Read Khiamniungan Naga Yihusua 24 Bible Online

Yihusua 24 - Khiamniungan Naga bible

Yihusua 24

¹Yihusuaüh Israel kau apem Shekem nai jonkam. Apaüh petche hoi, ahei hoi, mikhem hoi, naiuso Israel hai asong hoi apem jon, nungai ngüso apem Goa khako shin.

²Apaüh khaiunia apem tü ngiom, “APAOU Israel Goaüh ngioau noitsün nung noin: ‘Atao laiukü khu-iu, asam paosiposoüh Eufrates Haiu etsai kihkü amaohai goa nouso tü amkü yathsüo. Nung ongko Abraham naiuso Nahor po asam pao Tera noiküla.

³Nungai ngo asam paosipo Abraham Eufrates haiu yankü noitsün goumchi ainou nialokü shikü, ta apa Kanan goumchi athum yankü nialükhun. Ngo apa hau thsaosithso piakü kium, Ngo apa hau Isak kium,

⁴naiuso Ngo Isak hau Yakob naiuso Esau kium. Ngo Esau hau Edom hai king goumchi nou apa tengkamao kium, lüko asam paosipo Yakob naiuso apa thsoso Ijip nai saowan.

⁵Nung phiai Ngo Mosa naiuso Aron hong, naiuso Ngo Ijip khako angja asong kankü shin, lüko Ngo asam nung ainou niasan.

⁶Ngo asam paosiposo Ijip ainou niasan, naiuso Ijip haiüh ngüso tü mokthso nou tenkeitsün ehli tsamkei naiuso ehli süpai nousoüh komkü noiküla. Lüko tilai asam paosiposo Aseng Khiam nai nap,

⁷ngüsoüh Ngü tü ahachu thaiutha wekü noiküla, naiuso Ngo ngüso si Ijip hai jetko anyakhem nou taiukiu. Ngo khiam nou Ijip hai khütha ai meanlokü shi-i küta ngüso limattan. Ngo Ijip tü ti chhin nung asamüh ngeji.’” “‘Asam liutsa nai atao laiukü tsakeiküla,

⁸Nungai Yordan ajepek nai noitsün Amor hai goumchi ai Ngo asam nialokü shin. Ngüso asam ko ehli, lüko Ngo asam hau ngüso khako ashiolotsün kium. Asamüh ngüso goumchi thalo, naiuso asam kha ai khu nai Ngo ngüso lomokiu.

⁹Nungai Moab nokpao Balak thso Zipor asam thako ehli ao tsalo. Apaüh Beor thso Balam dongai asam tü athesan kiuao thaiutha ngio hong.

¹⁰Lüko Ngo Balam ngio tsüang, nungtiphe apaüh asam ouk kiu, nungti Ngo asam Balak ainou kipsan.

¹¹Asamüh Yordan yanküta Yeriko ai shin. Amor hai, Periz hai, Kanan hai, Hit hai, Girgas hai, Hiv hai, naiuso Jebus hai, naiuso Yeriko khaiuniahoi nouso asam thako ehli tsalo, lüko Ngo ngüso apem khako asam hau ashiolotsün kium.

¹²Asam kha ai khutsün taoko, Amor hai nokpao nime komanao thaiutha ko Ngo ngüso lekkat-ikü taiuwan. Nung tü asam salaiu naiuso oukop tsangkü li-e ao ti tsünoiküla.

¹³Ngo asam hau asamüh tilaitso tsüshankü nou goumchi naiuso tilaitso tsüshankü nou noknio nouso kium. Loto asam nungai noikü sainao ainou sainao- shep asamüh tsüthomkü nou, naiuso asamüh tsülethiokü nou Olip pai nouso ainou olip shep nou heji.’”

¹⁴Nungai loto, ta Yihusuaüh tsü- laokü ngiom, “asamüh APAOU asulühat naiuso ngiotsüo naiuso atsüoting nou apa lüyathsüo. Asam paosiposoüh Mesopotamia nai naiuso Ijip nai amkhamtsün goa nouso ainou pungekü lünoi, küta APAOU lu lüyathsüo.

¹⁵Asamüh apa yathsüoau tsümongchio naito, asam paosipo- soüh Mesopotamia nai amkhamtsün goa nouso tsüdekünai asam lo kihtsün goumchi Amor hai goa nouso sübao tü asamüh amkhame nung lonyi lu lüshinglo. Lüko ngo naiuso jü tsamkhaiuüh to sam APAOU yathsüo-e.”

