Read Khiamniungan Naga Yihusua 8 Bible Online

Yihusua 8 - Khiamniungan Naga bible

Yihusua 8

¹APAOU nou Yihusua tü ngiom, “Süpaihoi apem niko nialoküta Ai saokü lükhu. Hatkü tsüdekünai monghenkü lanoi. Ngo ni hau Ai noknio, nokpao, apa khaiuniaso, naiuso apa goumchi khako ashio nou kiu-e küta nung ni the-e.

²Ni Ai naiuso apa nokpao tü lüko Yeriko si nung nokpao tü ti chhin nunglilu chhiao noin, lüko lo taoko naito ni nungso jengtsaiu naiuso tsam thainian nouso asam thaiutha hau lütaiu. Noknio nou phiai shikü alekta komheau lükhemlo.”

³Nungtiphe Yihusua apa süpaihoiso apem hakü Ai nai khuau khemlo. Apaüh apa süpaiso ameiting heng aosam shingsan küta ngüso asoh

⁴nung ngiokhem nouso kiuküta hong: “Noknio ainou laiukü jetekü tsüdekü, noknio etsakai pamkü anoi, akomao khemlokü anoi.

⁵Jü khaiuniaso naiuso ngo nung noknio shimkü shi-e. Samüh chongting atao ayanai chhikü shitsünli, tilai Ai nai noitsün khaiuniahoi sam thako li-eao shi-e, sam phoklelokü jingkü khuwane.

⁶Samüh ngüso noknio ainou motaiushikhemkün lektso ngüsoüh sam tü kome. Samüh nnung khako chhikü shitsünli, ngüsoüh sam ngüso ainou hatkü jingkü khuwanji ta yange.

⁷Nungai asam apamtaiu ainou sungküta noknio nou thaloau noin. APAOU asam Goaüh nung asam hau kiu-e.

⁸APAOU nou thoilut- taiutsünli, asamüh nung noknio shioloküta phiai, nung tü in nou lüjeklut, nungso asam tü thoiluttsün ngiokhem nouso noin.”

⁹Nungtiphe Yihusuaüh Ai noknio ajenap ai, Ai si Bethel jetko, ehjiothang nai ngüso hongan küta ngüsoüh nungko taiukü noi. Yihusua to nungsoh nai asaothang nai noi.

¹⁰Ahom beta Yihusua chuokü süpaihoi jonkam, küta apa naiuso Israelhai aheihoi nousoüh süpaihoi nou Ai dongai nialokü khu.

¹¹Apako süpaihoi hakü noknio nai naptsün atengting bekhan dongai khuküta Ai naiuso ngüso jetko tsamei tsak taiukü ajenapki nai asaothang shan.

¹²Apaüh khaiunia heng pungo thatso nialoküta noknio ajenap nai Ai naiuso Bethel jetko jiokü noi-i.

¹³Naiuso ngüsoüh noknio ajenapki asaothang nai noitsün süpaihoi naiuso noknio phiai ajenap nai noitsün khaiuniahoi nouso ehliao khemsan, naiuso Yihusua nung soh nai tsamei nai noi.

¹⁴Tilai Ai hai nokpao nou Yihusua khaiuniaso ep, apa shakta tsalo, phiai shiküta apa komanau nou tsüngekü, apa naiuso apa khaiuniaso apem nung thaiukoli Yordan Tsamei athang nai Israel hai ko ehliao tsalokü khu.

¹⁵Yihusua naiuso apa khaiuniasoüh tsüshioheli liutsa ai khulükhunkü han.

¹⁶Noknio nai noitsün khaiunia apem jonkame- loküta ngüso phichan komkü khu, naiuso ngüsoüh Yihusua tü komtsün ko ngüso noknio ainou laiukü khuwan.

¹⁷Ai nai noitsün chiküüh Israel hai tü komkü khuwanphe, noknio nou sauüh tsühükü akeng wanankü noiküla.

¹⁸Nungai APAOU nou Yihusua tü ngiom, “Alaiüh Ai tü lüchülut, ngo nung ni hau kiuwanji.” Yihusuaüh apa tü ngiotsünli chhikü noiküla;

¹⁹naiuso apaüh apa pha loksantsün ko aikü, khaiunia sauhai pamkü noiküla ngüso shakta chuo, küta noknio nai jingkü napkü nung thalo. Ngüsoüh shakta noknio nou tü in nou jeklut.

