Read Khiamniungan Naga Ibri 8 Bible Online

Ibri 8 - Khiamniungan Naga bible

Ibri 8

¹Sam ngio apem nou nung: samüh Akhengting Meson tsak taim, apa aün nai Asongting nokpao noikham uai moknoi.

²APAOU nou shantsün asio nai atsüoting nejenkhio mongai yathsüotsün tsak iula, nungtin nejenkhio atsüoting sübao khaiunia nou tsüdekü APAOU nou shan apa nungko noi.

³Tititenai Akhengting Meson apem ün paopei naiuso chaithio thioau chosanji. Nungtiphe chaithioau apa lüko tso tsak taiukü hau noin.

⁴Apa goumchi nai noitünto, Yihudahai Ngiokhem tsangkü aiutsün paopei nouso chaithio thioau meson nouso noiphe, apa tilaitso meson tsü-iula-ela.

⁵Meson chhi ngüsoüh chhitsün nungto aün nai ti noin nunglu asotsom tsaklu chhiji. Mosaüh chhitsünlilu nung wekü noin. Tilai apaüh Nejenkhio lah au noiküla, Goa nou apa tü ngiom, “Ni tü king nai noitaoko hantsünli alum chhiau tsüokü lüthe.”

⁶Lüko lo ngüso tü songtsokü Yisu hau Meson chhi kiuwaniu, nungto apaüh apa khaiunia si Goa jetko athalutsün lingthatsün tü meitsokü noin, tiautenai nung ameiting athalutsünso chiai tsakü noin.

⁷Ayating athaloutsünso tü titso aphio tsüsuntünto, müjam athaloutsün titso poukü tsünoi-ela.

⁸Lüko Goa nou apa khaiuniaso tü aphio epkü apaüh ngioji, “Ngü Israel kau naiuso Yihuda kau nouko athalou-etsün ayan tsak shane, nung ajekhaiu nouso shiji ta APAOU nou ngioji.

⁹Lüko Ijip goumchi ainou ngüso, pha nai helokü niasantsünko nai nai ngü ngüso paosiposoko, athatlutsünli athalutsün ayan nou tsünoi-e; tititenai APAOU nou ngioji, “Ngüsoüh ngo tü thalutsünko tsütsa, nungtiphe ngü ngüso tü tsülu.

¹⁰Tititenai APAOU nou ngioji, “Nungso ajekhaiu yanlükhunkütünai, Israel kau nouko ngü nung athalutsün shane; Ngü ngüso mongai jü ngiokhem nouso taiu-e, naiuso nungso ngü ngüso mongpemai lüko sat-e, küta Ngo ngüso Goa noi-e. Naiuso ngüso jüsahoi the-e.

¹¹Naiuso ngüso khaiunia pungkü nou, ‘APAOU lüngelu’ ta nok naiuso khaiunia sau tü tsüchime. Tititenai ngüso ongko ehenting ainou asongting saokü apemüh ngo nge-e.

¹²Tititenai ngo ngüso aphio thaiutha atsüojin yange, naiuso loto ngü ngüso angei tsüyangsanshi-e.”

¹³Apaüh athaloutsün ayan tsak ta ngionai, ayating nou akeng iula-iu; lüko sübao akeng naiuso athe noin nung loto tsü-epshi-e.