Read Khiamniungan Naga Ibri 13 Bible Online

Ibri 13 - Khiamniungan Naga bible

Ibri 13

¹Khristan deisinioli tsaküh tsak tsüojintsün nai tsülaokü lünoi.

²Asam tsamai mesanhai monglingkü niathioau lüyangshi, tiautenai nung tsangkü ajantsoüh tsüngeankü aün honghoi nialotsün chhikü noiküla.

³Asam akhou tsamai noinsoko hakü noinli akhou tsamai noinso lüyangsan. Asam ngüsoko aikü omhejili omhekü noitsünso lüyangsan.

⁴Tsamsigoh shantsün to chikü nou asuhat kiukü theau maikü noin, naiuso tsammongpo nouso si tsammongnyiu nouso tsaküh tsak da monglamekü theau noin. Ajisiwop hoi naiuso tsütsamtsütsüokü chhitsünso tü Goa nou mikhem-e.

⁵Asam aa tangka tsüojintsün ainou pungekü lünoi, naiuso asamüh ti taim nungko mongtsamkü lünoi. Tititenai Goa nou, “Ngü asam tilaitso tsüwane; naiuso tsüleane” ta ngiom.

⁶Naito, sam mongsongkü, “APAOU ngo halotsün noin, ngo hatkü tsünoi-e. Ngo tü sauüh ti chhiau shio-e?” ta ngioko.

⁷Asam niakeikü shitsün aheihoi, sauhaiüh asam tü Goa ngiongem chimkiu, ngüso lüyangsan. Ngüso aa titi kihkü ean, lüyangshi küta ngüso amonglam sailutsün lü-iula.

⁸Yisu Khrista münyi, lonyi, naiuso athontsüyang wekülu noin.

⁹Asam atsandetsün in amomo nou ayamtha ainou lanialükhun-i. Eheshiu thaiutha ngiokhem angtsün tsangkü tsüdekü, Goa ün atsüojin ainou mongkhei ai oukong epnaibao mei; sauhaiüh nungtin ngiokhem angio angji ngüso nungsoüh tsühalo.

¹⁰Yihudahai amthang ko yathsüotsün mesonhoi nousoüh sam amthang ainou aloat chaithio thiotsün titso heau ayam tsünoi.

¹¹Yihudahai Akhengting Meson nou thainian she nou Thatü AsioThang nai angei thaiutha chaithioau kankü shiji; lüko thainian pem nou to pechiai jahwanji.

¹²Nungshioko apa sheüh khaiuniahoi angei ainou losioau thaiutha Yisu lüko noknio pechiai lah-an.

¹³Nungtiphe samüh pechi nai apa amiam haoson thehaau thaiutha apa dongai khuko.

¹⁴Tititenai nung goumchi nouko sam ün asaita hau thaiutha noknio tsünoi; samüh ashiau noitsün noknio ta taiuji.

¹⁵Naito, samüh apa APAOU ta sam sonthamüh thalutsün sübao sam chaithio noin, nung Yisu tsangkü sam ün aloat chaithioli Goa hau asaita alomsan nou kiuko.

¹⁶Amei chhiau naiuso tsaküh tsak halo-eau labean, tiautenai nung Goa monglingitsün aloat chaithio nouso noin.

¹⁷Asam ün aheihoi angio lü-ang naiuso ngüso ngiokhem tü lühoilut. Tiautenai ngüso chhi Goa hau kiuaulu noiphe, ngüsoüh asam onthso khütha nai aalu tsünoikü jiokü jimji. Asamüh ngüso ngio angnaito, ngüsoüh monglingkü ngüso chhi chhi-e; lüko asamüh tsü-angkü naito, ngüsoüh nungso mongmatkü chhi-e, naiuso nungüh asam tü ahachu titso tsünoi-e.

¹⁸Sam thaiutha tsülaokü misao asao. Tiautenai samüh atao chikü nai ayamtha nou chhiau aiuji, nung sam mongpem yanthsüokü noin ta samüh monglamji.

¹⁹Naiuso Goa nou ngo asam dongai tsütsangkü hongau thatü mongkü misao lüsao ta ngü asam tü kojaji.

²⁰Apa ee saokü chaithio thumkü kiutsün tsangkü sam APAOU Yisu Khrista sau Onnemok jimtsün Asongting noin, Goa nou apa ee ainou ashikü shi-in, nung tsangkü athontsüyangkün athalu-etsün ii thaolut. Aalu Goa nou apaüh mongchiotsün chhi-iau asam hau asamüh poutsün amei alum lükiu, naiuso apaüh Yisu Khrista tsangkü sam mongko amongchiotsün ti noin nung achhi-i. Naiuso Khrista tü ajinka athontsüyang lünoi! Amen.

²²Jü deisinioso, nung alutsüo ngiongem nou da asamüh mongaulaiukü a-anglu ta ngü asam tü kojaji; tititenai ngü asam hau sattsün thsamsat nungto laiukü tsüde.

²³Sam deisinio Timothi akhouthiotsün ainou sokiu ta ngü asam hau ngela-iau aiuji. Apa tsütsangkü shinaito, apa ngüko hakü asamko eppe-e.

²⁴Asam niakeitsünso naiuso Goa ün khaiuniahoi chikü hau sam salam lükiu. Italy nai noitsün deisiniosoüh asam hau salam hongji.

²⁵Asam apem ko Goa ün atsüojin lünoi. Amen.