Read Khiamniungan Naga 2 Thesalonika 3 Bible Online

2 Thesalonika 3 - Khiamniungan Naga bible

2 Thesalonika 3

¹Athon nai deisinioso, Goa thaiutha ngem amei tsülaokü shakta lopengau, naiuso asam ongkoli asuhat hakü loau sam thaiutha misao asaokiu.

²Akausai naiuso tsümeikün khaiuniahoi ainou sam kipsanao sam thaiutha misao asaokiu.

³Lüko APAOU to ngiotsüo noin; apaüh sam tsümeikün ainou kipsankü naiuso lokongkü taiu-e.

⁴Samüh asam hau kiutsün ngiokhem asamüh chhiji, naiuso loüh chhi-e ta asam da APAOU nai samüh monglamji.

⁵Asamüh Goa tü songkü tsüojinau APAOU nou yam ania ta ngü misao saoji, naiuso APAOU nou asam hau Khrista tsangkü ajeiluao kiu.

⁶Deisinioso, sam ainou ngelutsünli tsütsakeikü cholak tsakeitsün deisinio ainou asam chija lüsoian ta sam APAOU Yisu Khrista nianko samüh asam tü ngioji.

⁷Titi samüh ayam nai chhiji, nungli asamüh chhiao ngen. Sam asam ongko noinai tsücholak.

⁸Samüh amai tsükiukü sau ainou ahachu tsülo, thsale tsükiuao thaiutha asoh si anyi kowekü chhin.

⁹Nungti chhiau sam ayam tsünoi ta tsüde, lüko asamüh sam tü thaplouau sam chija asam hau chhikü han.

¹⁰Tilai sam asam ko noiküla, samüh asam tü, “khaiunia ajantsoüh chhi chhiau tsümongchiukünai, apa hau laheshiu-i” ta ngiom.

¹¹Tiautenai asam ongko meshen chhi chhiau tsüaiukü ajantsoüh amaohai chhi nai angja kiuji ta samüh lulan shioko samüh nung ngioji.

¹²Lo nungtin khaiunia nouso tü athatsam nai ngüso chhi chhiao, naiuso meshen eheshiu chhisanao, APAOU Yisu Khrista nianko samüh Ngiokhem kiuji.

¹³Deisinioso, chhi amei chhitsün nai asam mongthonkü la-iula.

¹⁴Khaiunia ajantsoüh nung thsamsat nai sattsün ngio tsüangkünai, nung khaiunia nouso ngelokü ataiu, naiuso apa miamiau thaiutha asam apako lahaiha.

¹⁵Lüko ngüso tü ehli lakankei, lüko deisinioli lülotsüo.

¹⁶Apa pem APAOU sau aalou-itsün nyimsantsün noin, nungüh atao chikü nai naiuso ayam pungkü nai aalu lükiu. APAOU asam apemko lünoi.

¹⁷Jü phakhasonüh nung thsamsat satji: Paul ainou salam. Jü thsamsat apem nai nung ii noin, nungti ngü satji.

¹⁸Sam APAOU Yisu Khrista atsüojin asong asam apem nouko lünoi.