Read Khiamniungan Naga Ibri 7 Bible Online

Ibri 7 - Khiamniungan Naga bible

Ibri 7

¹Nung Melkizedek Salamhai nokpao naiuso Akhengting Goa meson noiküla. Tilai Abraham ehlitsün nai nokpao püle shioloküta yashin apa ko Melkizedek pheten naiuso oukkiu,

²naiuso Abrahamüh apaüh thaloutsün ainou apa hau haoson che kiu. (Melkizedek aya nian nung, “Asio Nokpao,” naiuso apa Salamhai nokpaophe apa nian athat nou “Nokmei Nokpao.”)

³Apa po tsüdekünai apa nio tsüdekünai apa paosipo ngiolat ti tsünoi: apa chettsün naiuso eantsün ngiolat lüko tsünoi. Apa Goa Thso khekkü; apa athontsüyang meson noin.

⁴Lo sau hau Poteng Abrahamüh ajulotsün jengtsaiu atengteng nouso ainou ekve kiu, nung khaiunia titi asong noiküla, nung lüyanglu.

⁵Naiuso ngiokhemli hoi nouso ainou nungti ngüso Abraham ainou nyimsankü, atsüoting Levi thsoso meson chhi eptsün nousoüh meshen deisinioso nouso ainou ekve loau ngiokhem ep.

⁶Melkizedek to Levi ainou nyimsantsün tsüde, lüko Goa athalutsün eptsün khaiunia Abraham ainou apaüh ekve shiloküta apa oukkiu.

⁷Asongthso nou ehenthso nou oukkiutsün angeshio noin.

⁸E-po nouso yamko naito, ekve nung eantsün khaiunia tsangkü shiloji, lüko Melkizedek thaiuthako naito, ekve nung aa noitsün khaiunia tsangkü shilo, ta nung Asiongio nai ngioji.

⁹Ngio-etünai, tilai Abrahamüh ekve kiu, Levi (sau thsaosithsoüh ekve lokamji) ngüsoüh lüko kiu.

¹⁰Tititenai Levi loüh mochet, lüko angioau to apa paosipo Abraham pem nai noikü Melkizedeküh apa pheteen.

¹¹Naito, Levihoi meson sai nou athapung iulakü noitünto (tititenai nung khemai hoi nousoüh ngiokhem lusan.) Aron saili tsüvelukü, Melkizedek saili amao meson tsak sungau loüh ti poukü tsünoi-ela?

¹²Tititenai meson sai li-eannaito, ngiokhem lüko li-eanela.

¹³Naiuso sam APAOU sauüh nungso ngiom, amomo mele tsak ün, naiuso apa mele mongko nousoüh to sauüh E-po chhi tsüchhi.

¹⁴Apa Yihuda mele mongko haove tsak nai chet ta nung meikü ngeji, naiuso tilai Mosaüh e-po thaiutha ngiom, nung mele nian tsüjonsan.

¹⁵Nung tekkü tsangsheiji: Melkizedek khekkü meson amao tsak sungiu.

¹⁶Apa to khaiunia ngiokhem tsangkü meson ao shantsün tsüde, lüko athontsüyangtsün aa oukong tsangkü shantsün noin.

¹⁷Tititenai apa thaiutha nung atsangshei kiukü noin. “Melkizedek saili ni athontsüyangkün meson the-e.”

¹⁸Tititenai aya ngiokhem outsükong naiuso atheau tsünoikün kengla-ankü noin.

¹⁹Tititenai Mosa ngiokhem nou titso thapungkü shanau tsüshio. Naiuso lo sam Goa dongai shimkü shiau mongyang ameiting tsak kiu-iu.

²⁰Nungko hakü nungai Goa ün athalou-e noin. Tilai amaohai meson au shan, nungaito nungtin athalu-e tsünoiküla.

²¹Lüko ngiomongshing tsak, “APAOU nou athalou-e ngiomongshing tsak shaniu, naiuso apaüh nung laokü tsüloshi-e: ‘Ni athontsüyangkün thaiutha meson tsak the-e ta ngiokü Yisu meson iula-in.’”

²²Naito nung amomo shantsün Yisu lüko ameiting athaloutsün tsak mongkü iulan.

²³Loüh amao amothi tsak noishin: nungai amao mesonhai noiküla, naiuso ngüso eanphe ngüso chhi tsülaokü khuao tsüshio.

²⁴Lüko apato athontsüyangkü noitsünphe, apa meson chhi amaohai ta tsükanlut.

²⁵Nungtiphe sauhaiüh apa tsangkü Goa dongai shimkü napji, apaüh ngüso thaiutha kojakiuau asaita aa noiphe, apaüh apemai ngüso kipsanau meikü shioji.

²⁶Nungtiphe sam pouthakiutsün meson to Yisu. Apa asio noin; apa da aphio naiuso angei ti tsünoi; apa angeihoi ainou pungekü taiukiu naiuso aün nouso khengai loksan.

²⁷Apa ajekhaiu pungkü nung meson nouso khekkü, aya meshen angei thaiutha küta khaiunia nouso angei thaiutha chaithio thioau poukü tsünoi; tiautenai apaüh tilai meshen aa chaithio kiu nungai apem thaiutha asaita hau jamao thekü kiuwan.

²⁸Tititenai Mosa Ngiokhemüh khaiunia tsaosilao sunkü akhengting meson theau chosanji, lüko ngiokhem phiai shitsün athalu-etsün ngio nou athontsüyangkün thaiutha thapungkü iula-itsün Thso tsak chosanji.