Read Khiamniungan Naga 1 Timothi 1 Bible Online

1 Timothi 1 - Khiamniungan Naga bible

1 Timothi 1

¹Sam Kipsantsün naiuso ayangtaiu Yisu Khrista thaiutha hongthon tsak theao Goa nou hongtsün Paul ainou

²Amonglam nai atsüoting jü thso Timothi dongai: Po nou Goa naiuso sam APAOU Yisu Khristaüh ni hau atsüojin, atsüojinyang naiuso aalu lükiu.

³Ngo Makedonia ai khunai, ni hau titi ngiokhem kiu, lo lüko nungtilu kiuji; ni khaiunia ajantsoüh atsande amomo tsütsande-iau Ephesa nai lünoi.

⁴Sübao nou alihetsünlu sungiji, nung atsüotsüdekün ngiolat naiuso athontsüyang paosipoling ngiolat nouso lüwanan ta ngüso tü lüngio; nungühto amonglam tsangkü ngekü noitsün Goa ayangtaiu tsüchhiji.

⁵Lüko ngiokhem kiutsün mongpem ayanthsüo naiuso sansimong amei nou akausai tsünoikün amonglam ainou sungtsün atsüojin thaiutha noin.

⁶Khaiunia ajantso ngüso ainou yaang ngio chitetsün nai phoklekü khuwane.

⁷Ngüsoüh ti ngioji, tsüdekünai ti thaiutha chiteji, nung tsüngela lüko ngiokhem tsandetsünso iulaau aiuji.

⁸Akankeiau titi ayam noin, nungli kankei naito, ngiokhem nou amei ta samüh ngen.

⁹Nung yangshiau noin: ngiokhem nou khaiunia ameihoi thaiutha tsüde, lüko ngiokhem lotheantsünso, tsümeikü chhitsünso, Goa tsüngekünso, naiuso angeihoi sauhai don nai outsükong, tsüdekünai onthso nai outsükong, naiuso sauhaiüh meshen posinyiuso asu tsühat, naiuso aluattsünso,

¹⁰tsütsamtsütsüokünso, ajisiwop kankeitsünso, khaiunia janhetsünso, yaang ngio chitetsünso, naiuso yaang mitha kiutsünso, tsüdekünai sauhaiüh achim thakü noikü nouko tsüjeiaikü chhiji nungso thaiutha shan.

¹¹Nung atsandetsün ouk kiutsün Goa naiuso ajinka ngem amei ainou sübao thipengkiuau ngü tü thoilut nung Ngem Amei nai epji.

¹²Sauüh jü chhi thaiutha ngü hau oukong kium, sam APAOU Yisu Khrista hau ngo nianlom kiuji. Ngo apa yathsüoau shingsan, naiuso tinkü veha nou thaiutha apa nian lomji,

¹³ayanan taoko ngo apa thaiutha tsümeikü chite, naiuso omhe-i, naiuso apa lotsao lüko, Goa nou ngü da atsüojinyang han, tiautenai ngo ti chhiji nung tsünge naiuso amonglam tsütaiukü noiküla.

¹⁴Naiuso sam APAOU nou ngü da apa atsüojin aphop kheplutkiu naiuso sübao sam ün Yisu Khrista ko jeiaikü noitsün amonglam naiuso atsüojin ngü hau kiu.

¹⁵Angeihoi ongko ngo atengting, ngüso kipsanau Yisu Khrista goumchiai shin, nung ngio monglamkü hau naiuso apemüh loau maikü noin.

¹⁶Lüko Yisu Khrista apa ajeilutsün ngü da thumkü hanau thaiutha Goa atsüojinyang ngü da noiküla, angei ongko atsaoting apa ta phikü monglamtsün chikü thaiutha athontsüyang aa eppe ta athat tsak noin.

¹⁷Lo naiuso athontsüyangkün nokpao sau tsüepkün, Goa tsaklu, apa dongai nianlom, ajinka athontsüyangkü lünoi. Amen.

¹⁸Jü thso Timothi, ni amonglam naiuso sansimong amei taiukü, ehli amei lihe au thaiutha, kümi thaiutha khapiam ngio nousoli ngü ni hau nung ngiokhem thoilutkü taiukiuji.

¹⁹Ajantso to nung amonglam naiuso sansimong amei ainou punge nou shioko, ngüso amonglam lotheane.

²⁰Ngüso ongko Humenia naiuso Alekander, ngüsoüh Goa lotsaotsün tsüchiteau thaiutha ngo ngüso Biya hau thumkü kiuwaniu.