¹⁶Khaiuniahoi nousoüh thalakü ngiom, “Samüh amao goa nouso yathsüoau sam Goa APAOU tilaitso tsüleane!

¹⁷APAOU sam Goaüh sam poso, naiuso sam Ijip sua aküo ainou niasan, naiuso samüh apaüh chhitsün athanga nouso epiu. Samüh tilüsong mele nouso yankü shikü noin, nung apem ko apaüh sam kipsankü taiu.

¹⁸Nung goumchi ko sam shinap nai, APAOU nou Amor hai sauhai nungko kihkü noiküla nungso apem koman. Nungtiphe samüh APAOU yathsüo-e, apa sam Goa noin.”

¹⁹Yihusuaüh khaiuniahoi nouso tü ngiom, “Lüko asamüh APAOU yathsüoau tsüshio-e. Apa asio Goa noin, naiuso asam angei awan tsükiu-e. Apaüh akhengshitsün amao titso jeitaiuao tsüshio-e,

²⁰naiuso asamüh gohmao goa nouso yathsüoau apa wankü khunaito, apa asam thako laoshi-e naiuso asam hau angja kiu-e. Apa asamko nung khako meikü noilüko, apaüh asam lomowane.”

²¹Khaiuniahoi nousoüh Yihusua tü ngiom, “Tsüde, samüh APAOU yathsüo-e.”

²²Yihusuaüh ngüso tü ngiom, “Asamüh APAOU yathsüo-e ta cholo- tsün ngiotsüo thaiutha asam lu asam mitha pem noin.” Ngüsoüh thalakü ngiom, “Ah,” “Sam lu sam mitha noin.”

²³“Nungaito, asamüh taiutsün gohmao goa nouso ko pungekü lünoi.” “Küta asam mongyang APAOU Israel ün Goa hau thumkü saitha kiuwanao lüthalo.” Ta apaüh koja.

²⁴Nungai khaiuniahoi nousoüh Yihusua tü ngiom, “Samüh sam Goa APAOU yathsüo-e, samüh apa athoilut nouso angio angkü the-e.”

²⁵Nungtiphe Yihusuaüh nung aje- khaiuko khaiuniahoi nouso thaiutha ko athalou-e tsak shan, küta nung Shekem nai apaüh ngüso hoilutao ngiokhem nouso naiuso ayamhan nouso kium.

²⁶Nung athoilut nouso Yihusuaüh Goa ün ngiokhem thsam nai satkü taiu. Nungai apaüh lung asong tsak loküta APAOU amthang shimkü lampai tsak khemko nung kihkü taiu.

²⁷Apaüh khaiunia apem tü ngiom, “Nung lung nou sam mitha noi-e. Nungko APAOU nou sam tü chitetsün ngio apem lulakü noiküla. Nungtiphe nung lung mitha nou asam Goa thako khengshitsün ainou lolaokü taiuao asam thaiutha mitha tsak noi-e.”

²⁸Nungai Yihusuaüh khaiuniahoi nouso wonan-iküta khaiunia pungkü momo goumchi ai laokü khu.

²⁹Nung phiai APAOU ün ayathsüo Nun thso Yihusua aakihlaiu pon 110 kihkü ean.

³⁰Ngüsoüh apa Gaar, Efraim king goumchi Timnat Sera nai apa tengkhaiu goumchi nai khanan.

³¹Yihusua aa kihtsün lektso, Israel haiüh APAOU yathsüokü shin, naiuso apa ean phiai lüko aheihoi sauhaiüh Israel hai thaiutha APAOU nou alum chhitsün epkü shin ngüsoüh lüko ngüso aakihlaiu thathunkü APAOU yathsüo.

³²Yosep mea nung Yakobüh Shekem po Hamor thsoso ko tangkason apai tsomtsaküh tuhtsün goh Shekem nai Israel haiüh Ijip ainou kankü shiküta khanan. Nung goh nou Yosep thsaosithsosoüh tengkam epkü noiküla.

³³Aron thso Eleazar ean küta apa thso Phinehas hau kiutaiu nou Efraim king goumchi noksong Gibea nai khanan.