Read Khiamniungan Naga Ibri 9 Bible Online

Ibri 9 - Khiamniungan Naga bible

Ibri 9

¹Ayating athalutsün nou amkham thaiutha ngiokhem nouso, naiuso amkhamthang noiküla.

²Tititenai nejenkhio tsak shankü noiküla, naiuso ayating tsampai nai tson taiuthang naiuso then naiuso Goa khako taiutsün themtsai noiküla, nungtü Asiothang ta jonji.

³Naiuso akhongjeitsün ne nime nou kheiai Asioting tsampai ta jontsün nejenkhio noi.

⁴Nungai thangkhoinek jahtsün chaiou amthang tsak, naiuso chikü lemkü chaiou nou shantsün Ngiokhem Paidan tsak noiküla, nungko Mana taiutsün chaiou lak, naiuso Aron ün pailai naiuso athalutsün lungkhio nouso noiküla,

⁵naiuso nung khengai ajinka Cherubim nou atsüojinyang noikham sojeikü noiküla, nung jengtsaiu nouso thaiutha samüh lo thanekü chiteau tsüshio.

⁶Lo nungso khemkütünai, mesonhoi nou ayating nejenkhio nai sungkü amkham chhi chhiji.

⁷Lüko nime nou Akhengting Meson lu, pon tsak ko jamlu napji, nung she hakü apaüh meshen thaiutha naiuso sahoi nou tsüngekü chhiantsün angei thaiutha thioji.

⁸Loüh nejenkhio aya nou noin lektso Asiothang nai sungtsün yam loüh mongesan ta nungti Asio Onthso nou tsandeji.

⁹(Nung nejenkhio lo noitsün atao thaiutha athatau tsak noin.) Nung amtsünso tü mongpem thaiutha tsüthapungkiukü nou paopei naiuso chaithio kiuji.

¹⁰(Eheau, ashiu au, naiuso atsaowantsün in amomo thaiutha, nungso müjam shanshitsün atao mosaokün lektso akankeiau nyih saisile ngiokhemlu noin.)

¹¹Lüko Khrista Akhengting Mesonli chhi amei nouso lo noi nousoli shaniu. Nejenkhio sübao mongai apaüh yathsüoji nung songtso naiuso tekkü athapung noin, nung khaiunia nou shantsün Nejenkhio tsüde, nung goumchi ashantsün uojei haoson tsakli tsüde.

¹²Naiuso won si jangtsopong nouso she tsangkü tsüde, lüko meshen she tsangkü, apaüh athontsüyangkün akipsan epkü Asiothang nai asai thaiutha nap.

¹³Tititenai angei nouso da won naiuso jangtsopong she naiuso jangtso sangnai pou loluttsün nou nyih yanthsüokü losiokü nai,

¹⁴Khrista sau athontsüyang Onthso thsülupia tsüpokü meshen chija Goa tü amkham, apa she nou aa Goa yathsüoau thaiutha asam mongpem ee chhi nouso ainou titi tekkü yanthsüo-iji?

¹⁵Nungshioko sauüh ayan athalutsün tsak lingtha nung tsak nou Khrista noin, naiuso sauhai Goa nou jonkü noin ngüsoüh athontsüyangkün ouk Goa nou thalutaiutsün eppe. Nung chhiau shio, tiautenai nungai ee nou noiküla, sübao nou khaiuniahoi aphio ainou khaiuniatsüo iula-in, nung ayating athalutsün oukong nai ngüsoüh chhin.

¹⁶Amongchiotsün yamko nai nung khaiunia sauüh shanküta ean, nung atsangsheiau poukü noin.

¹⁷Tititenai eantsün sungnaibao athalutsün shinapji, tititenai nung shantsün aa noi nai, nung tilaitso oukong tsütaiu.

¹⁸Nungtiphe aya athalutsün lüko she tsühakü tsüyathsüo.

¹⁹Tilai Mosaüh Ngiokhem nou ngiotsünli ngiokhem apem sahoi khako chitekhem, apaüh khiam naiuso jipon aseng naiuso laoshang nouko jangtsopong thso naiuso won she nou,

²⁰thsam nou tü naiuso sahoi apem tü satlutkü ngiom, “Athalutsün she sübao asam thaiutha Goa nou ngen, nung noin.”

²¹Nungtü phopkü apaüh nejenkhio naiuso amkhamtsün lak chikü nai nungtilu she satlut.

²²Ngiokhemli she nou losioji, naiuso she tsütsapengkü nai, angei wankiutsün tsünoi.

²³Nungtiphe nungsoüh aün nai noitsün thaiutha lulutsün nouso losioluau poukü noiküla, lüko nungsoko aün nouso meijeng chaithio nou losioluau poukü noiküla.

²⁴Tititenai atsüoting Asiothang khektsün lulukü pha nou shantsün Asiothang tsak nai Khrista tsünap, lüko lo apa sam thaiutha Goa khako songau aün nailu nap.

²⁵Lüko Akhengting Meson nou moushe kankü, pon pungkü asiothang nai naptsünli Khristaüh piaküjam apa chija chaithioau tsünap.

²⁶Nungti tsüdekünaito goumchi shantsün ainou apa piaküjam angja epkü noi-ela. Lüko lo apaüh meshen chaithio nou angei beyanau thaiutha vetao nouso athon nai jamlu ngesan.

²⁷Khaiunia pungkü jam eao noin, naiuso nungphiai Goa nou mikhem kiu-e.

²⁸Nungti khaiunia piakü ün angei thsa kanau thaiutha Khrista jam chaithio kiukütünai, apa müjam angei tsühakü apa tü taiutsünso hao aasan kiuao sunge.