Read Khiamniungan Naga Tit 2 Bible Online

Tit 2 - Khiamniungan Naga bible

Tit 2

¹Ni atsüoting tsandetsün nouko emkü ngioyam nai chimau noin.

²Petche nouso tü thsümonkü, mongtsamkü, yangluhekü, amonglam nai, atsüojin nai, ajeilu nai, oukongkü noiau ayam lühan.

³Nungtilu menyiu sonthe nouso tü sakshi nai asuhatau, ngiopia tsüde, theng sua tsüde, lüko amei chimtsün theau ayam lühan;

⁴Goa ngio tsülotsao-iau mesohoi nouso tü ngüso tsammongposo tsüojinau, ngüso thsoso tü tsüojinau, ayanglutsün,

⁵ayanthsüo, tsamkhaiu nai alemlem mon, atsüojinyang noikü meshen tsammongpo khemai noiau chimau noin.

⁶Oum nouso tü lüko nungtilu ayangluhetsün theau lülotsüo.

⁷Alumai achija chhi amei nouko athatluau lühan; ni tsandetsün nai mong lükiu.

⁸Samko tsühakünsoüh sam thako ngio tsümeikü, tsüwesankü, tsükankeiao ni chimtsün nouko yanthsüokü, ayanglutsün, thaiutha ngio atsüo lütsande.

⁹Sua nousoüh alum yamai ngüso apaou khemai shiküta ngüso mongtsam-iau noin. Ngüsoüh ngio nou tsüthashiau noin;

¹⁰tsüdekünai ngüso ainou tsükao au noin. Nunglikoto ngüsoüh asaichi amonglam naiuso amei hanau noin, nungti ngüso sam kipsantsün thaiutha atsandetsün, ngüso chhi alum apem nai alumsan kankü shiji.

¹¹Tititenai Goa nou akipsan thaiutha apa atsüojin khaiunia apem hau haniu;

¹²nung atsüojin nou sam hau tsüshiokün, goumchi achinek tsüthaloukü, ayanglutsün asio Goa hatkü hau nung goumchi aakih kihau thaiutha,

¹³naiuso ouk ayangtsün naiuso asong Goa sam aasantsün Yisu Khrista ajinka tsangsheikü sungtsün lüko taiuau, samtü nung atsüojin nou hanji.

¹⁴Tsümeikün apem ainou sam kipsanau apaüh meshen pem sam thaiutha kiu, naiuso sam ün ayanthsüo khaiuniahoi theau, naiuso amei chhi thaiutha mongchiokü noiau shan.

¹⁵Ni lutsüo nai ni ngiotsün angtsünso tü thutnai, a-oukong thumkü lükankei naiuso nungso lüchite. Ngüso sauhaulünou ni tsüvesankü lakankei-i.