²⁰Tilai Ai khaiunia hoi nou lapshikü thap, ngüsoüh inkhao nou maou sungsaokü khaosankü ep. Ngüso thaiutha nungai akhuloau amao yam ti tsünoiküla, tiautenai Israel hai sauhai liutsa dongai jingkü khukü noiküla, loto ngüso dongai laplokü shiküta ngüso komji.

²¹Tilai Yihusua naiuso apa khaiuniasoüh amao nousoüh noknio nou thalokü in jekluttsün ep, ngüso laploshikü shiküta Ai khaiuniahoi loatau tsalo.

²²Noknio nai noitsün Israel hai saoküta ehli nai hoilutkü noiküla. Nungti Ai khaiuniahoi nou ngüso Israel haiüh thumkü lemlowankü epsan, ngüso apem tsaktso tsüjakü loatkü wan,

²³naiuso Ai nokpao tü simkü ngüso khaiunia tsaktso tsüaasan. Apa thaloküta Yihusua dongai kankü shin.

²⁴Israel haiüh liutsa tiai ngüso ehso komlükhunkü noiküla, nungai ngüso ehso apem loatkü wan.

²⁵Yihusuaüh nungko noitsün khaiunia apem moloatkhemkün lektso apa lai tsüle-ikü Ai noknio tü chülutkü taiu. Nung ajekhaiu ko khaiunia melo si menyiu apem nai heng chekü nime nung Ai noknio ko kihtsün khaiunia apem loatkü wan.

²⁷APAOU nou Yihusua tü ngiotsünli, Israel haiüh noknio nai thalotsün tsam thainian naiuso jengtsaiu nouso ngüsoüh hau thean.

²⁸Yihusuaüh Ai noknio thanyomkü jekthiokü wan, nung lonyi saokü nungtilu noin.

²⁹Apaüh Ai nokpao pai tsak tü phanatkü wan, naiuso nung mea nou asham saokü noiküla. Ajenap taoko Yihusuaüh nung mea nou lowanao ngiokiu, naiuso nung Ai noknio bekhan dongai yakkan. Ngüsoüh nung mea lung piakü khaikam küta lopokkü wan; nung lonyi saokü nungti noin.

³⁰Nungai Yihusuaüh Ebal King nai APAOU Israel Goa hau amthang tsak shankü noiküla.

³¹“Nung alang- tsün son jengtsaiu tsühakü lung noulu shantsün amthang tsak shan,” ta Mosa Ngiokhem nai ngiotsünli, apaüh APAOU yathsüotsün Mosaüh Israel hai hau ayamhan kiutaiutsün tsangkü nai nung amthang shan. Nung chiai ngüsoüh APAOU hau ajahtsün chaithio nouso kiu, naiuso loüh ngüsoüh aalo chaithio lüko kiu.

³²Nungai Israel haiüh thapkü noikü, Mosaüh sattsün Ngiokhem thsam tsak Yihusuaüh lung nouso chiai satlut.

³³Israel hai, ngüso aheihoi, asonghoi, mikhem hoi, naiuso melemao hai ngüso ongko kihtsünso hakü, Levi meson hai sauhaiüh APAOU Athalou-e Ngiokhem Paidan pitsün awemko thekü hoi nime tsakai tsak tsak ai tsak ta e-ekü tsakü noiküla. Khaiunia hoi tsak nou ngüso phi Gerizim king tü sheilut, naiuso hoi tsak nou ngüso phi Ebal king tü sheilutkü tsakü noiküla. Ngüso thaiutha tilai APAOU ün ouk epao atao shi-e nungai nungti lüchhi ta APAOU yathsüotsün Mosaüh ngüso tü thoiluttsün nung noiküla.

³⁴Nungphiai, Yihusuaüh Ngiokhem Thsam nai satkü taiutsünli ouk naiuso athesan nouso Ngiokhem apem sangh asong nou we.

³⁵Methso, menyiu, naiuso melemaohai sauhai ngüso ongko kihakü noiküla, ngüso apem kamkü noitsün ko Mosa ün athoilut apem Yihusuaüh wekü han.