Read Khiamniungan Naga 2 Thesalonika 1 Bible Online

2 Thesalonika 1 - Khiamniungan Naga bible

2 Thesalonika 1

¹Paul, Sila naiuso Timothi ainou Sam Po Goa naiuso APAOU Yisu Khrista ün khaiuniahoi Thesalonika nai noitsün donthehoi dongai:

²Sam Po Goa naiuso APAOU Yisu Khristaüh asam hau atsüojin asong naiuso aalu lükiu.

³Deisinioso, samüh asaita asam thaiutha Goa hau nianlom kiuau ayam noin, naiuso nung samüh chhiao maikü noin, tiautenai asam amonglam thatü songphe asam khaiunia pungkü nou hai nou hai dongai atsüojin songkü iulaji.

⁴Nungshioko Goa donthe apemai sam chija asam thaiutha bülomji. Asamüh angja awontsao chikü yankü shitsünko tsülaokü jeilokü monglamtsün thaiutha sam bülomji.

⁵Nungüh Goa mikhem asio naiuso asam apa nokshing nai omhe ta mitha kiuji.

⁶Goa nou ti thakü noin nung chhi-e: apaüh asam omheitsünso hau angja kiu-e,

⁷naiuso apaüh asam sei sam sauhai omheji nungso hau lüko aalu nou kiu-e. Apaüh nung APAOU Yisu honghoi nousoko hakü sam hau ajinka shioalu kiu-e.

⁸Sauhaiüh Goa tsülu naiuso sam APAOU Yisu Khrista Ngem Amei nou da tsümonglam ngüso inheeng nouko angja kiuao shi-e.

⁹APAOU kha ajinka ainou naiuso athontsüyang alotheantsün ainou amowan eppe.

¹⁰Tilai apa shi-e, nung ajekhaiu konai sauhaiüh apa da monglam nungso apem ainou ajinka naiuso nianlom asuhat eppe. Asam lüko ngüso ongko noi-e, tiautenai asamüh sam mitha da monglam.

¹¹Nungshioko samüh asam thaiutha asaichi misao saoji. Apaüh sam titi kih au jon, nungti tinkü iula au thaiutha sam Goa tü sangji. Apa oukong tsangkü asam mongchiotsün apem amei naiuso amonglam chhi apem thathonkü hau thaiutha apaüh asam ayangtaiu athawao-i.

¹²Asam ainou nung chhitsün tsangkü sam APAOU Yisu Khrista nian ajinka-e, naiuso sam Goa APAOU Yisu Khrista atsüojin asong tsangkü asamüh nung eppe.