Read Khiamniungan Naga 2 Timothi 3 Bible Online

2 Timothi 3 - Khiamniungan Naga bible

2 Timothi 3

¹Lüko athon ajekhaiu nai ahat au atao shi-e ta lüngelu.

²Tititenai khaiunia meshen chija tsüojintsün, tangka tsüojintsün, akoitsün, abülom, alutsaotsün, posinyiu tü angio tsüangtsün,

³nian tsülomkün, tsüsiokün, atsüojin saisile tsüsunkün, mongkong, tsüvesankün, meshen chija tsüthatsamkün, ahah,

⁴amei tsütsüojinkün, asapthiokiutsün, meshen mongchio kankeitsün, ngiakü khutsün, Goa tsüojintsün ko naito meshen monglingtsün tü bao tsüojintsün,

⁵asio khekkü kankeiji lüko nung oukong tsüthalou, nungso ainou kha lüphokle.

⁶Ngüso ajantsoüh amaohai tsamai napküta outsükongkün nyiuhai nouso ngüso angei tsangkü achinek in amomo nou choikü aphio tsangkü thsale noitsünso thashiolu,

⁷nyiuhai sauüh asaichi angeluau koweji, lüko tilaitso ngiotsüo ngeluau tsüshio.

⁸Jani naiuso Jambriüh Mosa titi kiapjei, nungti khaiunia mongai tsümeikün, naiuso amonglam thaiutha tsütinkünhoi nou lüko ngiotsüo kiapjeiji.

⁹Lüko ngüso laiukü tsükhu-e, tititenai nung khaiunia nimeli khaiunia apem khako ngüso mainga chhi atsangshei sunge.

¹⁰Lüko ngo tsandetsün sakshi, amongchio, amonglam, laiukü jeilutsün, atsüojin, akiplu,

¹¹omhe angja naiuso, Antiok, Ikonia, naiuso Listra nai jüdongai ti thawao, naiuso ti omhe ngo jeiluom! naiuso nungso apem ainou APAOU nou ngo kipsan; nungso apem thaiutha ni ngen.

¹²Ah, sauhaiüh Yisu Khrista da asuhatkü noiau aiuji, ngüso apemüh omhe angja eppe.

¹³Lüko khaiunia tsümeikün naiuso asapthio-itsünhoi nou lapleatkü, meshen chija sapthio-e küta tekkü tsümeikü iula-e.

¹⁴Lüko ni ti ngelu naiuso tiai atsangshei atsüo ep, nungai lünoi, tititenai sau ainou nungso ngelu nung ni ngekü noin,

¹⁵naiuso ni methso taonai asiongio nou ngekü noiküla, ta lüyangsan, nung sübao tsangkü ni hau mongyang kiuau shioji nungüh amonglam tsangkü Yisu Khrista nai aasan dongai niaji.

¹⁶Ngiotsüo chimau, tsüthakün tü thut au, aphio nouso luthaau, naiuso ayam thakü kih au thaiutha yam hanau, Asiongio chikü Goa nou ii matthiokü taim naiuso nung atheau noin,

¹⁷nungti sauüh Goa yathsüoji chhi amei in pungkü chhiau apa meshen chija saiukü naiuso pemkü iula-e.