Read Khiamniungan Naga Yihusua 22 Bible Online

Yihusua 22 - Khiamniungan Naga bible

Yihusua 22

¹Nungphiai Yihusuaüh Yordan Haiu Reuben kau, Gad kau, naiuso ajepek etsai loutsün Manase kauso jonkam.

²Apaüh ngüso tü ngiom, “APAOU yathsüotsün Mosaüh asam tü thoiluttsün chhisiya alum asamüh chhikü shi-iu, naiuso asamüh ngo thoiluttsün apem angio angkü kankei-iu.

³Nung atao chikü nouko asamüh jamtso Israel hai meshen khaiuniaso leankü tsükhu. Asamüh asam APAOU Goaüh thoilut- tsün paotsangkü naiuso angio angkü shikü noiküla.

⁴Lo, apaüh asam tü thalotsünli, APAOU asam Goaüh asam deisinioso hau aalo nou kiuwaniu. Nungtiphe Yordan yankü APAOU yathsüotsün Mosaüh asam hau kiutsün meshen goumchi teng- kam haoson ai asam laokü lükhu.

⁵APAOU asam Goa tsüojinao, apaüh mongchiotsün chhiao, apa athoilut nouso angio angao apa tü mong saitha noiao, naiuso asam naiuso onthso apem nou apa yathsüoao, Mosaüh asam tü thoiluttsün ngiokhem nou atsüoting angio angkü lüthe.”

⁶Yihusuaüh nung ngio nouso naiuso ouk nouso kiukü ngüso goumchi ai hongan. “Asam goumchi ai asam thsüokü memeikü tsamsigoh thainian piakü hakü, chaiou lakkeng naiuso tangkason taiukü, taosonlung son taiukü, son naiuso neshe naiuso apiating taiukü, asam goumchi ai laokü yaji. Asam ehso ainou asamüh tilüsong thalokü noin, nung asam meshen khaiuniaso hau lüko lüpungha.” Küta ngüso, ngüso goumchi ai laokü ya-an. Manase kau apaitso hau Mosaüh Yordan ajepek nai goumchi haoson kium, lüko apoitaiu apaitso kau nouso hau to amao kau nouso ko aikü Yordan ajenap nai Yihusuaüh kium.

⁹Nungtiphe Reuben naiuso Gad kauso, naiuso ajepek nai noitsün Manase kau apaitso nouso ngüso goumchi ai laokü khuwan. Ngüsoüh Israel khaiunia apoi nouso Kanan goumchi Shiloh ta jontsün athang tsak nai lean küta Gilead ün goumchi APAOU nou Mosa tsangkü ngüso tü thoiluttsünli, ngüso tengkam goum- chi haoson lokü khuwan.

¹⁰Tilai Reuben naiuso Gad kauso, naiuso Yordan ajepek nai noitsün Manase kau apaitso nousoüh Gelilot nai shisaom, ngüso losaokü nouko Yordan ajenap nai noiphe, ngüsoüh Yordan Haiusai nai amthang tsak aluao meikü songkü lashan.

¹¹Nungai Israel khaiunia amao apoi nousoüh ngiom, “Anglu! Reuben naiuso Gad kauso naiuso ajepek nai noitsün Manase kau apaitso nousoüh Gelilot nai sam dongai nai amthang tsak lahsaniu!”

¹²Tilai Israel khaiuniahoi nousoüh nung lula, ngüsoüh ajepek nai thalotsün kau nouso thako ehli khuau hoithum Shiloh nai aikü kamshi.

¹³Nungai Israel haiüh Phinehas, meson Eleazar thso nung Reuben naiuso Gad kauso naiuso ajepek nai noitsün Manase kau apaitso nouso noitsün Gilead goumchi nai hong.

¹⁴Nungai ajenap nai thalotsün kauso, tsammong naiuso kau nai ahei nouso kau pungkü ashehoi khaiunia che Phinehas ko khuha.

¹⁵Ngüso Gilead goumchi nai Reuben naiuso Gad kauso, naiuso ajepek nai noitsün Manase kau apaitso nouso noitsün dongai shiküta,

¹⁶APAOU khaiunia keihoithum thaiutha chitekü ngüso kau süme nouso tü ngiom, “Israel ün Goa thako asamüh nung chhisiya tsümeikü tiau chhin? Nung amthang asam thaiutha lahsantsün tsangkü asamüh APAOU thako khengshi-iu!.

¹⁷Tilai APAOU nou Peor nai apa khaiuniaso imkia tsangkü angja-in, sam angei lüyangsan? Sam lonyi saokü nung shioko angjaji. Nungh angei nou tsü om süne?

