Read Khiamniungan Naga 1 Timothi 3 Bible Online

1 Timothi 3 - Khiamniungan Naga bible

1 Timothi 3

¹Ajantsoüh donthe yathsüotsün chhi yamnai, apaüh chhi amei chhiau aiuji; nung ngio ayam nai noin.

²Nungtiphe donthe yathsüotsün tsak to aphio tsülepkü, tsammongnyiu tsak ünlu tsammongpo iulakü, athat yangkü kankeitsün, meshen thatsanglutsün, mongthat montsün, mesanhai tsadtsün, atsandeshiau shiotsün theau noin;

³theng shiutsün tsüde, ali-etsün tsüde, lüko alemlem montsün, angem losantsün tsüde, tsüdekünai tangka chinektsün tsüde,

⁴meshen tsamkhaiu meikü niakeiau montsün, naiuso meshen thsoso meikü thatsangkü taiuau shiotsün khaiunia theau noin;

⁵(lüko khaiunia tsaküh meshen tsamkhaiu niakeiau tsüshiokünai, apaüh Goa donthe titi paotsangau nge-e?)

⁶Biyali abülom nou putsankü aphio tsülepao apa to amonglam nai nyanlokü donthe nai ayan tsüdekünai mei.

⁷Apa to don mothehakünsoüh lüko asuhat kiutsün khaiunia tsak theau noin, nungaito apa tsülotsao-e naiuso Biya jin nai tsüsali-e.

⁸Donthe nai dikon nouso ayanghelutsün naiuso mongkiutsün theau noin, lei nime suntsün tsüde, theng shiutsün tsüde, bumsiwom naiuso ehethaikhan tsüde;

⁹lüko mong ayanthsüo nai amonglam, akaungio ngetsün khaiunia theau noin.

¹⁰Chongting nai ngüso tü theluküta, aphio tsünoi naito dikon chhi nai lüchhi-i.

¹¹Nungtilu ngüso tsammongnyiuso lüko ayanghelutsün noikü, haisihai thaiutha chitekeitsün tsüde, athat yangkü kankeitsün, apemai monglamkü noitsün theau noin.

¹²Dikon nouso, tsammongnyiu tsaklu, naiuso thsoso sei tsamkhaiu meikü paotsangao shiotsün theao noin.

¹³Tititenai sauhaiüh dikon chhi meikü chhiji, ngüso chhi amei naiuso Yisu Khrista da amonglam noitsün nou chija amongsong epsanji.

¹⁴Ngo shikü niko shakta pheteau yangküta ngo nung thsamsat adongai satji.

¹⁵Lüko ngo tsangan nai, sam Goa tsam sübao aa Goa ün donthe nai ngiotsüo tü hachutsün kheam noin nung saisile titi kankei-e ta nung thsamsat tsangkü nge-i-e.

¹⁶Sam don akaungio titi asong noin nung sauüh lünou tsüthalukü noiau tsüshio: Apa khaiunia khekkü shin, Onthso tsangkü ayamtha nou han, naiuso aünhonghoi tsangkü ep. Apaüh mele nouso ongko chim, goumchi apem nou monglam, küta aün ai kankü sungan.