Read Khiamniungan Naga Yakob 5 Bible Online

Yakob 5 - Khiamniungan Naga bible

Yakob 5

¹Lo memei nouso anglu! Asam khako ti angja shiji nung thaiutha shapkü lüwe!

²Asam jengtsaiu mowanji, naiuso asam neshe mat nou heanji.

³Asam chaiou naiuso tangkason ho nou heanji, naiuso nung ho nou asam thako mitha the-e, naiuso in nou chetheantsünli asam pem ho nou heane. Asamüh athon ajekhaiu thaiutha jengtsaiu kamtaiukü noin.

⁴Asamüh asam eiu ai chhitsünso hau mephaiu mai tsükiu. Ngüso namnamtsün tü anglu! Asam eiu ai sauhai be-eiuyamtsünso noin ngüsoüh wetsün nou APAOU Akhengting Goa noukhan sao-iu.

⁵Asam aa nung goumchi nai atsüomei naiuso amongling nou mianiu. Aluattsün ajekhaiu thaiutha asamüh asam chija tsakü tsadse-iu.

⁶Asamüh phio-i naiuso aphio tsülepkünso loat, naiuso ngüsoüh asam tsülolaoji.

⁷Nungtiphe deisinioso, APAOU shitsün tü thalutkü mongaulaiukü anoi. Athaplu, eiu-atsün khaiunia nou ayating naiuso aphiteng ah mo-oukün lektso chaiou be-eiuyam thaiutha taiuji.

⁸Asam lüko mongau laiukü lüthe. Asam mongyang tsokkü lütaiu, tititenai APAOU shitsün ajekhaiu shimkü shiji.

⁹Deisinioso, asam mikhem tsüepkü hau tsaküh tsak thako lanamnam. Athaplu, mikhem kiutsün koukhan dongko tsakü noin.

¹⁰Jü deisinioso, E-po sauhaiüh APAOU nianko chite, ngüsoüh angja jeilutsün naiuso laiukü kiplutsün athatluau lülo.

¹¹Sauhaiüh jeilu ngüso tü samüh thaiumei ta ngioji, tiautenai ngüsoüh jeilu. Yobüh jeilutsün thaiutha asamüh lula-iu, naiuso APAOU nou athon nai apa oukkiu. Tiautenai APAOU to atsüojin naiuso atsüojinyang nou miankü noin.

¹²Lüko jü deisinioso, apem chiko atengting nou nung noin: asamüh aün naiuso goum, tsüdekünai amao ti in nianko lünoi ngiomongshing lashan. Lüko asam mikhem nai tsühakü hau asam ngio, “Ah,” tünaito ah, tsüde tünaito “Tsüde” ta lüthe.

¹³Asam ongko ajantso omhekü noimo? Apaüh misao lüsaolu. Ajantso monglingkü noimo? Apaüh nianlom jih lühang.

¹⁴Asam ongko ajantso kiakü noimo? Apaüh donthe petchehoi lüjon, naiuso APAOU nianko ngüsoüh apa da khaiutsom tsomkiukü, apa thaiutha misao lüsaokiu.

¹⁵Amonglam misao nou akia mei-e, naiuso APAOU nou apa tenthsüo-e, naiuso apaüh angei kankeikü noilüko nung apa hau wankiu-e.

¹⁶Nungtiphe sam lomeiau thaiutha hai nou hai khako meshen angei lüthalu, naiuso hai nou hai thaiutha misao lüsaokiu. Asio khaiunia nou kojatsün naiuso misaotsün oukong asong noin.

¹⁷Elija lüko samlilu khaiunia noiküla. Apaüh ah tsü-ou-au thaiutha misao mongkü saonai goumchi ko pon süme alei luok ah nou tsü-ou.

¹⁸Naiuso tilai apaüh ah ou-au thaiutha misao saoshin, nungai ah ou nou hong, naiuso goh nai pai-eiu ao-eiu eiusan.

¹⁹Jü deisnioso, asam ongko ajantso ngiotsüo ainou atsüotsüdekünai khuwankü, tsaküh apa laokü shi-ishinai

²⁰nung labean; sauüh angei khaiunia tsak apa aphio yam ainou yam atha nai phokle-i-e, nungüh ee ainou angei khaiunia onthso niajikaniu naiuso angei piakü wankiu-iu.