Read Khiamniungan Naga Yihusua 4 Bible Online

Yihusua 4 - Khiamniungan Naga bible

Yihusua 4

¹Tilai Israel mele apem nou Yordan yankü khu, APAOU nou Yihusua tü ngiom,

²“Khaiunia chekü nime kau pungkü ainou tsak tsak achosan,

³küta mesonhoi tsakü noitsün Yordan Haiuwem ainou lung chekü nime ajüonlo ta lüngio. Nung lung nouso kankü theküta lüsoh asam tiko shamane nungko kikü ataiu ta lüngio.”

⁴Nungai Yihusuaüh apaüh chosantsün khaiunia chekü nime nouso ta jonkü ngiom,

⁵“Yordan Haiu nai APAOU asam Goa ün Athalou-e Ngiokhem Paidan khako lükhu. Asam khaiunia pungkü nou Israel kau pungkü thaiutha lung tsak tsak momo sangdongkhaiu ai apilo.

⁶Nung lung tsangkü khaiuniahoi nouso tü APAOU nou ti chhin nung yangsani-e. Ashiao taoko tilai asam thsosoüh nung lung athat nou ti ta asam tü sange,

⁷asamüh ngüso hau tilai APAOU ün Athalou-e Ngiokhem Paidan nou pikü haiu nou yankü khu, nungai Yordan Haiu tsangtsün laowan ta chite-e. Nung lung nouso tsangkü Israel khaiuniahoi tü nung athang nai ti thawaokü noiküla nung asaita yangsani-e.”

⁸Khaiuniahoi nou Yihusua ngio tü hoilutkü noiküla. APAOU nou Yihusua tü thoiluttsünli,

⁹ngüsoüh Yordan Haiuwem ainou lung chekü nime Israel kau pungkü thaiutha juonlo, küta nung ngüso shamtsün athang nai kankü khukü ngüsoüh nungai kikü taiu. (Nung lung nouso lonyi saokü noin.)

¹⁰APAOU nou Yihusua tü khaiuniahoi hau chhisiya au thoi- luttsün alum mochhikhemkün lektso mesonhoi nouso Yordan Haiuwem ko tsakü noiküla. Nung Mosaüh thoiluttsün noiküla. Khaiuniahoi nou liuliukü haiu yankü khu.

¹¹Tilai ngüso apemüh haiu etsai shisao, mesonhoi nouso APAOU ün Athalou-e Ngiokhem Paidan pikü khaiuniahoi nou khako khu.

¹²Reuben kau, Gad kau, naiuso Manase kau apaitso nouso tü Mosaüh achhiao ngiotsünli, ngüso amao kau nouso khako khukü ehliau khemlokü noiküla.

¹³APAOU khako khaiunia heng aopüle thatso ehliau khemloküta Yeriko shimkü tsamei nai khu.

¹⁴Nung ajekhaiu ko APAOU nou chhitsün tsangkü Israel khaiuniahoi khako Yihusua asong khaiunia tsak ta wesani. Ngüsoüh Mosa hau asuhat kiukü shitsünli, Yihusua hau lüko apa aakihlaiu chikü asuhat kiukü noiküla.

¹⁵Nungai APAOU nou Yihusua tü ngiom,

¹⁶Athalou-e Ngiokhem Paidan pikü noitsün mesonhoi nouso tü Yordan haiu ainou asungan ta ngioau thoilut.

¹⁷Yihusuaüh angio- tsünli chhin,

¹⁸nungai tilai mesonhoi nousoüh haiukuk nai shisaom, khiam nou loüh tsangshiao yalokü nung haiukuk saokü ayanai lilu tsangkü iula.

¹⁹Khaiuniahoi nou Yordan Haiu nung chongting alei ajekhaiu chenyi nai yanshi küta Yeriko ajepek Gilgal nai shaman.

²⁰Nungai Yihusuaüh Yordan Haiu ainou juonlotsün lung chekü nime nouso kikü taiu.

²¹Apaüh Israel khaiuniahoi nouso tü ngiom, “Ashiao taoko tilai asam thsosoüh nung lung nouso athat ti ta sangnai,

²²asamüh ngüso hau Yordan Haiu nung gohwai nai yankü khutsün atao thaiutha chiteao noin.

²³Apaüh asam hau Aseng Khiamnok loapkiutsünli, asamüh Yordan Haiu moyanlükhunkün lektso APAOU asam Goaüh khiam nou apkü iula-i ta ngüso hau lüchite.

²⁴Nung tsangkü goumchi khaiunia apem nou APAOU oukong titi asong noin nung nge-e, naiuso asamüh APAOU asam Goa athon tsüyangkü asuhatkü noi-e.”