Read Khiamniungan Naga Philemon 1 Bible Online

Philemon 1 - Khiamniungan Naga bible

Philemon 1

¹Yisu Khrista thaiutha khouthiotsün Paul, naiuso sam deisiniso Timothi ainou Sam haimei naiuso aikü chhisiyatsün Philemon,

²atsamai kamshitsün donthehoi, naiuso sam nousinio Apphia, naiuso sam süpai haimei Archippus so apem dongai:

³Sam Po Goa naiuso APAOU Yisu Khrista ainou asam dongai atsüojin asong naiuso aalu lünoi.

⁴Deisinio Philemon, ngo misao tao pungkü anian jonkü jü Goa hau nianlom kiuji.

⁵Yisu Khrista nai ni da amonglam, Goa khaiunia apem thaiutha atsüojin noitsün ngo lulaji,

⁶Jü misao nung sam amonglamhoi khekkü jeiaitsün tsangkü sam aa Khrista nai ouk tekkü aokü ngelaekü noiau ayang noin.

⁷Atsüojin deisinio, ni tsüojintsün nou, ngü hau amongling asong naiuso tekkü oulukong kiuji! Ni Goa ün khaiunia chikü mongpem shioalu-iji.

⁸Nung thako Khrista nai adeisinioli ni tü ngiokhem kiuau ngo thatü mongsongkü noiküla.

⁹Nungti ngo Paul, petche lüko lo Yisu Khrista thaiutha akhouthiotsün tsakphe, atsüojin nou ngo akojabao kojaji.

¹⁰Ngo khouthiokü noitsün tao Khrista nai chet nou jü thso Onesima onthso nai ngo apa po iulaphe apa thaiutha nitü kojaji.

¹¹Atao tsak ko apa athaiutha tiau tsüthekü noiküla, lüko lo athaiutha naiuso jü thaiutha atheau noin.

¹²Jü mongpem hakü, lo ngü apa adongai laokü hongji.

¹³Ngo Ngem Amei thaiutha akhouthiotsün nai noi nai, asaliko apaüh ngo hachuau ngüko taiuau aiuküla.

¹⁴Nungti lüko ni meitsün kojakü tsüde, lüko mongchiokü hau thaiutha ngü ni mongchiotsün tsühakü ti chhiau tsüaiu.

¹⁵Nungti atao letletkü thaiutha Onesima niko pungekü noilünti,

¹⁶loto sua tsakli tsüde, lüko sua nouko chentso: apa Khrista nai atsüojin deisinio. Titi tekkü jü thaiutha atsüojin! Naiuso tekkü athaiutha lüko nungli, aikü sua naiuso Khrista nai deisinio!

¹⁷Naito, ni ngüko aikü yathsüo-eji tünaito, ngo loutsünli apa lülou.

¹⁸Lüko apaüh nitü tso tsütsüokü kankeikü noi nai, tsüdekünai chailaiu laiukü noi nai, nung jü nianko ataiu.

¹⁹Ngo nung thsamsat jüphaüh satji: Ngo, Paulüh, ni hau laokü kiushi-e.(Ngo nung ni tü tsüngioshiau tso noikülela, ni apemteng ngü tü chailaiu noin.)

²⁰Nungai, jü deisinio, APAOU nai ngo hau nung atsüojinyang ahan, Khrista nai deisinioli jümongpem amonglingi.

²¹Ni angio angtsün nai thatü monglamkü, naiuso ngü ti ngioji nungtü phopkü ni chhi-e ta ngekü ngü adongai nung satji.

²²Nungko hakü jü thaiutha tsampai tsak khemkü ataiukiu, tiautenai asam chikü misao Goa nou thala-e naiuso ngo asam dongai laokü shi-e ta yangji.

²³Khrista nai jühai Epaphra, akhouthiotsün nai noitsün nou ni hau salam kiuji.

²⁴Naiuso Mark, Aristarka, Dema, naiuso Luk, aikü chhitsün jü haisoüh lüko salam kiuji.

²⁵Sam APAOU Yisu Khrista atsüojin asong asam onthso nouko lünoi. Amen.