Read Khiamniungan Naga 2 Timothi 2 Bible Online

2 Timothi 2 - Khiamniungan Naga bible

2 Timothi 2

¹Jüthso, Yisu Khrista da noitsün atsüojin asong nai ni oulükong.

²Mitha piakü khako ngü thipengtsün ni lulatsün atsande nouso lülo, küta amao amonglam khaiunia nouso sauhaiüh amaohai tü lüko tsandeshiau shio-e nungso tü lüthoilut.

³Yisu Khrista ün süpai amei tsakli, ni ngüko angja lüjeilu.

⁴Süpai tsaküh chhi amei chhiküta apa ün ahei mongtsam-iau aiuji, nungtiphe amao süpai tsüdekün chhi nai apa tsühoi-ehaji.

⁵Ase-etsün khaiunia nou apa ngiokhem tsü-angkün lektso amai epau tsüshio.

⁶Eiu-a khaiunia sauüh chhi kongkü chhiji, apaüh ayating haoson be-eiuyam meikü yamji.

⁷Ngü ti ngioji, nung lü-anglu, tiautenai APAOU nou ni hau alumko angesanau mongyang kiu-e.

⁸Ngü tsandetsün Ngem Amei li, ee ainou ahkü shitsün David le ainou Yisu Khrista lüyangsan.

⁹Nung Ngem Amei thaiutha ngo laple haili aketsün nai angjaji, lüko Goa Ngio kekü tsünoi.

¹⁰Nungtiphe ashingsanhoi nou Yisu Khrista da noitsün aasan naiuso athontsüyang ajinka eppau ngüso thaiutha apem jeiloji.

¹¹Ngiotsüo ngio nou nung ngioji: “Sam apako ee naito, sam loüh apako aa noi-e.

¹²Samüh tsülaokü jeilu naito, samüh lüko apako nokshing shinge. Samüh apa tsüthaloukü shanan naito, apaüh lüko sam shanane.

¹³Sam mong tsükiukü noi lüko, apa to mongkiukü noiji, tiautenai apa chija apa pem tü yaang tsandeao tsüshio.”

¹⁴Goa khako ngio thaiutha tsüngemat au akhaiuniaso tü nung mongkü alutsüo lükiu. Nungüh amei titso tsüchhisanji, lüko angio angtsün khaiunia nouso lu lotheanji.

¹⁵Khaiunia sauüh Goa ün ngiotsüo ngiongem thakü tsandeji, apa nung meshen chhi lun tsümiamji, nungti Goa khako chhi waokü chhitsün amongmei shioloau ni shiotsün lektso kowekü lüchhi.

¹⁶Lüko achinyan chitetsün naiuso atheau tsünoikün ngio chite ainou pungekü lünoi, nungüh khaiuniahoi nou Goa ainoubao, laiukü komanji.

¹⁷Nungtin tsandetsün to chaikia müo tsükekü taiutsün khekkü noin. Nung tsandetsün khaiunia nime nou Humenia naiuso Fileta ne noiküla.

¹⁸Nung khaiunia nime neüh ahkü shitsün nung yankü khuwaniu ta tsande, nung ngiotsüo ainou tsütsüokü nai khu-iji, naiuso ajantso amonglam lothean-iji.

¹⁹Lüko athanya Goa nou yachu nai alemlemau tsüshio-e, naiuso nungda nung ngio nouso satkü noiküla: “Apa ün sauhai noin APAOU nou ngüso ngeji” naiuso “Sauüh APAOU ün ta ngioji, apa tsüsiokü ainou punge au noin.”

²⁰Lüko tsam asong tsak mongko tsangkason naiuso chaiou jengtsaiu lu tsütaiuji, lüko pai naiuso pu jengtsaiu lüko taim, naiuso nungso ajantso atheau naiuso ajantso tsüthekü hau thaiutha noin.

²¹Nungtiphe ajantsoüh nungso ainou meshen chija yanthsüokü taiu nai, apa atheau jengtsaiu nou noin. APAOU nou kankeiau tin naiuso chhi amei apem thaiutha ashanshiau maikü noin.

²²Lüko ni oum achinek ainou lükhulo, naiuso mong ayanthsüo nou APAOU tü jontsün hoi nouko, asio, amonglam, atsüojin naiuso aalu lüchinek.

²³Lüko aiu nai tsüngekün asangetsün nou ehli sungiji ta ngekü, nungso lüwan.

²⁴APAOU yathsuotsün to tsülihe nai mei, lüko apem dongai amongmei, achimau monkü akiplutsün theau noin.

²⁵Naiuso meshen chija kiaptsün tü amongmei nou lülotsüokiu, tsüngean Goa nou ngiotsüo ngetsün dongai mong phokletsün ngüso hau kiu-e.

²⁶Sauüh ngüso thalukü apa mongchiotsün angkü iula-in, nungphiai nai ngüso mongyang amei shi-e, naiuso Biya jin ainou thakhu-i-e.