Read Khiamniungan Naga Tit 3 Bible Online

Tit 3 - Khiamniungan Naga bible

Tit 3

¹Akhaiuniaso tü Nokpao nokshing nouso naiuso oukong nai noitsünso khemai noiau, ngüso ngio angau, ayam pungkü nai chhi amei chhiao khemlokü noiau lülotsüo.

²Khaiunia sau thaiutha tsümeikü tsüchite-ao, lüko nokmei haimei theao, khaiunia apem khako amongmei naiuso waokü theau, ni ngüso tü lülotsüo.

³Tititenai sam lüko atao tsak ko tsüngekü, angio tsü-angkü, tsüthakü nai iulakü, alum chinekkü, naiuso achinek nai amongling yachutsün iulakü, akhou naiuso alu tsüaiukünai noikü, achinyantsün, naiuso haisihai ne chinyanekü noiküla.

⁴Lüko tilai Goa atsüojinyang naiuso atsüojin sam aasantsün tsangsheikü sung,

⁵apaüh sam kipsan. Nung sam chhi amei nou tsüde, lüko apa ün atsüojinyang shioko apaüh sam kipsan, nung Asio Onthso sauüh sam ayan chetji naiuso aa ayan tsaochuji nung tsangkü noin.

⁶Goa nou sam chiai Asio Onthso akipsantsün Yisu Khrista tsangkü saiukü kheplutkiu.

⁷Nungti apa atsüojin nou sam Goa ko penkü iulaao naiuso samüh yangtaiutsün asai aa tengkam epao noin.

⁸Nung ngiotsüo noin. Ngü ni tü nungso thaiutha mothikü chiteau aiuji, nungtiphe sauhaiüh Goa da monglamji ngüsoüh chhi amei chhiau ngüso atao kiukü yangsane, nung khaiunia pungkü thaiutha amei naiuso atheau noin.

⁹Lüko atheao tsünoikün ngio chite, kau ngiolat, ali-etsün, naiuso ngiokhem thaiutha li-etsün, nungso apem ainou ni pungekü lünoi; tititenai nungso titsünoi naiuso yaang.

¹⁰Ajanpektsün khaiunia jamsimüjam thuttsün phiaito lalu,

¹¹tititenai nungtin khaiunia alotheantsünso noin, naiuso ngüso angei chhi nou ngüso aphio ta hanji nung ni ngen.

¹²Ngü tilai adongai Artema tsüdekünai Tukika honge, ni jüdongai Nikopoli nai shiau lükowe; tiautenai ngo ah-uo tao nungai noiau khemtaim.

¹³Ngiokhem ngetsün Zena si Apolo ne yamai tiko tsüangjakü hau khemkiukü lühongsai.

¹⁴Atsüoting apoutsün epao thaiutha, sam khaiuniasoüh ngüso atao amei chhi nai wanau ngeluao noin; ngüso atheau tsünoikün cholak aakih nai tsükih au noin.

¹⁵Ngüko noinso apemüh ni hau salam hongji. Amonglam nai sam tü tsüojintsün haiso hau salam lükiu. Asam apem nouko Goa atsüojin asong lünoi.