Read Khiamniungan Naga Yakob 1 Bible Online

Yakob 1 - Khiamniungan Naga bible

Yakob 1

¹Goa naiuso APAOU Yisu Khrista yathsüotsün Yakob ainou: Goa ün khaiuniahoi goumchi apemai pengpunkü noitsünso dongai salam.

²Jü deisinioso, tilai asam athelu in pungkü waoheji nungai asamüh nung aküomei ta lüyang,

³tilai asam amonglamüh nungtin athelu shioloe, nungai ajeiloau shiotsün oukong nou sung-iji.

⁴Asam tiaitso tsüangjakü saiukü naiuso thapungkü iulaau thaiutha, nung ajeilutsün thapemkü lü-iula-i.

⁵Lüko asam ongko ajantso mongthat mongsai nou tsüsaiukü noi nai, sauüh apa hau mongyang kiu-e, nung Goa tü apaüh misao nai lüsao. Tiautenai Goa nou yaangkü tsüojin nou chikü hau kiuji.

⁶Lüko asamüh tilai misao-e, tsühenyitengkü monglamkü sao-au noin. Sauhai henyiji nungsoto khiamnok nai ahsheih nou khiampek shipkü khushita kankeitsün khekkü noin.

⁷Nungtin khaiunia tsak nou apa chhitsün apemko mongsongkü shanluau naiuso athattaiu au tsüshio,

⁸apaüh APAOU ainou tsotsak eppe ta tsüyangau noin.

⁹Amonglamtsün sau tsosilu noin tilai apa Goa nou tenthsaji nungai monglingau noin.

¹⁰Naiuso memei nou apa meshen amemei-itsün haoson nai lümongling, tititenai sang taoponli apa sappane.

¹¹Tititenai aje thatü jekkü sungji, naiuso sang wonanji, naiuso taopon seianji, naiuso apa alengmei mowanji, nungti memei khaiunia meshen chhi ainou sappankü khu-e.

¹²Sauüh alilu jeiluji apa thaiumei; tititenai apaüh alilu shioloküta aa kandio sübao APAOU tü tsüojintsünso hau kiuau apaüh thalu, nung apaüh eppe.

¹³Tilai khaiunia tsak da lilu-e, “Goa nou ngo liluji” ta khaiunia sauüh langio, tititenai Goa da tsümeikü nou tilaitso liluau tsüshio, naiuso apaüh sau tsüliluji.

¹⁴Lüko khaiunia tsak tilai apa meshen achinek nou tenlükhunji, naiuso paiulokü khuji, nungai apa liluji.

¹⁵Nungai achinektsün nou pem tsükengkü iulakü angei chetsanji; naiuso tilai angei nou sungjikanji ee nou shiji.

¹⁶Ngo tsüojintsün deisinioso, asam lasapthiolu!

¹⁷Athapung paopei amei pungkü nou akiutsün nung aün ainou saoji; aün awon nouso shantsün tsüli-eshiji, tsüdekünai ah-khemso tsünoi, nung Goa ainou shiji.

¹⁸Apaüh shantsün ongko sam aya eiu amei theau thaiutha, apaüh meshen mongchiotsün ngiotsüo ngio tsangkü sam chetkiu.

¹⁹Ngü tsüojintsün deisinioso, asamüh nung angetaiu! Khaiunia pungkü alula au lükhaulao, lüko achiteau yamlukü lüthe naiuso mongmat sungtsün yamlukü lüthe.

²⁰Tititenai khaiunia amongmat nou Goa asio tsüchhisanji.

²¹Nungtiphe asamüh tsüyanthsüokün saisile naiuso tsümeikün chhi nouso apem lüwan. Amongpemai thomthiotsün ngio sübao nou asam kipsanau shiom, nung amongmei nou lülo.

²²Lüko asamüh lulaküta chhiao tsü-iulakü meshen chija lasapthiolo.

²³Sauhaiüh ngio luküta chhi tsü-iulakü, alutsünlu iulaji, apa sousaiu nai meshen soh da saiutsün khekkü noin;

²⁴tititenai apaüh meshen soh da saiuluküta khuji, naiuso apa soh titi noiküla nungailu apaüh beyanji.

²⁵Lüko sauüh atsüoting ngiokhem luji, naiuso luküta tsübeyankü chhiao iulaji, nung khaiuniaüh chhitsün nai ouk noin.

²⁶Khaiunia ajantsoüh apa donthe amei ta yangji süne? Apaüh meshen lei tsüthatsangkü naito, apa don atsüo tsüde naiuso apa meshen chija sapthioloji.

²⁷Po nou Goaüh asio naiuso atsüoting donthe ta yangtsün to nung noin: mejetthso sei jihi nouso ngüso angja nai paotsangtsün, naiuso goumchi achinyan nou tsülongeilokü taiulotsün noin.