Read Khiamniungan Naga 1 Timothi 6 Bible Online

1 Timothi 6 - Khiamniungan Naga bible

1 Timothi 6

¹Sauhai tsamki nouso noin, ngüsoüh ngüso APAOU nouso alumko asuhat kiuau maikü noin ta vesanau noin, nungaito Goa naiuso samüh tsandetsün apem tü sauüh tsüvesankü tsüchite-e.

²Amonglam tsampao nouso ün sua nouso sauüh tsülutsaoau noin, tiautenai ngüso lüko deisinio noin. Nungtü simkü meikü ngüsoüh ngüsobao yathsuo-e, tiautenai ngüso chhisiya ainou alesan eptsün nung ngüso tü tsüojintsün deisinioso noin. Ni nungso tsandekü chimau noin.

³Sauüh sam APAOU Yisu Khrista ngiotsüo naiuso sam don atsandeyam nousoko tsüjeiaikü achim amomo tsandeji

⁴nungto abülom nou miankü noin naiuso titso tsünge. Apaüh mongyang tsümeikün akhenge aiuküta ngio thaiutha liheji, nungüh niokia suntsün, tsüjeiaitsün, lotsaotsün, tsümeikü yanglutkiutsün,

⁵naiuso mongyanghe amei naiuso ngiotsüo nai tsünoishikün khaiunia nouso ainou akhenge tsülaoji. Ngüsoüh don yam nou memei iulaau ayam noin ta yangji.

⁶Atsüo, khaiunia tsak apaüh ti taim nung tü mongtsam naito, don nou apa thatü memei iula-iji.

⁷Samüh goumchi ai ti kankü shin? Titso kankü tsüshi! Samüh goumchi ainou ti kankü khuau shio-e? Titso kankü khuau tsüshio-e!

⁸Nungtiphe samüh eheshiu naiuso atenau neshe noinaito, sam nungüh mongtsamkü noiko.

⁹Lüko sauhaiüh memei iulaau aiuji ngüso alilu nai, jin nai, tsüngekün naiuso asapat achinektsün ko salianji, nungtin khaiunia nouso alothe naiuso amowan nai limelatji.

¹⁰Tititenai tangka tsüojintsün to tsümeikün in apem eiu noin. Khaiunia ajantsoüh nung epau thatü mongchio nou shioko ngüso amonglam ainou pungekü khuküta amongsaiu apia nou ngüso mongpem lothekü khuwanji.

¹¹Lüko Goa khaiunia, ni nungso ainou lükhulo. Asio, Goa khektsün, amonglam, atsüojin, ajeilu, naiuso amongmei thaiutha komkü lükhu.

¹²Amonglam ashe-e nai apem chiko ameiting lüthe, küta athontsüyangkün aa nou lüthalo; tititenai mitha piakü khako ni tilai amonglam mongkü thalo, nung aa thaiutha Goa nou ni jon.

¹³Apem hau aa kiutsün Goa khako naiuso Pontia Pailat khako atsangshei ngio amei thalutsün, Yisu Khrista khako,

¹⁴ni sam APAOU Yisu Khrista moshikün lektso, ngiokhem aluthe tsüsunkü, naiuso tsülutsaokü taiuau ngü ni tü ngioji.

¹⁵Nokpao ongko NOKPAO naiuso APAOU ongko APAOU, ouk kiutsün naiuso akhengting Nokpao shitsün atao nung Goa nou kankü shi-e.

¹⁶Ee tsü eekün Apalu; sau shimkü shiau tsüshiokün awon nai apa kihji. Sauüh apa tilaitso tsüep; sauüh apa tilaitso epau tsüshio-e. Apa hau asuhat naiuso athontsüyang nokshing lüthe! Amen.

¹⁷Nung aakih nouko sauhai memei noin ngüso tü labülom, küta angioau tsüshiokün memei nou da mongyang lataiu, lüko Goa sauüh sam hau monglingkü kiuji nung da lütaiu ta lüngio.

¹⁸Ngüso tü amei chhiau, chhi amei nai memei theau, amaohai hau janekiuau amongchio naiuso khemlokü lünoi ta lüthoilut.

¹⁹Nungli ngüsoüh ashiau thaiutha athanya atsüoting shanlokü kamloau noin. Nungaito ngüsoüh aa atsüo ta ngiotsün thalu-e.

²⁰Timothi, ni tü apaotsangau thoiluttsün tü mong lükiu. Khaiunia ajantsoüh “Ange” ta tsüthakü jontsün anga akhenge naiuso tsütsüokü chitetsün ainou soilukü lünoi.

²¹Tititenai ajantsoüh nung eppiu ta ngioji, naiuso athon nai ngüsoüh amonglam yam leanji. Goa ün atsüojin asam apemko lünoi.