Read Khiamniungan Naga 2 Thesalonika 2 Bible Online

2 Thesalonika 2 - Khiamniungan Naga bible

2 Thesalonika 2

¹Sam APAOU Yisu Khrista shiau naiuso sam aikü apa dongai kamshiau thaiutha deisinioso, ngo asam tü kojaji.

²APAOU ajekhaiu lo noin ta Onthso nou lüko, ngio nou lüko, sam ainou thsamsat nou lüko, asam mong shakta tsüsaiukei-iau, tsüdekünai tsüyangelatau thaiutha asam tü kojaji.

³Ti yamai lünou asam sauhau lasapthio-i. Tititenai ngiokhem tsütaiukün akausai tsak nou, Goa nou moisemkü lomowanne, naiuso khaiunia piakü nou Goa thako khengshitsün tsangsheikü mosungkün lektso nung ajekhaiu tsüshi-e.

⁴Khaiuniahoi nou amkhamtsün Onthso naiuso goa pungkü nouko nai meshen songtso ta khengshikü yange, naiuso apaüh Goa tsamai napküta apa chija Goa ta lüko ngio-e.

⁵Ngo asamko noi nai, asam tü nungso ngiom ta asamüh tsüyangsanso?

⁶Lo ti thawaoji nung ainou lolaoau loüh ajantso noin, naiuso asamüh asam chija nung alolaoau oukong chhi nou ngeluji. Nungtiphe ngiokhem tsütaiukün akausai tsak nou apa atao tongtü nai atsangshei sung-e.

⁷Lüko ti shithawaoau noin ta ngo ngiom, nung shithawaoau noitsün ainou yam kiaptsün tsak Goa nou moluatkün lektso, Akaosai Ngiokhem tsütaiukün tsak nou chhi chhiji.

⁸Nung taoko atenlaotsün oukong nou lowankü thonkü, Ngiokhem tsütaiukün akaosai tsak nou atsangshei sunge, lüko tilai APAOU Yisu shi-e, apaüh Ngiokhem tsütaiukün akaosai tsak nou apa son ainou shitsün ii nou luat-e, naiuso apa ajinka suntsün tsangkü lotheane.

⁹Ngiokhem tsütaiukün akaosai tsak nou oukong apem hakü Biya chhi tsangkü nai shi-e, naiuso atsüotsüdekün ii naiuso athanga nouso in apem chhi-e,

¹⁰naiuso sauhai ngengekü mowane, yam pungkü nai sapthio-e. Ngüso mowane, tiautenai ngüso aasanau nou ngiotsüo tü ngüsoüh amongling nai tsülu.

¹¹Nungtiphe Goa nou ngüso mongko aphio oukong nou chhiau hongji, naiuso ngüsoüh ti aphio noin nung da monglame.

¹²Athonting nai khaiuniahoi sauhaiüh ngiotsüo nou da tsümonglam, lüko angei chhi nai monglingji, Goa nou ngüso tü aphio ta ngio-e.

¹³APAOU nou tsüojintsün deisinioso, asam thaiutha samüh Goa hau nianlom kiuau asai ayam noin, tititenai Onthso nou losiolutsün naiuso ngiotsüo monglamtsün nai aasan thaiutha Goa nou aya ainou asam chosan.

¹⁴APAOU Yisu Khrista ajinka epsanau thaiutha apaüh Ngem Amei tsangkü asam jon.

¹⁵Nungtiphe deisinioso, mongkü lütsa, naiuso sam thsamsat nou lüko, ngio nou lüko, asam tü ti ngio chim nung mongkü lühelo.

¹⁶Sam APAOU Yisu Khrista, naiuso sam Po Goa, sauüh sam tü tsüojin, naiuso sam hau atsüojin tsangkü athontsüyangkün aalu naiuso ayang amei kiu,

¹⁷apaüh asam hau asai ti amei nung ngioau naiuso chhiao asam lokong naiuso lomong.