Read Khiamniungan Naga Ibri 11 Bible Online

Ibri 11 - Khiamniungan Naga bible

Ibri 11

¹Amonglam taiuao to samüh tso tsak da yangtaiutsün nung atsüoting ta yangau, naiuso samüh epau tsüshiokün tso tsak tü atsüoting eppe ta yangau nou noin.

²Kümi khaiuniahoi nou ngüso amonglam tsangkü Goa mongchiotsün thalu.

³Amonglam tsangkü goumchi nung Goa Ngio nou shan ta samüh ngelaji, nungtiphe ti epau shiokü noin nung a-epau tsüshiokün ainou sung.

⁴Amonglam nou Abelüh Goa hau chaithio Kain konai ameiting nou kiu. Apa amonglam tsangkü Goa ainou asio khaiunia tsak ta apaüh mitha ep, tiautenai Goa nou apa chaithio paopei loum. Abel to ean lüko apa amonglam chhiüh losaokü tsülaokü chiteji.

⁵Enok amonglamüh apa eantsün tsüthawao-ikü Goa dongai kankü khuwan, sauüh apa epao tsüshio tiautenai Goa nou apa kankü khuwan. Apa kankü mosungankün khako Enoküh Goa mongtsam-ikü noiküla ta asiongio nou ngioji.

⁶Amonglam tsühakü khaiunia sauüh Goa mongleng-iau tsüshio, tititenai sau Goa dongai shiji, apaüh Goa nou noin, naiuso apa yamtsünso hau amai nou kiuji ta amonglam taiau noin.

⁷Amonglam nou Noaüh ashiao taoko thawaoau noitsün apaüh epao tsüshiokün Goa ainou alutsüo lulakü iula. Apaüh Goa tü angio angkü kheng tsak shan nungko apa naiuso apa tsammong kipsan. Athon nai goumchi nou phio-i, lüko Noaüh amonglam tsangkü eptsün Goa ainou asio nou ep.

⁸Tilai Goa nou Abraham tü apa hau kiuao thalutaiutsün shingkhannio nai apa goumchi leankü khuao thaiutha jon, nung apaüh Goa tü angio angao nou amonglam tsangkü noiküla. Apaüh apa shingkhannio leankü apa tiai khuji ta tsüngekü tsalokü khu.

⁹Goa nou apa tü thalutaiutsün shingkhannio nai gohmao khaiunia tsakli apa amonglam tsangkü kih. Goa ainou athalu apako wekü eptsün Isak naiuso Yakob neli apa nejenkhio nai kih.

¹⁰Goa nou alengyamlutkü athanya mongkü shantsün noknio Abraham thaiutha taiukü noiküla.

¹¹Abraham thatü sonan naiuso Sarah apa da khaiunia kihtsün thonanküta po tsak hau iulashiao shiotsün nung amonglam tsangkü noiküla. Apa amonglam taiuao apaüh Goa da thumkü kiukü monglam.

¹²Abraham apa achetsinyimao lelu kiutsün yamko oukong tsünoishi lüko, nung khaiunia tsak ainou thsaosithsoso maou nai kianthsüo nousoli naiuso khiamnok sai nai aveau tsüshiokün singtsoli piakü nyimsane ta ngiotsün thawao.

¹³Nung khaiunia nouso apemüh athalutsün tsüep lüko, laiukünaita nungso epkü mongling, naiuso nung goumchiko ngüso akihthang tsünoikü haiukeitsünso gohmao khaiuniahoi noin ta ngüsoüh amonglam thalokü ean.

¹⁴Sauhaiüh nungtin ngioji ngüsoüh ngüso tengkhaiu shingkhannio tsak thaiutha yamji ta sasakü tsangsheikiuji.

¹⁵Ngüsoüh leankü shitsün shingkhannio thaiutha ngüsoüh yangshidekü tsünoi; ngüsoüh yangshidekü noitünto, ngüso nungai laokü khushiao noiküla.

¹⁶Nungliko ngüsoüh yamtsün goumchi ameiting tsak nou nung aün nok noiküla. Nungtiphe Goa nou ngüso Goa ta apa tü jon-iau tsümiam, tiautenai apaüh ngüso thaiutha noknio tsak khemkü taiukiu.

¹⁷Goa nou Abraham tü apa thso Isak aluat chaithio tsakli kiuao thelutsün nung apa amonglam thaiutha noiküla. Goa nou athalu shantsün nung Abraham noiküla, loüh apaüh meshen thsosa nou aluat chaithio tsak kiuao khemlokü noiküla.

¹⁸Goa nou apa tü ngiom, “Ngü thalutsün thsaosithso nouso ni Isak tsangkü epao noin.”

