Read Khiamniungan Naga Yihusua 23 Bible Online

Yihusua 23 - Khiamniungan Naga bible

Yihusua 23

¹Atao laiukü khukütün phiai APAOU nou Israel hai hau ngüso lemkü noitsün ehso ainou aalo kium. Nung taoko naito Yihusua thatü sonankü noiküla.

²Nungtiphe apaüh Israel hai ahei hoi, petche hoi, naiuso asong hoi, apem jon, küta ngiom, “Loto ngo thatü sonnaniu.

³Asam shioko APAOU asam Goaüh nung mele nouso apem tü alum chhisiyakü shitsün asamüh epiu. APAOU asam Goa asam thaiutha ko eh likiukü shin.

⁴Ajepek nai Yordan Haiu ainou ajenap nai Mediteranian Khiamnok saokü, ngo shiolokü shitsün apem, naiuso loüh goh mopaithatkü poitaiutsün ngo mele nouso naiuso kau nouso hau goumchi tengkam theao haoson janthatkü kiuwaniu.

⁵APAOU asam Goaüh ngüso asam hau koman kiu-e, naiuso asam khutsün ko apaüh ngüso komane. APAOU asam Goaüh asam tü thalotaiutsünli, asamüh ngüso goumchi thalo-e.

⁶Nungtiphe Mosa ün Ngiokhem thsam nai tilüsong satkü taium nungso ngio tsüokü angkü lüthe. Haoson tsaktso yaang lawanan,

⁷naiuso asam ongko poikü taiutsün nungso mele ko lalao-e, tsüdekünai ngüso goa nian lajonha, ngüso ko ngiomong shinge lashan, ngüso layathsüo, naiuso ngüso khako asam kaukü lanap,

⁸nungliko to, lonyi saokü nouko asamüh chhikü shitsünli APAOU tsüleankü lünoi.

⁹Tiautenai APAOU nou asam khako oukong naiuso mele asong nouso koman, naiuso lonyi saokü nouko khaiunia sauühtso asam khako asam ta jeishiao tsüshio.

¹⁰Apaüh thalokü taiutsünli, asam khaiunia tsaküh lüko khaiunia heng tsak komanau shio-e, tiautenai APAOU asam thaiu- tha eh likiuji.

¹¹Nungtiphe APAOU asam Goa tsüojinao thatü tsüokü lüthe.

¹²Asam mong tsükiukü, asam ongko poikü taiutsün mele nouso ko, lao-ekü khuwankü naiuso ngüso ko haiyamekü iula naito,

¹³Goa nou asam kha ai khutsün taoko nung mele nouso tsükoman kiushi-e ta asamüh lüyang. Nungko asam thaiutha ngüso ahat ao tsak, naiuso jin tsak, tsüdekünai khanthop tsakli noi-e, naiuso nung asam ngamtha ai shiohtsün aochan tsakli, tsüdekünai asam niovei ai tsao naptsünli noi-e. Naiuso nung APAOU asam Goaüh asam hau kiutsün goumchi amei nai asam apem mothamowankün lektso angja noi-e.

¹⁴“Loto jü thaiutha eao atao shisao-iu. APAOU asam Goaüh thalo- taiutsünli, ameiting nouso apem asam hau kiu-e ta asam khaiunia pungkü nou meshen mongüh naiuso onthso nou ngekü noin. Apaüh athalotsün tsaktso tsüphiokü chhikü shin.

¹⁵Apaüh asam tü thalotaiutsün alum chhikü shitsünli, nungtilu apüh alohat chhisiya lüko alum thawao- i-e.

¹⁶APAOU asam Goaüh asamüh kankeiao thoiluttsün athalou-e asamüh tsükankeikünaito, naiuso asamüh amao goa nouso amkhamkü yathsüo naito, apa amongmat nou asam hau angja kiu-e, naiuso asam hau kiutsün nung goumchi amei nai asam tsaktso tsüpoitaiukü liukü mowane.”