Read Khiamniungan Naga Yakob 4 Bible Online

Yakob 4 - Khiamniungan Naga bible

Yakob 4

¹Asam ongko ali-etsün naiuso ehli nouso ti ainou sungji? Sübao asam mongai asaichi li-ekü noin, nung asam amongling thaiutha achinektsün ainou sungji.

²Asamüh mongchioji, lüko tsüepji, nungai asamüh luatau aiuji, chinekji lüko epau tsüshioji. Asam li-eji naiuso ngematji. Asamüh aiutsün tsütaiuji tiautenai asamüh Goa tü tsüsaoji.

³Asamüh saoji, lüko tsüepji, tiautenai asam achinek nai wanau thaiutha asamüh phiokü saoji.

⁴Asam monglamao tsüshiokünso! Goumchi haimei nou Goa ün eh noin; ta asamüh tsüngeso? Nungtiphe sauhaiüh goumchi nouko haimei theau aiuji, apa meshen Goa ko eh iulaji.

⁵Asiongio nai ngiotsünso tü ngiotsüo tsünoi ta layang. “Onthso sübao Goa nou sam da noi-in, nung Onthso nou achinek nou miankü noin.”

⁶Lüko apaüh atsüojin asong kiuji. Nungti Asiongio nou ngioji, “Goa nou abülom khaiunia kiapji, lüko amongmei khaiunia hau atsüojin kiuji.”

⁷Nungtiphe Goa khemai lünoi. Biya lüshiolo, naito apa asam ainou khuwane.

⁸Goa dongai shimkü ashi, naiuso apa asam dongai shimkü shi-e. Asam angeihoi, asam pha lütsawan! Asam abülom nouso, asam mongpem lülosiolu!

⁹Mongkiakü wekü lüshap, asam nyaitsün ashapau lü-iula, naiuso asam koitsün amongsaiuao lü-iula.

¹⁰APAOU khako asam chija henkü lü-iula, naiuso apaüh asam lotsok kiu-e.

¹¹Deisinioso, asam tsaküh tsak thako tsaokü lachite, sauüh meshen deisinio thako tsaokü chiteji, naiuso meshen deisinio mikhemji, apaüh ngiokhem thako chiteji, naiuso ngiokhem nou tü mikhemji. Lüko ni ngiokhem mikhem naito, ni ngiokhem kankeitsün tsüde, lüko mikhemtsün tsak iulaji.

¹²Ngiokhem kiutsün naiuso mikhem kiutsünto Goa lu noin. Apaühlu akipsanau naiuso alutheau shioji. Meshen haiso mikhem kiuao ni sau ta ni yangji?

¹³Asam sauhaiüh, “lonyi tsüdekünai lühom samüh nung noknio ai khu-e, küta nungai pon tsak chailekü tangka piakü lesane ta ngioji” lo athaplu.

¹⁴Lüko lühom asam aa ti-e nung asamüh tsünge! Tititenai sakhalektso epküta mowantsün ii nou khekkü asam noin.

¹⁵Nunglikoto asamüh nungtibao ngioau noin: “APAOU nou mongchio naito, samüh aa kihkü chhi nung tsüdekünai nung chhi-e.”

¹⁶Lüko lo asam bükomkü koiji, nungtin abülom apem yaang noin.

¹⁷Nungtiphe sauüh chhi amei chhiau ngetaiuküta tsüchhiji apa thaiutha nung angei.