Read Khiamniungan Naga Yihusua 9 Bible Online

Yihusua 9 - Khiamniungan Naga bible

Yihusua 9

¹Tilai Yordan ajepek etsai noitsün nokpao nouso apem nou naiuso Lebanon saokü Mediteranian khiamnok thathonkü kihtsün Hit hai, Amor hai, Kanan hai, Periz hai, Hiv hai, naiuso Jebus hai apem nou Israel haiüh shiolokü shitsün ngelakü iula,

²ngüso Yihusua naiuso Israel haiko ehliao mongyang tsak thekü aikü kamsan.

³Lüko Gibeon hai nung sauhai Hiv hai noiküla, ngüsoüh Yeriko si Ai noknio tü Yihusuaüh ti chhin nung lula,

⁴naiuso ngüsoüh Yihusua kausaiatao khemloum. Ngüso khukü ehesishiu ajantso loküta nekong athe nouso ko saithiokü, theng thiotsün nyikhun nekong akeng chio-e chio- ekü nouso phanlut küta gado nouso hau kanikü khu.

⁵Ngüsoüh nethe nouso ten naiuso hok khut nyiankü nouso phopphopkü khutlo. Ngüsoüh kantsün themtsai wailiankü naiuso mo kü noiküla.

⁶Küta ngüso Gilgal nai Israel khaiuniahoi saothang nai khuküta Yihusua tü ngiom, “Sam goumchi laiukü jetekü ainou shikü noin. Samüh asam hau sam ko athalou-e tsak shaniao aiuji.”

⁷Lüko Israel khaiunia nousoüh ngiom, “Samüh asam ko tiauta athalou-e tsak shane? Tsüngean asam shimkü kihtsünso latha-e.”

⁸Ngüsoüh Yihusua tü ngiom, “Sam asam yathsüotsünso noin.” Yihusuaüh ngüso tü sangkü ngiom, “Asam sauhai? Asam ti ainou shikü noin?”

⁹Nungai ngüsoüh apa hau nung ngiolat chiten: “Asonghai, sam goum- chi thatü laiukü ainou shin, tiautenai samüh APAOU asam Goa thaiutha lula-iu. Apaüh Ijip nai chhitsün alum thaiutha samüh lulakü noin.

¹⁰Naiuso Yordan ajepek Astarot nai kihtsün Amor hai nokpao nime- Hesbon nai Sihon nokpao naiuso Bashan nai Og nokpao netü apaüh ti chhin nung samüh lulakü noin.

¹¹Sam ahei nouso naiuso sam goumchi nai kihtsün khaiuniahoi apem nou sam tü süme thaiutha eheshiu ajantso lükhemlo naiuso khukü niko lüphete ta ngiom. Sam asam yathsüotsün nai taiuküta asam tü samko athalou-etsün tsak shanao lüsang ta sam tü ngiom.

¹²Sam themtsai tü athaplu. Samüh nung lokü asam ko pheteao tsalotsün taoko, nung alam noiküla. Lüko athaplu! lo nung wailiangkü naiuso mo nou pokü noin.

¹³Tilai samüh nung theng nyikhun nekong ko thiom, nung ayan noiküla, lüko athaplu! loto nungso nyi ankü iula-iu. Sam neshe naiuso hokkhut nouso süme laiukü keitsün shioko nyianiu.”

¹⁴Israel khaiuniahoi nou ngüso ainou eheshiu ajantso lulo, lüko nung thaiutha ko APAOU tü tsüsanglukü noiküla.

¹⁵Yihusuaüh Gibeon khaiuniahoi ko haimei iula ao Athalou-e tsak shanküta ngüsoko kiha au ayam sopkium. Israel hoikam ahei nousoüh nung athalou- etsün taiuao ngüso hau ngiomong tsak kium.

¹⁶Nung athalou-e shan küta ajekhaiu samnyi phiai Israel haiüh nung khaiunia nouso shimkü kih- tsünso ta ngekü iula.

¹⁷Nungtiphe Israelhai tsalokü khukü Gibeon, Kefira Berot, naiuso Keriat Jearim, kihtsün noknio nouso ajekhaiu samnyi phiai shisao.

¹⁸Lüko Israel haiüh ngüso loat au tsüshio, tiautenai ngüso aheihoi nousoüh APAOU Israel ün Goa nianko ngüso tü athalou-e mongkü tsak shanankü noiküla.

¹⁹Khaiunia apemüh nung thaiuthako aheihoi nouso tü namnam, lüko ngüsoüh thalakü ngiom, “Samüh ngüso ko APAOU Israel ün Goa nianko athalou-e mongkü shananiu.

²⁰Samüh ngüso ko sam athalou-e shanan nou shioko ngüso aa taiuao noin, samüh nungti tsüchhikü naito, Goa nou sam hau angja kiu-e.

²¹Ngüso aa noi-i, lüko ngüsoüh sam thaiutha pai nou sanpekke naiuso khiam khaiu kiu-e.” Nungti aheihoi nousoüh ngiokü noiküla.

²²Yihusuaüh Gibeon khaiuniahoi tü apa dongai ashi ta ngiokhem kiu, naiuso apaüh ngüso tü sangkü ngiom, “Asam nungkolu kih noikü asam laiukü ainou shin ta chitekü asamüh sam tiauta kausaiat?

²³Asamüh nung chhi nou shioko, Goa nou asam athesan kiu-iu, naiuso Goa mele thaiutha asam khiam khaiu- tsün naiuso paisanpektsün iulakü sua aküo ainou tilaitso tsüpunge-e.”

²⁴Ngüsoüh thalakü ngiom, “APAOU a Goaüh apa yathsüotsün Mosa tü asam hau goumchi apem kiu-e, naiuso nung goumchi nai kihtsünso apem asam khako mowani-e ta ngiotsün nung ni yathsüo tsünso tü atsüoting ngio nung shioko samüh meshen aa thaiutha asam lun thatü hatkü iula, nungtiphe samüh nung chhisiya nou chhikü noiküla.

²⁵Loto sam aphamongai noin, sam tü ni ti thakü noin ta yangji nung achhi.”

²⁶Nungtiphe Yihusuaüh nungti chhikü noiküla: apaüh ngüso kiplo naiuso Israelhai hau ngüso loatao ayam tsüsopkiu.

²⁷Lüko nungko aikü apaüh ngüso Israel khaiuniahoi si APAOU ün amkham thang thaiutha khiamkhaiu naiuso paisanpek kiutsün sua theao shankiu. Lonyi saokü ngüsoüh nung chhisiya APAOU amkhamthang tiai chosane nungai tsülaokü chhiji.