Read Khiamniungan Naga Yakob 2 Bible Online

Yakob 2 - Khiamniungan Naga bible

Yakob 2

¹Ngü tsüojintsün deisinioso, sam APAOU Yisu Khrista ajinka da monglamtsünsoli phaphi phamong lakankei.

²Asam amkham tsamai chaiou khiaptso naiuso ajin uokü tholokü khaiunia tsak shinai naiuso ne athe thokü tsosiluhai tsak shinai,

³asamüh nung neshe ajin uokü thotsün tü asuhat kankeikü, “Ni nungko amei nai anoi,” ta ngiokü, naiuso tsosiluhai tsak nou tü, “nungai khuküta tsakü anoi, tsüdekünai nungko jühokngamai anoi, ta ngio nai,

⁴asam ongko asam chija janpaitsün naiuso mongyang tsümeikü taiukü mikhem shantsün ko asam aphio noin.

⁵Ngü tsüojintsün deisinioso, anglu! Goumchiko sauhai tsosilu noin, Goa nou ngüso amonglam nai memei iulaau naiuso apa da tsüojintsünso tü apaüh thalutsün nokshing tengkam kamau chosan.

⁶Lüko asamüh tsosilu nouso da thangmang! Memeihaiüh asam mikhemtsünso dongai tsütenlükhunso?

⁷Asam hau kiutaiutsün nian amei nou lochikü chiteji.

⁸Asiongio nai, “Aphaosiposo tü meshenli lütsüojin,” ta ngiotsün nung ngiokhem asong nou asamüh thawao-i naito, asamüh meikü chhiji.

⁹Lüko asamüh khaiunia kha thapkü phaphi phamong kankei nai, nungai asam ngiokhem lotheantsün, naiuso asamüh angei sunloji.

¹⁰Sauhaiüh ngiokhem nouso kankeiji lüko tsak ko phiowan nai, apa apem nai aphio iulaji.

¹¹Tititenai “tsütsamtsútsüo lakankei” ta sauüh ngioji, apaüh loüh, “Ni laluat,” ta ngiom. Ni tsütsamtsütsüo tsükankei lüko khaiunia luat nai, ni ngiokhem lutheantsün iula-iu.

¹²Khaiuniatsüo ngiokhem nou asam mikhem epau nouso ta ngekü, nungti asamüh lüchite, naiuso lüchhi.

¹³Tititenai sauüh atsüojinyang tsühan, apa tü atsüojinyang tsühakü Goa nou mi kheme; lüko atsüojinyang nou mikhem chiai ashio epji.

¹⁴Jü deisinioso, khaiunia tsaküh apa amonglam noin ta ngionai, lüko apa chhi tsünoi nai, nung ti alesan noin? Nung amonglam nou apa kipsanau shio-emo?

¹⁵Deisinio tsüdekünai nousinio tsak tsosa, ajekhaiu pungkü eheshiu tsüepkü noi nai,

¹⁶asam ongko tsaküh ngüso tü, “Asam lamkü lünoi naiuso dokkü lühe!” ta ngio nai, lüko ngüso pem thaiutha poutsün asamüh tsükiunai, nung ti alesan noin?

¹⁷Nungti amonglam lüko chhi tsühakünai, apa pemsato ee noin.

¹⁸Khaiunia tsaküh “Ni amonglam noin, naiuso ngo chhi noin” ta ngio-e. “Achhi tsühakü ni nou amonglam ngü tü ahan, naiuso ngo jüchhi nou jü amonglam ni tü hanko.”

¹⁹Goa tsaklu noin ta ni monglamji. Mei! Angei onthso nousoüh lüko monglamji, naiuso hatkü ngaongaoji.

²⁰Tsüngekün khaiunia! Chhi tsühakü amonglam akeng ta ni hanau aiujiso?

²¹Sam Pao Abrahamüh meshen thso Isak amthang nai chaithio kiunai apa tsüpenkiu süne?

²²Amonglam nou apa chhi hachutsün noiküla, naiuso chhi nou amonglam thapungkiu ta ni epji.

²³“Abrahamüh Goa da monglam, apa thaiutha nung asio ta veha” nung Asiongio nou ngiotsün thawao, naiuso apa tü Goa haimei ta jon.

²⁴Amonglam noulu tsüde, lüko chhi nou khaiunia penkiuji ta asamüh epji.

²⁵Tsütsamtsütsüo nyiuhai Rahabüh Israel hai akautha khaiuniahoi apa tsamai shamlo-iküta yam maoai hanthiokü khu-itsün chhi nou apa penkiu.

²⁶Onthso tsühakünai pem nou titi ee noin, nungti chhi tsühakünai amonglam lüko ee noin.