Read Khiamniungan Naga Yihusua 5 Bible Online

Yihusua 5 - Khiamniungan Naga bible

Yihusua 5

¹Yordan ajenap nai noitsün Amor hai nokpaohoi naiuso Meditera- nian khiamnok sai nai noitsün Kanan hai nokpao nousoüh Israel haiüh Yordan Haiu moyanlükhun- kün lektso APAOU nou khiam apkü shankiu ta lula. Nungai ngüso Israelhai lun hatkü naiuso monghenkü iulan.

²Nungai APAOU nou Yihusua tü ngiom, “Ni sathso ajantso monkü lüshan küta Israel thsoso lütippan.”

³Nung APAOU nou thoiluttsünli Yihusuaüh chhin, küta nungh atipantsün king ta jontsün athang tsak nai apaüh Israel haithso hau tsashethun tipankiu.

⁴Tilai Israel khaiuniahoi nousoüh Ijip wankü khu, melohoi apem tipankü nouso noiküla. Pon aopüle chikü ngüso liutsa lang yankü tsakei nai atao wanan, nung taoko melothso tsak tü tso tsashethun tsütipankü noiküla. Loüh nung pon aopüle nou thon kü shinai, melo apem Ijip nai tsalokü shitsünso sauhai ehli eiuao omkü noiküla, ngüso apem eankhem, tiautenai ngüsoüh APAOU ngio tsüang. Apaüh shanlotsünli, apaüh ngüso paosiposo tü thalotaiutsün memei naiuso atsüomei goumchi nai ngüso tsünapi.

⁷Nung khaiuniahoi thsoso tilaitso motipankü noiküla, naiuso nung weyan nouso Yihusuaüh tipankiutsün yamai chettsünso noiküla.

⁸Atipantsün chhisiya khemküta, kau nouso pem mou momeilokün lektso asaothang nai noi.

⁹APAOU nou Yihusua tü ngiom, “Lonyi ngo asam Ijip sua amiam nai noikü shitsün asam ainou lowan kiuji.” Nung shioko nung athang tü Gilgal ta jon, nung nian lonyi saokü noin.

¹⁰Israel hai Gilgal tsamei nai Yeriko shimkü noi taoko ngüsoüh alei nouko ajekhaiu chekü pülenyi nai asham Aasantsün Sümai saohekü noiküla.

¹¹Nungthan ajekhaiu nou ngüsoüh Kanan nai sungtsün chisikhiam heshiutsün chongting noiküla; nungai khülam in nai ekkü, naiuso phoplao tsüthiokün themtsai hekü noiküla.

¹²Nung taoko yakü manna sa-itsün laowan, naiuso Israel haiüh loto nung tsüepshi. Nung atao nai yaküto ngüsoüh Kanan nai sungtsün chisikhiam heshiu.

¹³Yihusua, Yeriko dongko noi taoko, apaüh alekta apa khako khaiunia tsak sahlaiu semkü tsanoikü ep. Yihusuaüh nung khaiunia dongai sungküta sangkü ngiom, “Ni sam süpai ongko tsak süne, tsüdekünai eh tsak noin?”

¹⁴Nung khaiunia nou thalakü ngiom, “Nung ne tsak lüko tsüde,” “Ngo nungko APAOU ün süpaihoi ahei tsak noin.” Nungai Yihusuaüh apa kha gohai kauthiokü am küta ngiom, “Ngo ni yathsüotsün noin. APAOU, ni ngü hau ti chhi-iau aiuji?”

¹⁵Nungai APAOU ün süpaihoi ahei nou apa tü ngiom, “Ahok khut angiosanan, tiautenai ni tsakü noitsün goh nou asio noin.” Nungai Yihusuaüh apa tü ngiotsünli chhikü noiküla.