¹⁹Goa nou Isak nung ee ainou ahkü shi-iao shiokü noin ta Abrahamüh apa mongai monglam, nungti Abrahamüh Isak ee ainou laokü epshi.

²⁰Yakob sei Esau ne hau kha ai thaiutha ouk athalu nung Isak amonglam nou shanlutkiu.

²¹Amonglam nou Yakobüh apa eao nou khatengko Yosep thsoso pungkü hau oukkiu. Naiuso apaüh laikeitsün pailai da nyulutkü Goa amkham.

²²Amonglam nou Yosepüh apa eao atao shisaonai, Israelhai Ijip ainou tsalokü khuao naiuso apa ou tü ngüsoüh titi kankeikü khuao noin nung thaiutha ayamhan kiu.

²³Amonglam nou Mosa methso chetkü phiai, apa posinyiu neüh alei süme tsangkü taiu. Tiautenai ngüsoüh apa methso amei tsak ta ep, naiuso ngüso nokpao ngiokhem lon tsühat.

²⁴Mosa shejikanküta, Farao menyiuthso ün thso ta jon-iau tsüthalukü apaüh amonglam nou shanan.

²⁵Atao sakhalektso thaiutha angei nai monglingtsünko naito Goa khaiuniahoi nousoko bao angja nai haao apa mongchiokü noiküla.

²⁶Khrista thaiutha lochilotsaotsün to Ijip tengkam athum chiai amai alesan noin ta apaüh yang, tititenai apa niothap ashiao noitsün paopei nou ta taiuküla.

²⁷Nokpao mongmat sungtsünlon tsühatkü, Mosaüh amonglam nou Ijip goumchi lean. Apaüh tsüepkün Goa epjili thap, tiautenai lapshikü thapao apaüh nan.

²⁸Aloattsün Aünhong nou Israel hai chongting chettsün melothso tsüloatkü hao apaüh amonglam nou Aasan Sümai shanküta onnemok she nou kouchun nouso da satlutkü taiu.

²⁹Israelhaiüh Aseng Khiamnok nou yan nai, gohwai gohthang nai yantsünli khutsün nung amonglam tsangkü noiküla; tilai Ijip haiüh nung yankü khuao kowe, khiam nou ngüso limlokü mowan.

³⁰Israel haiüh Yeriko noknio chinyatnyi lemkü tsakeinai lungpe loian, nung amonglam nou noiküla.

³¹Ajisiwop chhikü aakihtsün Rahab nung Goa tü angio tsü-angkünso loattsün ainou aasan, tiautenai apaüh Israelhai akauthahoi nouso monglingkü nialo nung amonglam nou noiküla.

³²Loüh angioshi tümo? Ngü Gideon, Barak, Samson, Jeptha, David, Samuel, naiuso E-po nouso apem thaiutha chiteshi-etünai, atao nou tsüsaiu-e.

³³Amonglam nou ngüsoüh ehli naiuso shingkhannio nouso athum shiolo. Ngüsoüh ayamtha nou chhin naiuso Goa nou thalukü taiutsün ngüsoüh ep. Ngüsoüh chongkhao son nouso kiap.

³⁴In oukong lunyat, salaiu nou loatao noitsün khako nou thakhu. Ngüso tsaosilaokü noiküla lüko oukongkü iulashin; ngüso ehli nai akongting noiküla, naiuso gohmao süpai oukong shiolo.

³⁵Amonglam tsangkü nyiuhaiüh ngüso ee tsammong nouso aa nai laokü epshi. Amao nouso, meshen kipsanloao tsümongchiokü, aa amei nai ashikü shishiao thaiuthako ajeiat kiutsün epkü ean.

³⁶Ajantso da lotsaolochi naiuso auo nou shiuh, naiuso amaohai sonkhiang auo nou kekü wan naiuso ajantso akhotsamai thiowan.

³⁷Ngüso lung nou yakkat, ngüso pailin sah nou linthat, ngüso sah nou heat. Ngüso tsosilu, ajeiat naiuso tsüvesankü iulakü won naiuso Onnemok khun tenkü tsakei.

³⁸Goumchi nou ngüso thaiutha tiko meikü tsünoiküla! Ngüso liutsa nai, choi nai, ken naiuso khan nouso ai asoloao tsünoikü khekeitsünsoli tsakei.

³⁹Nungso chikü nou ngüso amonglam tsangkü shiolotsün titi athanga sattaiutsün tsak noin! Külüko ngüsoüh Goa nou thalutaiutsün tsüep,

⁴⁰tiautenai Goa nou sam thaiutha nungtü simkü meikü tsak thatlo-iu. Apa ayangtaiu nouto nung samko aikü noi nailu ngüso thapemkü iula-e.