Read Khiamniungan Naga Ibri 12 Bible Online

Ibri 12 - Khiamniungan Naga bible

Ibri 12

¹Sam thaiutha to hoi asongli mithahoi noin. Nungtiphe sam yam dumjeitsün chikü naiuso sam hejeiantsün angei chikü ainou punge lokü sam thaiutha athattaiu nou tü ashe-eko.

²Yisu sübao da sam amonglam ayachu naiuso athon saokü noin, apa ta niothap taiuko. Apaüh paiphu angja thsale tsülean! Nunglikoto ashiao nou amongling ta yangtaiukü paiphu nai angja jeilu naiuso lo apa Goa noikham nai noin.

³Nungshioko asamüh tsütanau naiuso asam onthso hokkha tsüthekau thaiutha sauüh meshen thako chhitsün angeihoi tsaotsün kiplu, apa thaiutha lüyangsan!

⁴Asam loüh angei thako she nou motsangkün lektso li-ekü hao kiapkü tsünoi.

⁵Naiuso alutsüotsün ngio sübao nou thso nousokoli asamko thalu-eji, nung ngio asamüh beyaniuso? “Jü thso, APAOU nou ni lothanai mong lükiu, naiuso ni ta apaüh thutnai lamonghen.

⁶Tiautenai APAOU nou sau tü tsüojinji apa thutji, naiuso apaüh loutsün thso tsak tü shiuhji.”

⁷Asamüh jeilutsün athatsam thaiutha noin. Goa nou thso nousokoli asam tü kankeiji, tititenai Po nou tsüthutkün nungtin thso ajantso noin süne?

⁸Lüko sübao athatsamtsün nai apem hakü, asam nungtin ko tsühanai, naito asam ayam nai shitsün thsoso tsüde, lüko peikhem thso.

⁹Sam nyih nai Po yamko nai, ngüsoüh sam luhat naiuso samüh ngüso tü asuhat kiu. Naito samüh titengkü sam Onthso Po nou ta asuhat thumkü kiu-e naiuso aa kih-e!

¹⁰Tititenai ngüsoüh ti ayam ta yang, ajekhaiu thsaothsaokü thaiuthalu sam thut, lüko apaüh samhao apa asio nai haoson kiuhaau sam amai thaiutha thutji.

¹¹Sam tilai luhatji, nung sam tü amongling tsüdekü amongmatao atao tsak shantsünli noiji. Nungphiai sauhai nungtin aluhat tsangkü thut, ngüsoüh asio aa aalu paopei yamheji.

¹²Asam ouchankü noitsün pha nouso lüloksan, naiuso asam singkau ngaongaotsün oulükong!

¹³Yam alu nouso ai lütsakei, nungaito chione haiüh atsakeiau shio-e, lüko nungliko alomeibao lomei-e.

¹⁴Apem nouko nokmei, naiuso asio noutü simkü sauühlünou APAOU tsüeppe, nung asio nou tü komkü lükhu.

¹⁵Tsüngean, ajantsoüh Goa asio tsüngoi-e, tsüdekünai akhosak pai-eiu ajantso sungkü asam angja-i-e, naiuso nungüh piakü lungei-e;

¹⁶tsüdekünai chihchio tsak thaiutha meshen petche tengkam janantsün Esauli, ajantsoüh don lutsaokü, tsütsamtsütsüo kankeiau thaiutha kowe-e nung thaiutha tsüokü lüthap.

¹⁷Tititenai nungphiai apaüh tengkamau aiujikan nai apa tsüep, tititenai apa Po mong shioluau thaiutha Esauüh niochekhiam saokü kowekü yam lüko apaüh apa Po ainou nung tsüeplu ta asamüh ngen.

¹⁸Asam Israelhai shitsünli tsüshi, Sinai King nai in jeetsün asamüh ngengeji, anyakhem naiuso thengmia, naiuso jangongmat ngem, ah-ou-ahsheih,

¹⁹naiuso sangngem tsak khaiuniahoi nousoüh tilai lula, ngüsoüh nung sangngem müjam tsülu-ishiau koja.

²⁰Tititenai thainian tsaküh lüko nung king nou tü thantan nai, nung lung nou yakkat-e, ta nung ngiokhem nou ngiotsün ngüsoüh tsüjeilu.

²¹Naiuso nung sungtsün ahattao tsak noiphe, Mosaüh ngiom, “Ngo thatülu hatkü ngaongaoji!”

²²Lüko asam to Zion King, naiuso aa Goa Noknio nung aün Yirusalam, naiuso avesanau tsüshiokün aün honghoi,

²³aün nai nian sattsün aya chettsünso ajeiaikam asong, donthe, chikü mikhemtsün Goa, naiuso thapungkü iulatsün asiohoi onthso nouso,

²⁴naiuso ayan Athalu-etsün jetko naptsün Yisu, naiuso Abel tü tekkü meikü nou ngio chitetsün she jatluttsün, nungso chikü dongai shikü noin.

²⁵Ngio chitetsün tü asamüh tsülukü tsünoiau lütsüolu. Tititenai sauüh goumchi ko alutsüoau ngio chite, nung ngio tsüloukünso tsüthakhu naito, sauüh aün ainou alutsüoau ngio chite, apa ainou laokü khunai, sam tekkü tsüthakhu-e!

²⁶Apa sang nou goum tü saiukei, lüko lo apaüh thalokü ngiom, “Loühjam ngü goumchilu tsüde aün lüko saiukei-e.”

²⁷Naiuso, “loühjam,” nung ngio nou saiukeiau tsüshiokü jengtsaiu nouso noiau thaiutha, ashantsün jengtsaiu nouso asaiukeiau shiokü wantsün hanji.

²⁸Nungtiphe asaiukeiau shiotsün nokshing lu nou shioko, sübao atsüojin tsangkü samüh asuhat naiuso ahat nou Goa mongtsamau yathsüotsün chhiau, nung atsüojinko sam noiko.

²⁹Tititenai sam Goa to achetheantsün in noin.