¹⁸Asamüh lo apa phiai hoilutao nanji süne? Asamüh lonyi APAOU thako khengshi naito, lühom khaiunia pungküta mongmate.

¹⁹Naito lo, asam goumchi amkham shanao tsütin tsümai tünaito, apa Nejenkhio noitsün APAOU ün goumchi nai ashian. Sam ko aikü goh ajantso asaolo. Lüko APAOU sam Goa amthang chiai amao amthang tsak shantsün tsangkü sam naiuso APAOU thako khengshiao lahsan.

²⁰Lothekü wananao nou jengtsaiu thaiutha ko athoiluttsün angio tsüangkü Zera thso Akhanüh titi chhin nung lüyangsan; nung shioko Israel hoikamthum angja kiukü noiküla. Apa angei shioko eantsün Akhan pemsalu tsüdekü noiküla.”

²¹Reuben naiuso Gad thsoso naiuso ajepek nai noitsün Manase kausoüh kau ahei nouso tü thalakü ngiom,

²²“Akongting tsak nou to Goa noin! Apa APAOU nou noin! Samüh tiauta nung chhisiya chhin apaüh ngeji, naiuso asamüh lüko nung ngeau samüh mongchiotsün noin! Samüh khengshi küta APAOU tü amonglam tsütaiukü naito, loto sam aa lataiushi!

²³Samüh APAOU tü angio tsüangkü ajahtsün chaithio kiuao, khülam chaithio kiuao tsüdekünai aalo chaithio kiuao sam chija amthang lashankü noi naito, APAOU apa chija sam hau angja akiu.

²⁴Samüh nung chhitsün tiautenai ashiao taoko asam thsaosithsosoüh, ‘Israel hai Goa ko asam ti haoson tsünoi ta ngio-e, nung shioko samüh nung chhin.

²⁵Apaüh sam naiuso asam, Reuben si Gad khaiunia jetko Yordan Haiu nung elung tsak shankü noin. APAOU nouko asam haoson ti tsünoi.’ Küta athsaosithsosüh jü thsaosithsoso APAOU amkhamtsün ko lolaokü wanane.

²⁶Nungtiphe samüh chaithio jahkü tsüthioau tsüdekünai chaithio tsükiuao amthang tsak lashan,

²⁷lüko nungliko sam naiuso asam khaiunia thaiutha iilotsün tsakli taiuao, naiuso sam phiai shitsün vetao nouso thaiutha, asio Nejenkhio khako, sam chaithio nouso jah au, loatkü thioau, naiuso aalo chaithio nouso thiokü samüh atsüoting APAOU tü amkham ta hane. Nung chhi nou athsaosithsosoüh sam thsaosithsoso tü APAOU ko asam haoson ti tsünoi ta ngioau noitsün tsüngio-iau noin.

²⁸‘Athaplu! sam paosiposoüh APAOU ün amthang khekkü amthang tsak shaniu, ta sam thsaosithsosoüh ngioau shiokü hau, nungli thawao shinaito, ta nung sam ayang noiküla. Nungto apa chaithio, tsüdekünai aloat chaithio kiuao thaiutha tsüde, lüko sam khaiunia si asam khaiuniaso iilotsün tsakli noin.’

²⁹Samüh lo latsün amthang nou to khülam chaithio, aloat chaithio tsüdekünai atsüoting APAOU tü khengshiao thaiutha tsüde. APAOU sam Goa amthang apa hatsün Nejen- khio khako noitsün tü simkü, samüh amao amthang titso tsülahsane.”

³⁰Meson Phinehas, naiuso apa ko hoikam aheihoi che nousoüh Reuben si Gad naiuso ajepek nai noitsün Ma- nase kau apaitso nousoüh ngiotsün lulanai, ngüso mongtsamkü noiküla.

³¹Meson Eleazar thso Phinehasüh ngüso tü ngiom, “APAOU nou samko hakü noin ta lo samüh ngeji. Asamüh apa thako tsükhengshi nungtiphe asam Israel ün APAOU nou angja kiuao noitsün ainou kipsaniu.”

³²Nungai Phinehas naiuso aheihoi nousoüh Reuben si Gad naiuso Manase kau apaitso nouso Gilead goumchi nai lean küta Kanan nai laokü yakü Israel khaiuniaso hau nung ngio nou chiten.

³³Israel hai mongtsamkü iula küta Goa hau nianlom kiu. Loto ngüso Reuben kauso naiuso Gad kauso komheao tsüngemshi.

³⁴Reuben si Gad khaiuniasoüh ngiom, “APAOU nou Goa noin ta sam apem tü mithali nung amthang nou tsak noin.” Nungtiphe ngüsoüh nung tü “Mitha” ta jon.