Read Khiamniungan Naga Ibri 6 Bible Online

Ibri 6 - Khiamniungan Naga bible

Ibri 6

¹Loto, sam khaai khuko naiuso ayathsüo donthe ngem atsande nouso sam phiai wanko, Samüh Goa ainou pungekü khutsün atheao tsünoikün chhi naiuso Goa da yaang monglamtsün athanya lahsanko;

²khiamlim thaiutha chimtsün naiuso pha nou thangluttsün ee ainou ahkü shitsün naiuso athontsüyang ngiojane-e.

³Goa nou mongchio naito samüh nung chhi-e.

⁴Tititenai sauhai jam awonkü noiküla, naiuso aünhai paopei taplu naiuso Asio Onthso nouko hatsün iula,

⁵naiuso Goa ngio amei naiuso ashiau vetao oukong nouso taplu.

⁶Naiuso loian, nungai müjam mong phoklekü ngüso ayan iulakü shanshiau nou ashioau tsüde! Tititenai ngüsoüh meshen thaiutha Goa Thso Paiphu nai müjam lalutji, naiuso apa nyong khako lomiamji.

⁷Tititenai eiu sübao meshen chiai piakü jam outsün ao chipthio-ji, naiuso sauhai thaiutha nung alopai lüko lopai ngüso thaiutha thamaikü kiansinga samiji, nungko Goa ainou uok epji.

⁸Lüko nung tsaopai naiuso chih-ai samsan naito, nung tiau tsüthe, nung Goa nou ahat nai athesan kiuküta in nai jawanji.

⁹Lüko atsüojin haiso, samüh nungli chite lüko, samüh asam thaiutha atsüo ta yangji. Asam aasantsün dongai asam ouk meijeng ta samüh asam ngeji.

¹⁰Tititenai asamüh asiohoi hachu, naiuso lo lüko hachuji, naiuso nungüh Goa nian thaiutha asamüh titi atsüojin han nung chhi beyanauli apa tsütsüokün tsüde.

¹¹Lüko asam khaiunia pungkü nou athon saokü asam ayangtsün nai amonglam taiuau thaiutha nungti kowetsün wekü hanau shiokü hau noin.

¹²Asam cholak iula-iau tsümongchio, lüko ajeilutsün naiuso amonglamtsünsoli iula-iau aiuji, naito Goa nou ti thaloum nung asamüh eppe.

¹³Tilai Goa nou Abraham tü thalu, apaüh thaluau apa tü songkü sau tsünoiphe, apaüh meshen chija nou thalokü ngiom,

¹⁴“atsüoting ngü ni hau ouk nou kiu-e.”

¹⁵Abrahamüh jeilu, nungtiphe apaüh Goa nou thalutsün ep.

¹⁶Tilai khaiunia nou ngiomong thaluji, apaüh meshen tü songthsokün nian jonji naiuso nung athaloutsün nou misingem chikü losangji.

¹⁷Nungko Goa nou thalutsün teng kamtsünso tü meshen chija ali-eau tsüshiokü nou piakü hanau mongchiokü,

¹⁸naito nungso jengtsaiu nime ali-eau tsüshio naiuso Goa nou sübao thaiutha yaang ngioau tsüshiokü noin. Nungtiphe sam sauhaiüh apako aasan eplo-iu nungso ayang sam khako taiukiu nou thatü mongkü thaloau mong losungkiu.

¹⁹Sam aakih thaiutha nung ayang samüh kheng nyingjeitsün tsakli taim. Nung kipsankü naiuso atsüoting noin, naiuso akhongjeitsün ne yankü aün amkham tsam akhengting asiothang nai napji.

²⁰Nung akheiai Melkizedek saili athontsüyangkün Akhengting Meson tsak iulakü kha ai khutsün tsak khekkü Yisu sam thaiutha nap.