sam hau nung goumchi apem kiuwaniu ta sam monglamji.” Nungai noitsün khaiunia apem sam lun hatkü noin.