Read Khiamniungan Naga Ibri 10 Bible Online

Ibri 10 - Khiamniungan Naga bible

Ibri 10

¹Tititenai Ngiokhem nou ashiau amei nouso ah-khemso tsak noikü, nungso ün atsüoting khektsün tsüdephe ti chaithio nouso pon pungkü asaita wekü kiuji, nungüh ngiokhem shimkü khutsünso tü tilaitso thapungkü iula-iau tsüshio.

²Nungti tsüdekünai, nung chaithio nouso tsülao-e süne? Tititenai amkhamtsünso jam yanthsüo nai, loto angei mongpem tsünoi-ela.

³Lüko nung chaithio nousoüh pon pungkü angei yangsanji.

⁴Tititenai jangtsopong si won she nou angei nouso lowanau tsüshioji.

⁵Nungshioko apa goumchiai shiau nai apaüh Goa tü ngiom: “Aloat chaithio naiuso chaithio nouso ni tsü-aiu, lüko ni jü thaiutha pem tsak khemlo-iu.

⁶Apem jahtsün chaithio naiuso angei thaiutha chaithio nousoko tsüdekünai angei kankü khutsün chaithio nouko ni tsümongling.

⁷Nungai ngü ngiom, ‘Ngiokhem thsam nai satkü taiutsünli, ni mongchiotsün chhiau ngo nungai noin, O Goa.’”.

⁸Ni piamkü ngiotaim, “Aloat chaithio naiuso chaithiotsün naiuso apem jahtsün chaithio naiuso angei thaiutha chaithio nouso ni tsü-aiu.” Tsüdekünai nungsoko ni tsümongtsam, (tiautenai nungso ngiokhemli kiuji.)

⁹Nungai apaüh ngiom, “Athaplu, ni mongchiotsün chhiau ngo shikü noin.” Nime nou shanau thaiutha, apaüh aya nou lowanji.

¹⁰Nung amongchiotsünli, Yisu Khrista pem chaithio kiutsün nou sam losiolo-iu.

¹¹Sübao chaithio nou tilaitso angei lowanau tsüshio, nung chaithiolu kankü Yihudahai mesonhoi pungkü nou ajekhaiu pungkü piaküjam yathsüokü chaithio kiuji.

¹²Lüko Khristaüh athontsüyangkün chaithio tsak thioküta Goa uai moknoi.

¹³Nungko yakü apa eh nouso apa hok khemai motaiukün lektso taiukü noin.

¹⁴Tititenai chaithio tsaküh apaüh alosiotsünso athontsüyangkü thapungkiu-e.

¹⁵Naiuso Asio Onthso nou lüko sam hau mitha kiukü chongting apaüh ngioji,

¹⁶“APAOU nou ngioji, ashiau ajekhaiu nousoko ngü ngüsoko shanau nou nung athalu-etsün noin. Ngü ngüso mongpem nai jü ngiokhem nouso thiokiu-e, naiuso nungso ngüso mong da satlute.”

¹⁷Nungphiai apaüh ngiom, “Ngüso angei naiuso aphio nouso ngü loto tsüyangsanshi-e.”

¹⁸Tilai nungso wankiuwanji, loto angei kanlükhunanau chaithio tsüpoushi.

¹⁹Nungtiphe deisinioso, akhongjeitsün ne sübao apa nyih tsangkü ti ayan aa yam sam thaiutha apaüh shan, samüh nung yamai,

²⁰Yisu she nou Asiothang nai sungau mongsongphe,

²¹naiuso Goa tsam khako meson asong noiphe,

²²tsümeikün mongpem ainou sam mong yanthsüophe, samüh ngiotsüo mongpem nou amonglam athapung nai shimkü khuko.

²³Sam pem khiam amei nou tsaowanphe, sam ayang athalutsün tsülemlemkü heloko, tititenai sauüh thalu, apa ngiotsüoting.

²⁴Atsüojin naiuso chhi amei dongai mongchioau thaiutha samüh haisihaine yangluloko,

²⁵naiuso ajantso donli, sam aikü kamau tsüwankü, ajekhaiu titi shimkü shitsün epji, nungti tekkü haisihaine lutsüo-eko.

²⁶Tititenai ngiotsüo ngetsün samüh epkhemküta loüh angei kankeinaito, angei nouso thaiutha loto chaithio poikü tsünoishi;

²⁷lüko mikhem thaiutha ahat noikü taiutsün, naiuso eh nouso heankhemau ahating in poikü noin!

²⁸Khaiunia sauüh Mosa Ngiokhem tsüvesanji, khaiunia nime tsüdekünai süme atsangshei ngio nou apa atsüojinyang tsünoikü ean-iji.

²⁹Naito sauüh hok khemai Goa Thso ngamkeiji, naiuso athalutsün sübao she nou apa losiolu, nung tsüsiokünli yangji, naiuso atsüojin Onthso lutsaoji, asamüh yangtsün nou apa nungtü phopkü titi tsümeikün angja asong epau noin ta yange!

³⁰Tititenai “Athamshitsün ngü nou, ngü laokü kiushi-e” naiuso loüh “APAOU nou meshen hoi mikheme” ta ngiotsün samüh ngeji.

³¹Aa Goa phamong ainou saliau nung thatü ahatau asong tsak!

³²Lüko asamüh awon epküta, sübao chhi nai angja ali-e asong jeilu,

³³asam atao jam nyong khako lutsaokü omhe-in, naiuso amao taonai asam sauhaiüh nung yam tsümeitingkü kankei nungko aikü ajanlutsün theau khemkü noiküla nung lüyangsan.

³⁴Tititenai asamüh akhuothiotsün nai noinso tü tsüojinkü yangkiu, naiuso asamüh meshen thaiutha tekkü amei naiuso asai noitsün jengtsaiu tsak noin ta ngekü monglingkü asam jengtsaiu lupengantsün jeilu.

³⁵Nungtiphe amai laokü eptsünli asam mongsongtsün lawansai.

³⁶Tititenai Goa nou mongchiotsün chhiküta, asamüh athalutsün epau thaiutha asam ajeilutsün poukü noin.

³⁷Tititenai, Asiongio nou ngioji, “Atao intso noiküta, sau ashiao noin nung shi-e; apa tsangkü tsünoi-e.

³⁸Lüko amonglam nou asiohoi aa noi-e; lüko ajantso phoklekü khuwan nai, ngü apa tü tsümonglinge.”

³⁹Lüko sauhai amowanau nou dongai phoklekü khuji, sam ngüso ongko tsüde, lüko onthso kipsanau monglamtsünso ongko noin.