Read Khiamniungan Naga 1 Peter 1 Bible Online

1 Peter 1 - Khiamniungan Naga bible

1 Peter 1

¹Yisu Khrista hongthon Peter ainou Pontia, Galatia, Kapadokia, Asia, naiuso Bithenia goumchi apemai pengkeikü noitsün Goa ün achosan khaiuniahoi nouso dongai.

²Asam Po nou Goa naiuso apa Onthso tsangkü Yisu Khrista tü angio angküta apa she tsangkü losioau Goa ayangtaiu nai asio mele tsak theau chosan. Asam ko atsüojin asong naiuso aalu thapemkü lünoi.

³Samüh Po nou Goa naiuso APAOU Yisu Khrista hau nianlom kiuko! Tiautenai apa atsüojinyang nou Yisu Khrista ee ainou ahkü shitsün tsangkü apaüh sam hau aa ayan nou kiu. Nungüh sam Aa Ayangtaiu nai miankü iulaji.

⁴Nungtiphe Goa nou apa khaiuniaso hau taiutsün ouk asong nouso thaluau samüh khaai thapji, apaüh nungso tiai tsüchoi-iji, tsülutheji tsüdekünai akeng tsüiulaji nungai aün nai asam thaiutha taiuji.

⁵Sau Goa oukong naiuso amonglam tsangkü aasan thaiutha athon ataoko tsangsheikü sungau khemkü noin nung mothikü asam thaiutha taiutsün noin.

⁶Tiautenai asam lo amongkia pohkü noitsün naiuso sakhalektso thaiutha athelu in piakü nou asam angja lüko nung thaiutha monglingkü lünoi.

⁷Nung ayang nou to asam amonglam atsüo mong si tsümong mithaao noin. Chaiou tisübao amowanau shioji, nung lüko in tsangkü liluji, naiuso asam amonglam sübao chaiou tü meijeng nung lüko liluau noin, nungti nungailu jeilu-e. Naito Yisu Khrista tsangsheikü sungtsün ajekhaiu nai asamüh nianlom, ajinka naiuso asuhat eppe.

⁸Asamüh apa tsüep lüko apa tsüojinji, asamüh lo apa tsüep lüko apa da monglamji. Nungtiphe angioau tsüshiokün ajinka amongling asong nou asam monglingiji,

⁹nung amonglam apa da noin tsangkü, asamüh asam onthso aasan epji.

¹⁰Nung aasan yam thaiutha E-po nousoüh thsüokü yam naiuso singlu, naiuso ngüsoüh sübao Goa nou asam hau kiu nung paopei thaiutha ngiokiu.

¹¹Nung titi shin naiuso atao tilai-e ta ngüsoüh yamsanau kowen. Khristaüh angja kipluau naiuso nung ta ajinka hoilutau ngiotaiu kiutsün sübao Khrista Onthsoüh ngüso tü han nung atao noiküla.

¹²Goa nou E-po nouso hau ngüso chhi tengkhaiu alesan thaiutha tsüde ta tsangsheikü han, aün ainou Asio Onthso oukong tsangkü thipengau Ngem Amei kantsün hong, nungso thaiutha ngüsoüh chitetsün asamüh lo lula-iu. Nungso thaiutha aün honghoi nousoüh lüko ngeau aiukü noiküla.

¹³Nungtiphe, asam mongchiokü chhiau thaiutha khemlokü lünoi. Nungtiphe Yisu Khrista tsangsheikü sungnai, kiuau noitsün ouk nou tü asam mong apem thumkü kiukü thsümonkü lünoi.

¹⁴Goa tü angio angkü lünoi, naiuso asam tsüngekün tao aakihli achinek nou asam aakih kankeiao ayam lakiu.

¹⁵Lüko asam tü jontsün Goa titi asio noin, asam lüko sakshi apem nai nungli asio lüthe.

¹⁶Asiongio nou ngioji, “Asam siokü lünoi tiautenai ngo siokü noin.”

¹⁷Sauüh phaphi phamong tsüyangkü khaiunia pungkü meshen chhi yangkü mikhemji, apa tü asamüh Po ta jonji tünaito, nungaito ni goumchiko aa kihtsün chikü apa hatnai lükih.

¹⁸Asam paosipo ainou kankeikü shitsün yaang don ainou, nung amowantsün jengtsaiu, chaiou tsüdekünai tangkason nou asam tuhsan tsüde,

¹⁹lüko thsülupia naiuso alengsat tsüpokü Onnemok Thso chaithio, Khrista she nou asam tuhsan.

²⁰Goumchi moshankünaita apa Goa nou chosankü noiküla naiuso nung atsüoting apa kümi ainou ngekü noiküla, lüko athon atao nai asam thaiutha nung tsangsheikü sung.

²¹Apa tsangkü ee ainou ahkü shin naiuso apa hau ajinka kiutsün Goa da monglamtsünso asam noin, nungti asam amonglam naiuso ayangtaiu Goa da noin.

²²Lo asamüh ngiotsüo nai angio angtsün tsangkü asam asam chija losio-iu, naiuso asam deisinio amonglamtsünso dongai saitha atsüojin nai shi-iu, asam mongpem chikü nou haisihai ne lütsüojine.

²³Tititenai Goa aa naiuso asaita noitsün ngio tsangkü amowanau lelu ainou tsüde, lüko tsümowankün lelu ainou asam müjam chet.

²⁴Asiongio nou ngiotsünli, “Khaiunia le apem sangli noin, naiuso nungso ajinka taopon khekkü noin, Sang nouso wonnanji, naiuso taopon nouso sappanji,

²⁵lüko APAOU ngio to athontsüyangkü noiji.” Nung Ngem Amei ngio nou asam tü chimtsün noin.