Read Khiamniungan Naga Yihusua 6 Bible Online

Yihusua 6 - Khiamniungan Naga bible

Yihusua 6

¹Israelhai tsünapiao thaiutha Yeriko bekhan nouso kiapküta ehükü wan. Nung noknio nai sau napao tsüshio, tsüdekünai ashi- khuau lüko tsüshiokü noiküla.

²APAOU nou Yihusua tü ngiom, “Ngo Yeriko noknio ün nokpao naiuso apa ün akong süpaihoi nouso hakü aphamongai kiuwanji.

³Ni naiuso asüpaisoüh nyitso jam nung luoknyi ngoikü nung noknio lemkü tsakeiao noin.

⁴Nungko meson chinyat nou amattsün jangong tsak tsak semkü, Athalou-e Ngiokhem Paidan khako khuau noin. Chinyatnyi nouko nai ni naiuso asüpai hoisoüh noknio nou chinyatjam lemkü tsakei-e, nung taoko meson nousoüh jangong nou mate.

⁵Asamüh nung lulatsünko ai- kü, khaiunia chikü nou sang songkü weao noin, nungai noknio lungbe nou loiane. Nungko süpai hoithum noknio mongai saitha nappe.”

⁶Yihusuaüh meson nouso jonküta ngüso tü ngiom, “Athalou-e Ngio- khem Paidan nou apilo, naiuso jangong mattsün semkü asam khaiuniapem chinyat nung Paidan khako lükhu.”

⁷Nungai Yihusuaüh apa khaiuniaso tü APAOU ün Athalou-e Ngiokhem Paidan nou khako ehü nou hakü khukü noknio nou lemao ngiokhem kiu.

⁸Nungtiphe Yihusuaüh ngiokhem kiutsünli, khachung ehü nousoüh mesonhoi sauhai jangong matkü noiküla nungso shelakü kha ai khu; nung phiko Athalou-e Ngiokhem Paidan pitsün meson nouso, loüh nungtü sahsingio suntsün ehü nouso hoilut. Nung atao chikü nouko jangongmattsün tsülaokü noiküla.

¹⁰Lüko Yihusuaüh apa khaiuniaso tü, apaüh ti ngio mongiokün lektso sang songkü tsüweao ngiokhem kiu.

¹¹Nungtiphe apaüh nung khaiuniahoi nouso ta APAOU ün Athalou-e Ngiokhem Paidan nou piulokü ta noknio nou jam lemao kium. Ngüso laokü shikü nungsoh ngüso saothang nai noi.

¹²Nungthan nyap nai Yihusua shakta chuo, naiuso meson nouso si süpai nouso nung thaiu ajekhaiu nouko nai lilu noknio nou lemkü atao müjam nou thaiutha tsakei, Chongting nai ehü nouso, nungthanko jangong chinyat mattsün meson nouso, nungthanko, APAOU ün Athalou-e Ngiokhem Paidan pitsünso, athonting nai sahsingio semtsün ehü nouso hoilut. Nung atao chikü nouko jangongmat tsülaokü matkü noiküla.

¹⁴Ajekhaiu nenyi nouko naiüh ngüsoüh noknio nou jam lemkü tsakei küta asaothang nai laokü shin. Ngüsoüh nungli ajekhaiu luoknyi noknio nou lemkü tsakeikü noiküla.

¹⁵Chinyatnyi nouko ashiochan chuoküta noknio nou chinyatjam lemkü tsakei- ngüsoüh noknio nou lemkü chinyatjam tsakeitsün nung ajekhaiu kolu noiküla.

¹⁶Chinyatjam lem nai, tilai meson nousoüh jangong matngemao noiküla, Yihusuaüh apa khaiuniaso tü sang songkü weao ngiokhem kiukü ngiom, “APAOU nou asam hau noknio nou kiuwaniu!

¹⁷Nung noknio naiuso nungko noitsün alum APAOU hau chaithio kiutsün tsakli moisemkü lotheanao noin. Ajisiwop menyiu Rahab naiuso apa tsammongso lu poitaiuao noin, tiautenai apaüh sam ün akautha nouso tsangkium.

¹⁸Lüko asamüh nung noknio nouko lotheanao noitsün jengtsaiu titso tsüloau noin, asamüh nung lo naito, asamüh Israel hai thso khütha nai angja naiuso alothe nou kankü shi-e.

¹⁹Chaiou lakkeng, tangkason, taosonlung, tsüdekünai son nou shantsün alum jengtsaiu APAOU thaiutha mothikü taiuwan. Nungso to APAOU ün chaitaiutsün nai kamtaiuao noin.”

²⁰Nungtiphe meson nousoüh jangong nou matnai, khaiunia nou- soüh nung sang lula si lula, ngüsoüh sangh asong nou we, naiuso lungbe nou loian. Nungai Süpaihoi chikü saitha sungküta noknio nai nap naiuso nung thalo.

²¹Ngüso salaiu nou nung noknio nai noitsün melo si menyiu, asong si ehen khaiunia apem loat, nungko hakü jangtso, onnemok, naiuso gado nouso lüko apem loat.

²²Naiuso Yihusuaüh khaiunia nime sauhaiüh akautha chhisiya yathsüokiukü noiküla ngüne tü ngiom, “Ajisiwop menyiu tsamai khu- küta ajeüh apa tü thalotaiutsünli, apa naiuso apa tsammongso nialokü ashian.”

²³Nungtiphe ngüne khuküta Rahab ko aikü apa posinyiu, deisi- nioso, naiuso apa tsammong amao nouso nialokü shin. Ngüneüh ngüso apem tsammongso, naiuso sua nouso, Israel hai saothang shimkü aalothang nai nialokü shin.

²⁴Küta ngüsoüh chaiou lakkeng, tangkason, taosonlung, naiuso son jengtsaiu nou shantsün loküta APAOU ün chaitaiu tsam nai taiuwan, küta nungphiai noknio nou ta in nou jeklutkü jek- thiowan.

²⁵Lüko Yihusuaüh ajisiwop Rahab naiuso apa tssammongso apem aa poitaiukiu, tiautenai apaüh akautha khaiunia nime Yeriko ai hongthiotsün tsangkiu. (Rahab thsaosithsoso lonyi saokü Israel nai kihkü noin.)

²⁶Nung taoko Yihusuaüh alohat ngiomong tsak shanküta hongpeng: “Ajantsoüh Yeriko noknio müjam shanshiao kowe naito, apa APAOU ün athesan khemko noi-e. Sauhaiüh nung noknio kihloshiau athanya chhi shane apa melothso yamchong mowane; Sauhaiüh nung noknio bekhan nouso shanshi-e apa thso niophiting mowane.”

²⁷Nungti APAOU Yihusua ko hakü noiküla, naiuso apa nianmemei shingkhannio athum thapekkü khu.