Read Khiamniungan Naga Ibri 1 Bible Online

Ibri 1 - Khiamniungan Naga bible

Ibri 1

¹Kümi atao Goa nou piaküjam naiuso ayam piakü nai sam paosiposoko E-pohoi tsangkü chite,

²lüko nung athon vetao nai apa Thso tsangkü samko chite-iu. Goa nou sau tsangkü goumchi shan nung apa noin, Goa nou apa athon nai tengkam apem epau chosan.

³Apaüh Goa ajinka ajin oukü naiuso Goa atsüoting khektsün soh, goumchi apem apa ngio oukong nou shiolotsün hanji. Khaiuniahoi hau angei wankiuao oukong epküta apa aün ai akhengting Goa uai moknoi.

⁴Thso nou aünhonghoi nouso tü songtsokü shan, nungti Goa nou ngüso khengko nian asong apa hau kiu.

⁵Tititenai Goa aünhonghoi nouso sau tü, “Ni jü Thso, lonyi ngo Apo au iula-iu” ta tsüngio. Tsüdekünai Goa nou honghoi sau tü, “Ngo apa Po au the-e, naiuso apa jü Thso au the-e” ta tsüngio.

⁶Lüko Goa nou meshen Thso aya chettsün goumchi ai hongau nai nungti ngiom, “Goa aün honghoi chikü nou apa amkhamau noin.”

⁷Lüko Goa nou aün honghoi thaiutha ngiom, “Goa nou aün honghoi ahsheih au shanji, naiuso meshen yathsüotsünso innyai au shanji.”

⁸Thso nou thaiutha Goa nou ngiom, “O Goa, anokshing athontsüyangkü noi-e! Akhaiunia khako anokshing ngiotsüoting nokshing noi-e.

⁹Ni asio nou tsüojinji naiuso tsüsiokün chinyanji. Nungtiphe a Goaüh ni chosaniu, küta meshen haiso chiai amongling asuhat phopkü ni hau kiu-iu.”

¹⁰Apaüh loüh ngiom, “APAOU, ni chongting nai goumchi nou shan, naiuso ni meshen pha nou aün shan.

¹¹Ngüso to mowane, lüko nito poisane; nungso chikü nesheli nyi-ane.

¹²Ni nungso phakhut tsakli laishian-e, naiuso nungso nesheli li-eane, lüko nito asaita wekülü noin, naiuso ni aakihlaiu tilai athontsüyang.”

¹³Goa nou meshen aün honghoi tü, “Ngo a-ehso ahok khemai motaiukün lektso, ni ngüko uai anoi” ta sau tü tsüngio.

¹⁴Naito, aün honghoi nouso ti? Sauhaiüh aasan epau noikü Goa yathsüoji, naiuso apa tsangkü ngüso hachuau hong, nung onthso nouso ngüso noin.